【睡前故事】龟兔赛跑原来系只猪赢咗？！│Sci Papa

话说笔者每晚都会喺大女儿瞓觉之前讲故事，但系讲边一个故事，通常都系个女话事，当然笔者有时都会反抗。不过，当面对佢最钟意嘅《龟兔赛跑》同《三只小猪》呢两个故事，笔者真系讲到“口臭”！上星期有一晚，女儿临瞓前又叫笔者讲《龟兔赛跑》⋯⋯科豆：“前晚先讲《龟兔赛跑》咋㖞，又讲？”女儿：“咁讲《三只小猪》啦！”科豆：“咪上星期五晚讲咗啰！”女儿：“咁讲《龟兔赛跑》啦！”睇嚟笔者都难逃一劫，又要讲一次呢两个故事，但向来唔喜欢沉闷，笔者只好发挥创意，将《龟兔赛跑》同《三只小猪》呢两个故事cross-over！

《龟兔赛跑》讲到兔仔骄傲𠮶一节：“兔仔原来冇瞓觉，去咗同三只小猪嘅猪大哥玩㖞，跟住佢同猪大哥及猪二哥一齐逃避大灰狼嘅追补。当佢哋走到去猪三弟嘅屋企时，就遇到跑跑下迷左路嘅乌龟，于是佢哋一齐入咗猪三弟嘅屋企，然后大灰狼黎到，当然系吹唔烂间屋啦！于是佢哋喺屋企度，等到大灰狼走咗，然后就决定一行五只动物一齐赛跑，最后兔仔为咗等埋乌龟呢个朋友，于是个比赛就被好勤力嘅猪三弟赢咗啦！”

𠮶一晚，个女听完呢个咁有创意嘅故事，当然好满足咁样瞓咗觉啦；呢件事，亦令到笔者决心将唔同嘅故事cross over，例如将《金银铁斧头》同《狼来了》cross over咗，《城市老鼠和乡下老鼠》就同《鸟、兽和蝙蝠》cross over！

甚至有时，笔者亦会畀女儿参与创作，究竟故事点发展，笔者都会畀佢作选择。例如《丑小鸭》只天鹅仔最后揾唔返妈咪，去咗鸡仔屋企住，但后来女儿又想天鹅仔有父母锡，又安排父母去鸡家揾到佢；原来，女儿十分重视父母嘅爱。《吃不到的葡萄是酸的》只狐狸又食唔到葡萄，反而去咗开水果派对，然后食咗佢最钟意食嘅火龙果。原来女儿最钟意有不同水果任佢选择。

每晚同女儿一齐创作故事系一个十分唔错嘅亲子活动，更重要系喺创作过程中，笔者可以了解女儿唔同嘅想法，有时仲可以问吓佢点解想个故事咁样发展，从而畀佢作更多嘅分享！加上佢可以参与故事创作，更能投入同专注故事发展！

笔者著实好钟意呢个活动，如果女儿唔嫌弃嘅话，笔者希望可以为女儿每晚都讲一个故事，如果要为呢个亲子活动定一个限期，笔者希望系“一万年”；可是，笔者却又知道，佢仲会嘈住叫爸爸讲故事嘅时间已经唔多，可以做嘅就只有珍惜当下。

Sci Papa （专页：Scientific Papa）

喜欢科学，但更喜欢老婆跟女儿。觉得科研跟“凑女”都是要有极度的耐性，不怕失败，还要懂得自我反思后用不同方法再尝试！将育儿及科学融合，期望伴著女儿走一条快乐的成长路。