【收视分析师】《降魔的》《夸世代》收视平手　其实马明已经赢咗

欢迎收睇逢星期三中午12点嘅《收视分析师》，上星期大市整体气氛向好，9点半档《降魔的》仍然系市场焦点，记得首播第一个星期已录得23.7点收视，比《使徒行者2》仅仅低0.3点。加上上星期开始面对住8点半档有劲多花旦小生撑场，兼重点台庆剧之一嘅《夸世代》来袭。估唔到《降魔的》今个星期仍然系有个唔错嘅升幅，录得24.5点，回升返0.8点，系同《夸世代》平手呀！

我认为《降魔的》会处于一个易升难跌嘅局面，因为题材够晒新鲜，讲鬼怪剧系TVB真系唔多，加上剧中好多都系新一代演员例如胡鸿钧同刘佩玥，都成功引起唔少观众称赞演技有进步，预计未来收视仍然有一个唔错嘅增长。对于长线收睇《降魔的》嘅观众嚟讲，估值仍然算健康，相信系一个唔错嘅投资。而男主角马明系今次剧中凭住“马季”一角赢得不少掌声，因为有好多观众都话佢喺TVB咁多年默默耕耘，如果仍然唔颁“视帝”奖项俾佢，完全讲唔过去，不过香港人最擅长就是善忘，个多月前市场还吹奏《踩过界》的王浩信攞视帝，现在有《降魔的》就撑马明，有理由相信之后《溏心风暴３》播映，大家又会话夏雨、黄宗泽攞视帝。

被誉为重点台庆剧之一嘅《夸世代》直到上星期收市平均录得24.5点，其实在上星期一市场首日开市最高位报25.5点，果然系气势如虹！当然喇，有欧阳震华呢位“收视福将”顶住之余，还要加上全台当红花旦如李佳芯、谭凯琪、龚嘉欣、江嘉敏、麦明诗同陈嘉宝靓女撑住，再加森美同陈豪骚肌肉，24.5收视......Well，基本盘啦，但性价比，就《降魔的》赢哂，一睇就知《夸世代》budget多好多啦，公司重视边套一睇就知，简直系皇马斗南华，其实边有得斗？但结果是打成平手，《降魔的》应该要开香槟庆祝，马明今次真系一个打廿个劲过叶问，他有冇视帝，奖座都其次，证明自己孭都飞，观众钟意睇你，这一点才最重要，而《降魔的》成功说明剧本扎实，即使budget低，old school特技，观众都会钟意，因为故事才是皇道，卡士、特技只是其次，蔗渣价钱都可以有烧鹅味道，TVB够胆将《降魔的》列为台庆剧，证明高层还清醒，不是盲目认为大堆头才是收视保证。