专访杨诗敏张锦程：在AI世代，难道冇咗两粒守宫砂才去爱？｜何故
杨诗敏（虾头）于2023年的《独脚丝打噏の难道停经才去爱》叫好叫座，今年7月将会再接再厉，上演《难道手机冇电才去爱？！》，继续由她主演及文本创作，导演换上香港沙画艺术先驱的跨媒体剧场人海潮，苏子情监制，张锦程担任艺术顾问。
趁机会借访问为名，约了虾头和锦程两位老朋友聚旧，有一段充满欢笑的对谈，好后悔没有拍摄video……
原题：《在AI世代，难道冇咗两粒守宫砂才去爱？！》──《难道手机冇电才去爱？！》前传番外篇，专访主演杨诗敏和艺术顾问张锦程
手机是我们现在日常生活的必须品，甚至是最重要的东西，“手机冇电”随时等同于世界末日，为什么会在“冇电”这种极端状态下“才去爱”？
虾头：“冇电，就叉电啰！”
锦程：“佢嘅意思系，喺叉电嘅时候，就有爱喇！”
虾头：“有可能！睇吓系叉部手机？定系叉你自己。”
何故：“部手机有电𠮶时冇爱？要等到部手机冇电时先至有爱？”
虾头：“又或者，到部手机冇电嘅时候，你先至记得有爱呢？…喺我嘅谂法里面，手机系唔系我哋嘅全部？我哋有冇得选择呢？”
何故：“呢个系关于‘选择’嘅故事？”
虾头：“系。个‘选择’系你有冇去睇翻自己，‘手机’只系一个比喻，我讲紧嘅系成个大时代。近呢十年，科技不停咁发达，一路行行行，好快好快好快，真系令到我都有好多反思，点呀？我系咪要追呢个节奏？喺同一时间，有好多问题你可以向外问，问AI，㩒一个掣就有答案，但系唔系所有问题都可以咁样？”
何故：“AI答案，可以系假㗎！”
虾头：“冇错！依家可以将把声转新闻主播𠮶度，做一啲唔系真嘅新闻出嚟，你已经分唔清真同假，仲话乜嘢‘有图有真相’，有图都未必有真相呀！所以，呢个世代嘅问题，令到我有好多反思。”
就是带著这些问题，虾头创作出2025年的“独脚丝打噏”《难道手机冇电才去爱？！》，这是结合科技和爱情的港式癫狂幽默，虾头再次施展浑身解数，带领观众穿梭虚拟与现实，笑爆男女关系在科技下的荒谬日常。
虾头人生第一个音乐剧《遇上1941的女孩》，就是和张锦程合作，但其实让虾头勇夺第16届香港舞台剧奖“最佳女主角（喜／闹剧）”的《愈笨愈开心》，他们也有同台演出，今回虾头特别邀请张锦程担任“艺术顾问”，加上导演海潮，将会擦出什么新火花？
虾头：“兜兜转转咁多年，返翻嚟，又有机会合作㖞，咁点呀？梗系去explore吓㗎啦！就系去explore我嘅演技，就当系小龙女同杨过咁样，喺个草丛里面…”锦程：“？！”
虾头：“过啲真气畀我…”
锦程：“妳系小龙女，我唔系杨过，我系郭靖嘛！”
虾头：“咩呀？𠮶个系？…𠮶个系？…（脑转动中）𠮶个真真正正同小龙女𠮶个…（脑继续转动中）唔系郭靖！唔系杨过！𠮶个叫乜嘢名呀？”
锦程：“尹志平。”
虾头：“系呀！尹志平！”
锦程：“咁我又冇尹志平咁衰。”
全场大笑。
虾头：“𠮶个系尹志平呀！你乜嘢郭靖呢？”
全场继续大笑。
虾头：“（小龙女）个守宫砂，个朱砂痣，就系畀咗佢。”
全场笑到近乎失控。
虾头：“所以我今次嘅‘演技守宫砂’，我就要畀锦程！”
锦程：“？！”
何故：“但系（导演）海潮呢？咁海潮点啊？”
虾头：“劲就劲在，‘守宫砂’系有两粒嘅！左手一粒，右手一粒，海潮同佢（锦程）系夹攻㗎！”
锦程：“夹攻起上嚟，就系全身都系朱砂痣…”
虾头（对锦程）：“你走啦你！哈哈哈哈哈哈…”
全场（工作人员，连同等待访问的记者们）随虾头一起笑到崩溃。
虾头（正经）：“佢每次提炼我一次演技，我一粒朱砂痣就会离开，咁所以…”
虾头忍不住又笑了。
锦程：“手臂（上的守宫砂or朱砂痣）冇咗好多㗎喇！”
虾头：“所以，就趁呢个机会，嗱嗱临过啲真气畀我，令我演技有所提升啦！如果唔系，做嚟做去都系咁样，我都唔想啦！”
锦程：“其实已经有好大嘅提升，好大嘅突破。”
何故：“今次有乜嘢突破？上次歌又唱埋喇，难道今次要扮机械人？变魔术？”
虾头：“其实呢，我今次都有一个机械人角色嘅…”
何故：“真系？”
虾头：“点都要做吓机械人嘅。”
何故：“唔好！妳呢个‘机械人’，要唔系机械人嘅‘机械人’。”
虾头：“咦？未谂过㖞！谂吓先！仲有时间。（停顿，认真思考了一会）上次有好多楝笃笑嘅元素，今次唔系咁样嘅，喂！我施展浑身解数嘅𠮶啲梗系会啦！唱歌跳舞呀，演戏乜乜乜呀，同观众互动呀，呢啲唔可以冇啦！”
锦程：“你有冇见过一个show，有一个机械人系唔郁嘅呢？”
虾头大笑。
锦程：“一个机械人唔郁，但系要观众笑嘅，睇吓可以几耐？”
虾头：“呢啲咪系演技大挑战啰！”
※
上次《独脚丝打噏の难道停经才去爱》，虾头破格演出，和观众一齐探索“最真実的杨诗敏”，虾头强调今次《难道手机冇电才去爱？！》想回归“最纯粹的表演”，而当中的“爱”，其实是“爱自己”。
虾头：“‘爱自己’唔系一个口号，而系一个过程，要点样揾到‘爱自己’嘅一个过程，呢个先至系我想讲嘅𠮶种‘爱’。”
锦程：“好多人都唔识得‘爱’…最重要嘅系，人与人嘅communication，同埋connection…”
虾头：“只要重新connect自己，就可以做返一个人。”
在这个AI世代，期待“冇咗两粒守宫砂”后演技提升大突破的虾头，和我们一同“重新connect自己”，一同寻找“爱自己”的过程，一同享受充满“爱”的剧场体验！
（专栏“何故火锅馆”每星期刊出，标题由编辑撰写。本文不代表艺文格物立场。）
作者简介︱何故，内向、忧郁而文静的作家，已推出超过 20 本小说。从电影和打边炉领悟人生道理。
更多艺文评论文章，可参看作者Facebook