【建华霸权】月缴四千积分卡钱、放假要申请　商户：简直系吸血鬼

近年不少街市进行翻新，当中有近20个街市由建华“香港街市”管理，其管理方式一直为人诟病。有建华旗下的小商户向《香港01》反映，建华以多种招数“管理”小商户，例如顾客积分卡换取礼物的金钱需由小商户支付、放假要申请、限制货物摆位等，直斥：简直系吸血鬼嚟！
摄影：邓咏中

积分卡钱、八达通机手续费　占租金一成

由建华“香港街市”管理的葵盛东街市于2017年8月完成翻新后重开，但华丽装修的背后，都是小商户的血和泪。葵盛东街市一商舖老板邝小姐表示：“我哋入嚟做要畀入场费6至8万，其实即系畀钱佢哋装修。但我哋入到嚟乜都冇，只有一个舖位、地砖同一盏灯，其他嘢要我哋自己畀钱再整。”街市装修“升级”后，租金亦随之上升。邝小姐指，她四年前在该街市开店，未翻新前400呎旧舖的月租约三万元，翻新后新舖只有200呎，却要付四万多元月租，“比旧街市上升了三成。”

但真正的恶梦在搬入后才正式开始，除了租金，商户每个月还要支付积分卡钱、八达通机手续费等费用，占租金的一成，连租金邝小姐每月要缴交五万元。

会员积分计划　商户畀钱以建华名义送礼物

现时，建华旗下的街市均实行会员积分计划，市民可以申请一张积分卡，每一间商店都设有一部积分卡机，市民每次消费均可以“嘟”卡储分，储够一定积分就能换取相应的奖品，例如鸡粉、豉油、米等。但羊毛出自羊身上，原来每间店舖每储有100分，就要支付$1.5元，换言之愈多市民使用积分卡，店舖就要支付愈多费用。邝小姐指，“试过一个月要交两、三千，最多交四千几，系舖租嘅一成。”

新年休息　市民都储到分？　商户：欠透明度

邝小姐又批评积分制度欠缺透明度，“我哋（商户）唔会知实际储咗几多积分，得佢哋（建华）知，冇透明度。佢哋每个月都会寄一张单畀我哋，话我哋今个月储咗咁多分，要畀返咁多钱，但系我哋自己Check唔到，佢哋话咩就咩。”她举例农历新年期间，她的店舖休息了八天，但那八天都有积分计算在内，她疑惑：“啲积分边度嚟？”向建华查询后，建华回答指可能有顾客于年廿六、年廿七买，但没有拍卡，到年初三、四才拍卡。“平时街市会开咪叫顾客走之前记得拍卡，如果唔系第二日就会冇咗啲分，但依加过咗一个礼拜先拍都依然有分，究竟边个先啱？”她指有顾客储完分会忘记换礼物，她会提醒顾客要换，“因为从为顾客嘟分𠮶一刻开始，我哋已经拎咗钱出嚟，如果你唔去换嘢，啲钱就会畀建华赚晒。”

除了积分卡机外，建华亦会强制商户安装八达通机，“每个月要交$298嘅八达通机月费之余，我哋想拎返啲钱出嚟仲要收我哋1.5%嘅手续费。我卖一支豉油先$10，赚都赚唔到$1，你收我咁多手续费，我哋仲点赚钱？”

老板变员工　放假要申请

邝小姐直言，在建华的管理之下，自己不像老板，而是似超级市场员工，因为她连放假的权利也被剥夺。“佢最贱格嘅就系新年𠮶阵递张纸畀我哋，话我哋新年放几多日假要同上面申请，我心谂：我自己做老细，放假仲要同你申请，黐线㗎你！”但进了这个场只能遵守这里的规则，邝小姐会循例通知建华一声，讵料建华却要求邝小姐“唔好放咁耐”，“佢哋会畀说话我哋听，话：‘如果你哋放假，会影响到成个街市。’”

被问到未申请就放假会有其么后果，邝小姐指“我哋要放佢哋都冇得强迫我哋开，但佢哋每个月都会有投票活动，选出最佳店舖，一定系畀佢哋自己嘅舖头，例如‘领鲜’、‘天天鲜果’，我哋呢啲唔听话嘅小商户唔使旨意拎到。”

限制多多：指定摆放高度、价钱牌款式、货品摆位

访问当天刚好有穿著“香港街市”制服的工作人员到街市内一间水产店拍照，“场内两间水产店同两间肉店都系建华自己嘅，佢哋会落嚟巡场，影相睇下净返啲咩货品。”但除了影自己店舖外，工作人员也会拍下其他店舖的贩卖情况，“睇下我哋啲货品摆得好唔好，例如有冇超越指定高度，价钱牌嘅款式啱唔啱，唔可以用纸皮箱装货品等等，如果摆得唔好，佢哋又会畀说话我哋听，话：‘你呢啲要摆靓啲啊！’”

强推新年优惠　要求商户提供货品送福袋

建华对小商户限制多多，农历新年已可见一斑，“新年我哋会拎多啲货，冇位摆就唯有摆舖头上面嘅位置，但建华咁都唔畀，工作人员嚟影相，叫我哋要摆返落嚟，但舖头真系冇位摆，我哋唯有拎少啲货，拎少咗货啲嘢就会贵啲，结果市民只可以买贵𩠌。”商户因建华的种种限制被迫加价，建华却要求商户减价，“佢哋会去巡其他场，之后返嚟叫我哋做推广，例如新年佢哋会话：人哋啲瓜子卖得平啲㖞。”新年期间，建华想送福袋给市民，却叫商户拿一些货品出来，“我哋唔肯攞佢哋就会系咁烦住，佢哋系用我哋啲钱送礼拜畀顾客，但系用佢哋公司嘅名义送！”

完约不续约：建华简直系吸血鬼嚟！

邝小姐愤然表示，“未入场之前唔知佢有咁多限制，以为同之前一样，点知入嚟之后咩都要管，仲要佢哋自己舖头啲嘢卖到好贵，赶走晒啲客。嚟紧五月会签约我哋点都唔签㗎喇，就算佢唔加租都唔会考虑，再揾场都唔会再揾建华嘅场，建华简直系吸血鬼嚟！”

全线建华商户受影响：根本就系打劫我哋！

除了葵盛东街市，记者亦前往沙角临时街市及宝达街市两个同样由建华管理的街市，发现所有店舖都有安装积分卡机及八达通机，有些甚至有支付宝，有商户承认建华的确有以上限制，并补充指，“如果9点见你未开工就会打电话问你做咩唔开工，你要畀到一个解释佢”。对于建华收取各种费用，有商户形容“佢哋根本就系打劫我哋！个情况就好似黑社会交保护费咁，好无奈，但都冇计。”又有商户指，“舖位小，空纸皮箱放喺店舖内会阻碍空间，故有时会将纸皮箱放喺对面嘅空舖或短暂放喺店舖门口，等工作人员前嚟收拾，但佢哋连咁都唔畀，仲会出警告信，话我哋影响环境，仲话如果再系咁，就要终止合约，唔会赔返按金畀我哋！”

市民：会考虑少用积分卡

不少市民表示有用积分卡，但很少换购商品，同时亦表示不知道商品由建华送还是商户送，当记者告知由商户付钱送出商品后，市民黎太马上表示：“咁惨？都会考虑下用少啲张积分卡。”同时亦有市民认为，商户会将其所付出的费用转嫁到市民身上，所以最终受苦的依然是市民。

组织：小商户欠议价能力，唔够胆出声

监察公营街市发展联盟发言人陈淑淇回复《香港01》查询指，“现时香港嘅私营街市被几个财团垄断，小商户冇议价能力，又怕得罪财团，往往唔够胆出声或者反抗，更遑论公平竞争。”她认为政府应兴建更多公营街市，或者在政府土地上办墟市，同时房署辖下的街市应停止外判给与领展相同的承办商，避免这些承办商再度扩展版图。

翻新街市停不了　建华版图再扩大

据了解，钻石山凤德街市及马鞍山耀安街市将分别于4月及5月底暂停营业，以进行翻新工程，而粉岭华明街市及沙田沙角街市则正进行翻新工程，预计会于5月及6月重开。据了解，领展已将耀安、沙角和华明三个街市外判给建华管理，意味著建华的版图将会进一步扩大。

建华“香港街市”发言人回复《香港01》查询指，公司推出的会员积分计划，与一般商场、超市及商业机构无异，目的旨在为顾客提供一站式的顾客体验，使其享受街市购物乐趣。又表示，公司会继续努力提升旗下街市的服务质素，为居民缔造更舒适、便捷的购物环境。对于就商户对积分机收费的投诉，一概没有回应。