【每逢大事讲故事】家姐唔易做 朴槿令专注跣足朴槿惠30年
韩国前总统朴槿惠仓皇下台，又应验韩国总统冇好下场嘅诅咒。有人可怜佢成为阶下囚后，只可以食价值1443韩圜（约10港元）嘅简单午餐，只得白饭、菜、菜、同菜，好似牛牛只食草；相比以往一餐国宴都20几万美金（约百多万港元）嘅日子，实在太大落差。
不过佢过去几十年食饭基本都“背脊骨落”，多得佢妹妹朴槿令出尽吃奶嘅力去跣佢，监仓饭可能先系佢过去几年难得一次嘅安乐茶饭。
朴槿惠系一个悲剧女主角，22岁母亲被杀，就要梦想都放弃，由法国返回韩国，代替母亲充当“第一夫人”嘅角色。几年后连父亲朴正熙都被杀，但佢冇时间伤春悲秋，接到死讯第一句问：“前方（三八线）有冇动静？”第二句呢？冇第二句喇，因为佢要冷静，仲要顾住啲细佬妹，仲要顾住国家。
死老豆㖞！可以咁冷静？系呀，呢个故事流传到而家，一直系朴槿惠粉丝力证佢系总统人才嘅理据。佢喺自传中回忆，当时亲手清洗父亲沾满血迹嘅衬衫同领带，又谂起母亲被杀后，都系自己清洗佢染满鲜血嘅韩服。
历代总统都冇好下场？请睇：
之后朴槿惠离开青瓦台，全斗焕接替朴正熙上台后，开始批判朴正熙嘅独裁统治。不少朴家亲信都首当其冲，朴槿惠曾经相识又亲密嘅人，都成为陌路人。有次佢喺酒店电梯见到父亲嘅旧部下，好高兴同人哋打招呼，点知对方当佢冇到，真系伤透佢嘅少女心。就系呢啲经历，令朴槿惠变得坚忍同坚守原则，同时亦开始唔信人。
不过父母横死、人情冷暖，都唔系最令朴槿惠伤心；真正令佢食唔安坐唔落嘅，反而系佢两位最亲密嘅人：一个系感情好到似真姊妹，但冇血缘关系嘅崔顺实；一个系血浓于水嘅真姊妹，感情却只如路人嘅朴槿令。
崔顺实点样令朴槿惠头痕大家都好清楚，唔清楚都可以介绍番：
你以为咁叫夸张？No！你睇得太少韩剧喇。朴槿惠妹妹朴槿令先够经典。话说朴正熙同妻子陆英修有3个仔女，长女槿惠、次女槿令、幼子志晚。朴槿令原本唔叫朴槿令，佢出世时叫朴槿瑛。朴槿瑛毕业于京畿女子高中，又喺著名学府首尔大学主修作曲专业，配埋佢年青时清秀嘅样貌，真系有种脱俗尘嘅少女味道，喺韩国系有名的“名媛花旦”。
你以为#有妹的孩子像个宝？果个只系一个梦......
自古以来，好多姊妹、特别系上流社会嘅名媛，都系互相睇对方唔顺眼。好似美国已故总统肯尼迪嘅夫人积琪莲肯尼迪同佢妹妹Lee Radziwill，曾爱上同一个男人，即俗称争仔；英国女王伊利莎白二世嘅妹妹玛嘉烈公主，多年来不断与小鲜肉闹绯闻，玛嘉烈公主回应：“两姊妹中如果有一个做咗女王，另一个就唯有集中做啲有创作性嘅坏事。”用中文讲即系摆明作对。
想知积琪莲肯尼迪点同妹妹争仔，可以睇番：
▲真正嘅好姊妹系咁㗎！
来到韩国，就有朴槿惠同朴槿瑛姊妹。咁朴氏姊妹争咩？
首先要睇番两姊妹嘅恩恩怨怨先。朴槿瑛同姐姐关系本来都唔错，1982年，当时26岁的朴槿瑛，同韩国财阀之一、豊山金属创办人柳缵佑嘅长子、33岁的柳青结婚；不过冇几耐就离婚。婚姻失败可能系朴槿瑛嘅思想突变嘅时机，自此之后佢就同家姐朴槿惠处处对着干。
点解会思想突变？朴正熙死时，朴槿惠同朴槿瑛其实都系廿几岁嘅成年人，讲“长姊为父”或“长姊为母”就老土啦，但偏偏朴槿惠唔知系护弟妹心切、责任感上脑，定系控制欲过剩，对细佬妹嚟讲就系摆起个家姐款。而且多年来朴槿惠喺朴正熙身边出尽风头，相反朴槿瑛虽然系有名名媛，但名气始终唔及姐姐同弟弟，唔系乱讲㗎，韩国版维基百科Namuwiki都系咁讲㗎。
咁朴槿瑛点跣朴槿惠呢？
五大跣位：
一、迫姐姐退出福利机构
陆英财团是姊妹决裂嘅开端。陆英财团系两人嘅妈妈陆英修创办嘅儿童福利机构，1982年朴槿惠开始出任陆英财团理事长一职，一直都相安无事。直至1990年，朴槿瑛发动“政变”，号召支持她的成员投票，罢免朴槿惠理事长职务。搅咗两年，朴槿惠最终被迫下台，由朴槿瑛上位。
二、与姐姐对手结婚
到朴槿瑛40岁时，话因为唔好意头改咗个名叫朴书永，10年后又再改过个名叫朴槿令。如果朴槿令系俾钱人帮佢改名嘅话，咁真系可以叫佢回水。因为改咗名之后，朴槿令都好似冇咩长进。
2007年朴槿惠角逐大国家党总统候选人竞选时，朴槿令竟然手指拗出唔拗入，同一样参选嘅白石大学教授申东旭订婚。首先，申东旭细过朴槿令14年，朴槿惠真系接受唔到啰；申东旭啲私生活又过份精彩，2004年同前妻离婚，2006年同朴槿令交往，但同时前妻又帮佢生咗第二个小朋友。
朴槿惠落台后，大选即将举行，更多内容请睇：
数学题：究竟申东旭前妻几时开始怀孕呢？真系耐人寻味。
咁样嘅人朴槿惠完全信唔过，知道妹妹要同佢结婚，直头嬲到连婚礼都冇去。但朴槿令坚持同申东旭喺2008年结婚，自此之后两人就拍住上，一齐以跣朴槿惠为人生目标。2009年申东旭转做键盘战士，喺网络上发表诽谤朴槿惠嘅言论，包括话朴槿惠抢走咗陆英财团。最后申东旭诽谤罪成，被判有期徒刑1年半。
三、不顾民情 乱噏亲日言论
近年来，朴槿令继续同姐姐作对，但唔系循正途，系靠乱噏。2015年，朴槿惠同安倍会面时谈到慰安妇问题，争取日本首相安倍晋三道歉，但朴槿令就同姐姐唱反调，话韩国不应该就慰安妇问题持续要求日本道歉，日本冇必要对就此问题赔偿，又话参拜靖国神社系日本内政。
▲韩国人应该想问朴槿令：“你冇__嘢呀？”
四、参选议员 攞老豆家姐助选
旧年佢仲参选议员，如果靠佢自己当然系冇人睬佢啦，佢今次唔玩政变唔玩结婚，佢玩“老豆”。佢喺竞选海报上印埋朴正熙个样，宣传口号系“以父之名”。
▲飞云要送佢一首歌。（Youtube）
人哋问佢参选理由，佢就话：“家姐做总统好辛苦㗎，我想帮吓佢！”摆明车马摆老豆、家姐上台。唔单止咁，佢仲提出“性交易合法化”、“将亲朝左翼人士强制移居至朝鲜”等等出位嘅政纲。其实你唔拖累家姐，已经好感激喇。
五、踩多脚 话崔氏父女影响姐姐
当朴槿惠卷入密友干政风波，申东旭又出嚟加多两脚，话朴槿惠因为亲近崔顺实，所以先同亲妹疏远：“我老婆同朴槿惠一齐住时好亲密，有时我老婆仲会做埋司机、秘书、形象顾问。但我老婆（同前夫）结婚之后搬咗出嚟，崔氏父女就乘虚而入。”仲话：“佢哋已经系朴槿惠的手手脚脚。”
想睇更多朴槿惠新闻，请睇：
朴槿令最新玩法，系喺弹劾案判决之后，走入挺朴民众一齐示威，搅咩呀？
多得两位专注跣朴槿惠多年，朴槿惠可以话冇觉好瞓。所以比较上嚟，细佬朴志晚吸毒都唔算系咩啰。
就好似《孤独的美食家》所讲：唔被时间同社会束缚，幸福咁填饱个肚，短时间内变得随心所欲，变得“自由”......是现代人最大治愈！可能属于朴槿惠嘅自由，免受妹妹侵害，真系要喺狱中先揾到。
继续听飞云讲故仔，请睇呢度：