詹培忠老猫烧须 金手指下集之“金姆指”﹙下篇﹚｜刁佬
上篇﹙詹培忠老猫烧须 金手指下集之“金姆指”﹙上篇﹚｜刁佬﹚讲到，读者可能会奇怪，发行新股及可换股债券，上市公司自然多咗现金，就算詹氏父子真系揾人俾钱去买多咗上市公司嘅股票或可换股债券，点解会变成不公平交易嘅原因？
喺呢度刁佬要讲返，上市公司买卖壳，万恶之源皆因正负零交收。唔知道几时开始，上市公司买卖控股权好多时候都要求原有股东将公司嘅资产同负债完全承担或者攞走。听落好似好公道，因为呢啲都系上手股东嘅资产或者负债，不过大家可能冇谂到小股东啦。上市公司买卖控股权，如果新老板作出全面收购，买哂所有想卖嘅股票，小股东至少收返个壳价。如果大股东仲可以将资产100% 攞走，咁咪即系将小股东𠮶份资产都攞走埋？
刁佬估计正因为正负零交收，就算亚洲资源发几多新股及可换股债券，增加咗嘅现金都由原股东攞走，噤就解释到大佬詹点解咁大方，真金白银去发新股同可换股债券去将股权增加。大家当然会问咁发行新股及可换股票据啲现金最后去咗边？
无论点样讲都只不过系刁佬嘅估计，不过睇吓数字，2013年亚洲资源发行新股及可换股债券集资后共集资约港币5.5亿元，加上年报声称公司2013嘅现金大概7,300万，同埋股票大约1,200万，公司2013年底嘅现金资产总值大约港币6.38亿元。咁大嚿钱金手指又点会送俾人，大家唔好咁天真啦。
亚洲资源2013-2015年嘅交易实在太频繁，刁佬只好做咗个表，见到公司收购咗大量物业，总值港币6.38亿元，收购支出嘅数字完全对上集资金额以及公司嘅现金，仲要岌岌陷，唔系嘅话点配得上做天下第一庄。当然，呢一系列物业全部都同新股东无关，如果唔系就会变成关连交易，金手指又点会咁失礼。
刁佬一不做二不休睇埋2013年嘅公告，睇吓究竟发咗几多股票同埋分配如何，一睇之后简直配佩服到五体投地。原来2013年嘅时候，发行可换股债券 (“Convertible Bond”, “CB”) 仲仍然可以去到原本股本嘅几倍，即系话揸住CB嘅投资者先至系公司嘅老板，因为随时可以换股变成大股东。唔单止神不知鬼不觉咁样交收，仲要一次过收干只壳，金手指果然系高手中嘅高手。当亚洲资源喺2013年7月做一个配售，再喺八月发行可换股债券之后，当全部债券换股，金手指嘅友好方已经控制公司超过85%。
读者可能会问啲钱买咗物业之后会点？刁佬喺度着留返俾大家谂啦。其实一直以来好多上市公司交收都系咁做，不过好少有直接证据去证明佢哋秘密卖壳，但詹氏父子与马老板协议“卖壳”，过程又紧跟剧本，数字仲要出奇地巧合，咁其实都未够。案情嘅发展比电影更加曲折离奇，如果拍戏就一定会有个卧底做二五仔，现实中马老板有一个心腹员工Mr. X。一般情况下买卖双方一个肯买一个肯卖，大家都拥有共同利益好难会出事，到底为什么马老板嘅心腹X先生会变成二五仔翻脸呢？
根据判词所说，Mr X系马老板嘅助手，曾为马老板嘅上市公司任居要职，当然有份参与洽谈买壳的过程，相信亦系一位知书识例嘅专业中间人。其实国内老板嚟到香港人生路不熟，有一位识途老马仲要系紧密合作方，正常都系最佳拍档。不过拍档归拍档，X先生作为专业人员，亲兄弟明算帐喺香港嘅共识。当老板经常欠薪，又试过3个月没粮出，交收接货仲要唔俾钱做独立第三方，更厉害叫你帮手做人头借钱接货，Mr. X有情有义，承诺顶到尽借350万元，马老板见佢一表人材揾人借足3000万比佢接货，不过转头将呢3000万贷款转比另一个人头王女士去接货。
其实Mr. X 做伙计帮老板代持股份冇乜所谓，不过做完一场大龙凤，欠薪、借钱、仲要孭债，咁出色嘅老板，中间人𠮶份佣更加唔会再奢望。系咁嘅环境，Mr X作为一个专业人士又点会唔死俾你睇，死咗咪做鬼啰，既然廉记茶餐厅开戏招聘演员，做卧底都系一个选择。
现实刁埸里面真系好多时比电影更加曲折离奇，刁佬都系𠮶句，唔该打劫买把枪，做兄弟打劫就唔好拖粮，今时今日咁就当系专业态度，真系唔得㗎啦。
简介：游走在中环黑白之间，自觉是个穿着西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。