离婚｜子女常变磨心 律师寄语双方避免闹上法庭：赢的永远是我们
离婚对小孩的影响深远，如果双方互相仇恨，小孩更会成为磨心。高昆峰有多年处理离婚个案经验，深明当夫妇走到离婚一步，的确难以心平气和地处理家事，“我哋除咗系律师，仲系counselor（辅导员），最困难唔系啲法例，而系客人情绪”。他认为离婚无分对错，但若不能成熟地处理，对双方及小孩的伤害难以估计，“离婚虽然唔系羞耻嘅事，但当闹上法庭，输嘅永远系双方，赢嘅永远系律师”。
摄影：罗君豪
“如果冇小朋友当然容易啲处理，但多数case都系有小朋友。”卫达仕律师事务所合伙人高昆峰（Billy）多年来见尽不少夫妻情逝，离婚时以小孩作磨心，更有不少人会在子女面前说对方坏话，“都明白两公婆好难再平静地处理家事，所以我哋除咗系律师，仲系counselor（辅导员），最困难唔系啲法例，而系客人情绪”。
母亲欲带女儿赴新加坡失败 拒让前夫见爱女作报复
“几个月前做咗个case，系个妈妈想带个女去新加坡定居，但佢哋同新加坡完全冇关系。”高昆峰指，当时家事法庭认为女方可带同女儿前往新加坡，因为她的男友身处该地，“我哋就去上诉庭，三个官都唔俾妈妈带个女去，于是妈妈好唔开心，有一段时间都唔俾爸爸喺香港见个女。”高昆峰形容，女方此举明显是报复心态，做法自私和幼稚，对小朋友伤害甚深，“父女唔见几个月好大影响，因为个女好细，会谂系咪爸爸唔要我呢？”他提醒为人家长应理性处理问题，不应被仇恨蒙蔽而影响下一代。
揾个第三方，帮两个大人沟通，有啲小朋友好细个，将来仲有十几年要一齐做决定，揾co parenting系帮到手，开个WhatsApp group，有咩就三个人喺度倾掂佢，呢个方法最快。
高昆峰指，律师不时建议调解员同场，令双方能进行理性讨论，如离婚家庭育有小孩，他便会建议双方以共同养育（co parenting）方式处理小孩问题，“揾个第三方，帮两个大人沟通，有啲小朋友好细个，将来仲有十几年要一齐做决定，揾co parenting系帮到手，开个WhatsApp group，有咩就三个人喺度倾掂佢，呢个方法最快”。
带子女离港定居必须获另一方同意
近年有不少家长希望带同子女移民，若离婚家庭其中一方需带子女离港定居，必须得到另一方同意，“要揾律师或自己写封信畀对方，对方同意，法庭先会批准，你先带得佢走”。高昆峰强调，要带子女移民并不容易，需要提供很多证明，“例如你要去英国，要解释点解去英国好过留喺香港，去到有咩安排？住边度？点生活？小朋友病咗喺𠮶边有冇人照顾？小朋友同英国有冇关系？”他举例指，一个来自日本的家长，带子女到日本定居，会较港人家长容易，“如果你要带个小朋友去日本，但一句日文都唔识，系好难会批”。
特别系一啲比较传统嘅官，佢哋觉得小朋友之间有supporting system，就算双方同意一个跟阿爸，一个跟阿妈，法庭都未必批。
“共同管养令”成新趋势
在争夺抚养权上，社会福利官会视乎小孩年纪及成熟程度，向法庭提供参考意见，“仲要睇双方收入啦、工作时间、陪小朋友嘅时间，如果唔可以亲自照顾小朋友，有冇第三方可以帮手等等”，高昆峰形容，近年法庭倾向以“共同照顾及管束权”（shared care and control）处理照顾小孩问题，“如果法庭判咗其中一方拥有抚养权，另一方就有探视权，但每一个个案嘅探视时间都唔同”。虽然法庭只会把照顾和管束权判给父母的其中一方，但共同照顾及管束权是判给父母双方的，“即系双方大约有50、50时间照顾孩子，当然要睇父母嘅背景同生活状况，如果双方都系差唔多，法庭就会倾向判共同照顾及管束权”。
有些离婚家庭不只育有一名子女，高昆峰指，法庭会把两个小孩分开的机会很微，“特别系一啲比较传统嘅官，佢哋觉得小朋友之间有supporting system，就算双方同意一个跟阿爸，一个跟阿妈，法庭都未必批”。不过，他曾处理过一个育有四名孩子的离婚家庭个案，因现实条件上，只凭一方照顾四名孩子，在空间和金钱上均不可能，“最后by agreement将佢哋分开，两个跟爸爸，两个跟妈妈，因为咁分法，小朋友都仍然有兄弟姊妹嘅成长支援”。
未婚伴侣争夺抚养权，母亲有较多优势，爸爸一定要向法庭申请争抚养权，佢先有权利，如果唔系佢就系nobody；爸爸要证明自己好过妈妈系难啲。
未婚伴侣争抚养权 女方优势较大
高昆峰形容，本港法例较为传统，若未婚伴侣争夺抚养权，母亲会有较多优势，“爸爸一定要向法庭申请，佢先有权利，如果唔系佢就系nobody；爸爸要证明自己好过妈妈系难啲”，他坦言自己并不认同这个前设，“𠵱家咩年代，有好多好锡仔女嘅爸爸，绝对不能一概而论”。值得留意的是，若男方是经济能力较好一方，虽然并不需要财产上保障女方，但对子女仍有财务支援的责任。
“有人想离婚嘅话，我会先建议佢，再倾一倾先啦，系咪真系冇得挽救？”高昆峰坦言，自己对离婚一事并不反感，“我太太都系做呢行，如果你喺段婚姻度唔开心，决心要离开，我会尊重你意愿，全力帮你争取权益”，但他坦言，近年处理的个案大多育有小孩，父母分开对孩子必然有影响，“冇小朋友就可以决断啲，有就真系要谂清楚”。对于离婚已成了都市人的平常事，高昆峰寄语他们尽量选择和解，“离婚虽然唔系羞耻嘅事，但当闹上法庭，输嘅永远系双方，赢嘅永远系律师，特别系财务问题，你花费嘅钱都系喺家庭资产度拎出嚟，不如自己settle啦”。
高昆峰指，离婚个案收费视乎案件复杂程度，最便宜约需3万元，若牵涉复杂的家族资产分配，收费可高达六至七位数字。多年来见尽离合的他，认为最荒谬的事，是离婚家庭甚少会为子女的利益而激动，“好多时如果两个家庭会好大反应嘅话，都系为咗钱，同对方成个家族打官司㖞，梗系激动啦！”