【逆流大叔】三十而立 棱角抹掉 自然明白的人生“10大无奈”
毕业几年，转眼间所有人都必须面对一个问题，就系迈向30岁的关口。大家经历过毕业后的新鲜感，或者毕业几年的迷茫，甚至系Quarterlife crisis，无论你是否已经顺利过渡呢啲阶段，始终都要面对呢个30岁关口。
1. 严格来讲 你已经唔再系“青年”
踏入30岁最明显会经历的一件事，就系你唔再被社会定义为青年。
唔计咩杰出青年分猪肉奖之类，好多青年特有的优惠或Privilege，在你身份证正式踏入30岁一刻突然结束，例如好多专业团体的 Young xxxxxx（职业）身份，甚至系Working Holiday计划（31岁前结束），基本上随住你踏入30岁陆陆续续就唔再关你事。
在职场上，二十几岁人犯错，往往较容易得到前辈提携与提醒，但三十岁后，基本上你自己食自己了。
2. 开始同真正的年轻人脱节
咩Snapchat同IG，你开咗后发现完全陌生，更加唔会有朋友同你玩。你唯有继续玩你的Good old Facebook / Whatsapp。 有睇“毛记”以为自己好潮？ 唔好意思，𠵱家啲细路原来更多睇韩国甚至大陆版的跑男。后生仔女听韩国歌，睇咩Running Man，你完全冇概念，Spotify Playlist仲停留喺容祖儿年代，勉强听下Ed Sheeran都已经觉得系一大挑战。据说人在25岁后，基本上唔再想听新歌，30岁左右甚至以上，更加如古老石山一样。
在某日一个无关痛痒的小时刻，就系咁样的小事，你发现自己真系唔再属于“廿几岁／20-29”呢个Demographic group。
3. …...然而 99%人距离“成功”依然好远
如果话，后生的自由与激情，系幸福感的最大驱动力，“Post-后生”的人生，接轨的大概系成功与稳定。
二十几岁时的沈旭晖，曾经在北京工作，月入2000人民币，踩住单车，“离时代远远，没人间烟火，毫无代价唱最幸福的歌”大概如此。
三十岁起，你开始有了一样嘢，可以话系人生中最为重要，呢样嘢叫做“责任”。
因为你开始有新的身份：丈夫、妻子、父亲、母亲、媳妇、女婿等等。呢啲新身份，全部都有你“应份”做的事，理应事业攀上顶峰（或起码走进上升轨道），结婚买楼安居乐业，关注点从“玩”变为各种成熟的话题，从置业到装修，摆酒到投资，然后系生儿育女与教育。虽然话做仔女一样有好多责任，但Let's face it，大部份人的父母倘如避风港，即使外面风大雨大，父母始终都会睇住你，帮你补位。
社会来讲，向来有三十而立之说。30岁，起码要买到楼啩？唔好意思，市区20年楼两房，都最少600万，你人工几多？畀得起200万首付吗？供得起每个月2万吗？
当然，更加进阶的朋友，一样有同样问题。 当你做Auditor，30岁月入7万， 但你起码都想住太古城（而非600万的残旧“上车盘”），尤其30岁已经在Child-bearing age，准备生BB的话， 最好都要3房，盛惠1500万。
好似系，无论你几努力，你都追唔到呢班愈走愈快的火车。
4. 唔止成功，距离“成熟”都仲系好遥远
成功固然冇得强求，只能尽力而为，而成熟却往往系自己选择，自己的态度问题，但我们绝大部分人而言，即使迈向30，都称唔上成熟。
或者咁讲，咩叫成熟？狭义来说，就系可以为咗肩负起“责任”而付出甚至作出牺牲。
当然唔同人有唔同责任，但绝大部份人面对都系以上所讲的家庭责任，所以起码系“修身，齐家”，理论上喺30岁左右要做好。
实际层面，点先算成熟？
月入15k，升职无望的冗员， 你会：
1) 进修增值自己
2) 做Part time 赚钱 ，定系
3) 晚晚玩“食鸡”，放假就赶住一年飞3次日本、2次泰国？
星期五晚一大班人铜锣湾食完饭，你住将军澳，过咗尾班车，你系：
1) 辛苦少少搭N车 + 转车 + 行路
2) $250 搭一程的士？
到你开始揾到下钱，月入6-7万，你会：
1) 努力储钱
2) 投资
3) 买返部 BMW 325 / ROLEX Daytona 威下?
要“成熟”，讲系好容易，但每日做大大小小决定，抵抗好多引诱，同埋好多旁人的杂音，话你知“梗系去威”甚至激将法“你系咪使唔起先”，其实唔容易。呢个，亦去到择友的问题。
5. 依然系“最佳损友”烦恼，但最Sad系你已经开始麻木
从前好朋友，随年月过去各行各路，早已见惯不怪。
但迈向30岁，你发现同事、同学甚至客户都有好多，但真正朋友——了解你、关心你的，原来少之又少。到某个位，你已经唔再Care，尤其系，相比起以上的各种现实的责任，呢个烦恼，虽然偶尔令人难过，却其实早已变得不值一提。
“愈向着青春走远，愈容易孤单，你可有发现？ ”
还记得，中学时期同Best Friend倾几个钟电话吗？如今你假如想揾人倾偈，仲有冇人系你的 Go-to person，你深知随时打过去佢都会同你倾？仲有冇你依然背得出电话号码的朋友？
假如依然有的话，请好好珍惜。
6. 事业樽颈位 vs 人生樽颈位
正如以上所讲，大部份人在三十而立之龄，其实都未真正站稳阵脚。SJ都认识一些朋友，虽然喺非常唔错的大学毕业，甚至喺海外留学归来，但接近三十岁依然浮浮沉沉，每年转工，隔年转行，而依然在Fresh Grad的职级打滚。
即使系已经成功崭露头角的朋友，例如好多到30岁月入5-10万的朋友，其实一样面对长远而言的樽颈位，再往上爬的阻力，比起几年前从Fresh Grad到今日的阻力大得多，高处不胜寒，正如市场预期腾讯/FB业绩一年又一年永无止境地向上如火箭般直线上升，始终愈来愈难。
除咗事业以外，人生何尚唔会面对樽颈？尤其30岁呢种年龄。做一个真正有承担的大人，除咗必须有事业根基，更要有魄力去为身边人打点一切，are you ready？
最简单一句，面对众多亲戚以及外面的朋友，30岁的你，已经有你父母辈的手腕去交际甚至博弈吗？当然，呢个科网年代，可能呢啲嘢根本唔重要，呢个系后话了。
7. 钱…...依然唔够
30岁左右，当你为自己户口提升至咩Premier之类而内心暗喜时，才发现好快好快你又要将大部分Hard earned money使出去了，30岁后开支一阔三大，每个月使几万，对好多人而言，可能系冇选择下的选择。
8. 时间…...依然唔够，而且强烈感觉 Time is running out
要OT的工种固然疲于奔命，但尤其在30岁起，你发现自己的Time commitment愈来愈多，家庭事业朋友进修，全部都系需要你本人的时间，读一个Master就随时系两年时间，两年后系咩光景？其实冇咩人可以肯定。
然而，愈想在人生各领域奋斗及做得更好，愈发现时间唔够用。
儿童的一天好快过去，一年却很漫长。
但大人的一日好漫长，一年却转眼过去。
大概感觉如此吧。然后到每年年底，无论系电视台的新闻回顾，定系FB上的朋友回顾，你再自己思考返，究竟呢一年自己过的怎么样？有否达成到当初的新年愿望？成日话学好日文，结果年复一年都冇Pick up返，依然流于50音多少少的基本水平。 毕竟，99.9%的人，就系被 Procrastination 夺取了所有梦想。
做任何事要成功，第一步，肯定系有“紧急感”（Sense of urgency），要做乜都好，今日就系最好的日子，冇其他选择，Do it today，呢个系唯一你可以做到任何事的Mindset。
9. 棱角抹掉 理想冷却了
呢个或者唔系人生无奈，或者系“成熟”？Well，视乎你点睇，同埋你系咩人。或者咁讲，傲气应该甩掉，但心底里的傲骨与理想的一团火，唔好畀佢熄灭。
成熟 =/= 放弃理想，同样地 坚持理想 =/= 一成不变。
呢个系一个“Balancing exercise”，但华人本质上好难做到呢种平衡游戏，非黑即白的心态，通常走往极端：一系就全身投入权贵吃喝玩乐，一系就要瞓街甚至反社会或者浪迹天涯。人生，活得好，谈何容易。
10. 再不努力 你就要老了！（更甚者，父母老了）
无论想追求什么，必须呢刻就努力，你已经唔系20几，唔系仲畀你慢慢探索的阶段了。
固然，好多人都未揾到自己条路，或者好多人都好迷茫，但真系要急起直追啦。
相信大部分人，都好想早日同父母分享人生各领域的成功喜悦，可以Properly讲一句：“阿妈，我得咗喇！”
只能说，
1) 确保父母身体健康，多督促饮食均衡 + 饮水 + 运动及作息
2) 自己更加努力了。
SJ结语
迈向30岁，唔同人有唔同感觉，有人兴奋不已，但大部份人估计都仲系有点困惑甚至无奈，可能系因为呢个社会经济环境？每人答案都好可能唔同。但可以肯定系，感受同感概呢回事，与其逃避，不如抒发出来，然后正面面对。
尤其系最近一单令人颇难过的新闻，或者亦间接地再提醒大家：人总需要勇敢生存。
希望大家多关心自己感受，多鼓励身边人，be positive。
【原文转载自StealJobs.com。StealJobs全面透露各行各业人工，工时，晋升前景，以及入行攻略，欢迎匿名提供收入资料。】
打工仔财务自由的12个等级 搭港铁、iPhone X、坐国泰都系指标？
所谓 “财务自由” 从来都系一个“相对” 的概念，视乎你自己的要求与期望。即使你成日觉得唔够钱用，但分分钟其实你已经系某程度的财务自由，只你一人未发觉！
立即下载《香港01》，紧贴公务员职位空缺、劳工处笋工推介，了解CV、面试致胜技巧！
下载网址：
https://hk01.app.link/bkbJyY5t4O
【自我增值】上司不教 错不在他？ 过于依赖当心日后变老屎忽…