麦明诗撑雷庄𠒇夺冠　网友反击群情汹涌

麦明诗一向敢言又有point，深受观众同网友欣赏，faceook有18万人like，不过前年当过香港小姐冠军嘅佢，今日喺facebook撑今届港姐冠军雷庄𠒇（Juliette），却被网民炮轰，群情汹涌，声言再撑Juliette就唔再like佢。麦明诗回应《香港01》时话：“都有啲建设性批评嘅！”

今届港姐冠军雷庄𠒇自当选以来负评排山倒海，加上佢对网友嘅言论：“I don't care”形象直插谷底。而麦明诗今日喺facebook就贴咗张照片－－3届港姐冠军麦明诗、冯盈盈同埋雷庄𠒇一齐喺录映厂嘅合照，而麦明诗更写咗一大段文字引起好大回响：“昨晚有幸认识Juliette，她是一个很有梦想的女仔，她那份单纯的信念，让我对她有点改观（之前的确被一些报道影响到）。”

佢又用李嘉诚同王祖蓝嚟做例子：“李嘉诚黐胶花时一定没人猜到他会做香港首富，王祖蓝做儿童节目时大家都想不到他会成为大中华一线红星。”麦明诗同时写埋英文版，但英文版系用苹果教主Steve Job同神奇女侠Gal Gadot做例子。

麦明诗fb全文及网友留言反驳：

然后讲到Juliette：“可能大家未有机会见到她拼搏，但有梦想是第一步，与其质疑她不自量力，倒不如质疑自己为什么不再相信梦想。”

呢个po一出，网民一窝蜂留言，而且一反常态今次几乎全部系闹，有麦明诗嘅粉丝甚至讲明唔再like佢。

网友反驳好激烈：“我第一次唔同意你嘅讲法，而且有啲失望。”、“佢追梦嘅过程就系阻咗好多其他人高飞，佢乜都敢说出口，唔系因为佢勇敢，而系佢已惯目中无人。”、“系咪因为有人唔识中文，你要写多次英文？”、“香港小姐没有理解和尊重香港普通文化的能力及思考文化差异，作为香港小姐称职吗？”、“其实由佢讲𠮶句I don't care开始佢已经注定无运行，我唔知系咪tbb（TVB）叫你同冯盈盈去粉饰太平。”留言已经去到3百几个，但未见麦明诗回复。

其实喺港姐决赛翌日麦明诗都有贴文撑雷庄𠒇，但冇开名所以网民冇咁大反应，当日佢写：“呢个世界从来冇绝对嘅公平，有啲人天生靓啲有啲人冇咁靓……但系同时间，喺每一个机会尽自己嘅努力同脑力，就系对自己最公平嘅方法。”我们致电麦明诗，佢回应：“唔惊破坏我形象嘅！好多嘢要亲身接触个观感会唔同，冇人系prefect！我讲呢番说话系想中和下啫！”

麦明诗话唔会逐一回应网友嘅批评，因为再讲对件事都未必有帮助，而且佢话：“有啲系建设性嘅批评！”至于佢点睇雷庄𠒇嘅外貌，佢就答：“独特啰！俾人记得个样重要个唔记得佢吖！”而有网友质疑佢系受到TVB压力所以粉饰太平，佢称个live节目系TVB意思，但佢自己并唔觉得系粉饰太平㖞。