摇呀摇，婴孩真系会瞓得好啲？！│Sci Papa

当大女儿仲系初生婴儿时，佢嘅睡眠对笔者嚟讲曾经系一个恶梦，而家已经过咗有五年多时间，但仲系历历在目。

笔者有试过要成晚抱住佢瞓，仲要无间断咁喺个厅漫步，因为一坐低佢就哭声震天；笔者亦有试过一边食饭，一边用个膝头哥去摇部high chair，等佢无咁易醒。轻轻嘅摇摆，似乎对婴儿嘅睡眠有一定嘅帮助。

甚至笔者嘅妈妈或陪月，都系一听到婴儿喊，就会轻轻摇动佢，更驱使太太后来提议笔者买多部电动摇摆high chair畀女儿——当然被笔者一口拒绝，手动嘅悭钱、悭电又环保，仲可以当做运动添！

事实上，前人留落嚟嘅智慧有时又真系不能忽视！摇住瞓就会瞓好啲，竟然都有科学根据？！

一个瑞士嘅研究团队，招募咗18个健康嘅年轻人喺实验室进行睡眠监测。第一晚先畀佢哋习惯喺实验室瞓觉，之后两晚中其中一晚，佢哋瞓喺轻轻摇摆嘅床上；另一晚，佢哋就瞓喺一张冇摇摆嘅床上。

研究数据显示，呢啲年轻人喺摇摆嘅床上入眠得更快，而佢哋都会有更多时间停留喺深层睡眠，甚至醒来嘅次数会更少。更重要嘅系，喺摇摆床上瞓觉嘅人会有更好嘅记忆。

进一步嘅研究更发现，摇摆影响睡眠时嘅大脑电波，令大脑丘脑皮质网络中嘅神经活动变得同步，令人瞓得更好同时亦能巩固其记忆。呢项研究除咗为失眠和睡眠质素低嘅人带嚟新希望之外，亦间接解释咗点解大女儿细个咁钟意被轻轻摇摆，同埋笔者半夜无眠嘅抱著摇或用high chair摇住大女嘅辛酸，原来并冇白费！

顺带一提，摇只可以轻轻力，婴儿嘅身体仲好脆弱，太大力摇晃可能会对佢哋造成伤害！

参考资料：https://www.sciencedaily.com/releases/2019/01/190124110844.htm

Sci Papa （专页：Scientific Papa）

喜欢科学，但更喜欢老婆跟女儿。觉得科研跟“凑女”都是要有极度的耐性，不怕失败，还要懂得自我反思后用不同方法再尝试！将育儿及科学融合，期望伴著女儿走一条快乐的成长路。