【01博客咁睇波】陪你估波（持续更新）

四年容易又欧国，唔知今届大家嘅心水又系边几队？
今次决赛周有成24队，令唔少新丁都取得入场券，佢哋会如何左右赛情？
唔讲唔觉，原来讲开球评的01博客，坐坐埋埋有一台！
呢次唔系围炉取暖喇，而系围炉取波经，就请班博客陪下大家讲波兼估波，顺便为大家深入又浅出咁，了解埋参赛国踢波以外的其他！

【2016 年 7 月 11 日更新】

2016 年欧洲国家杯终于完满结束。觉得佢实至名归又好，行运行到脚趾尾也好，都无法改变 C 朗成功带领葡萄牙喺东道主法国手中捧走冠军奖杯嘅事实（虽则佢喺 25 分钟已伤出……）唔知同人唔同命、一直喺美洲杯有精彩表现，但去到决赛先饮恨嘅美斯睇到，又有乜嘢感受？

01博评 x 01Sports 嘅估波游戏同样尘埃落定，由一直以精密分析准确预测十六强出线名单同多场赛果嘅马岳教授成为今届嘅“估波王”！虽然因为德国嘅失利，令佢喺尾段有被反超前之危，但最终仍凭住独到眼光，睇出葡萄牙战术足以捧杯嘅优势，成功喺绝大部分博客都买法国夺冠之际，押注喺葡萄牙身上，“估波王”嘅头衔绝对当之无愧！

冠军福利，不如一齐重温下呢位“估波王”喺今届欧国杯嘅精彩球评吧！

【先为不可胜 以待敌之可胜 葡萄牙有机夺冠】（2016-07-06）
【焦点之战！德意大战的悬念】（2016-07-02）
【意西大战，意大利战术克制西班牙】（2016-06-27）
【零球星意大利 反令人眼前一亮】（2016-06-14）
【法国有隐忧 皮耶救全家】（2016-06-11）

欧国杯已落幕，但其实 01博评 除咗足球，仲有大把 NBA 以至其他运动嘅精彩评论，更有唔少从文化、历史或政治角度去畅谈各运动项目或参赛国嘅有趣文章，请继续多多支持！

当然，要睇最新赛果、分析同最图文并茂嘅体育新闻及丰富资讯，就要多啲去 01Sports 嘅地头逛下哪！（按此进入）

【2016 年 7 月 9 日更新】

唔经唔觉，话咁快就嚟到决赛，由唔少人觉得表现平平、甚至“冇资格”打入决赛嘅葡萄牙，挑战今届东道主法国。又难怪嘅，之前葡军以打 5 场和 5 场嘅成绩（法定时间内），依然入到四强，自然备受质疑。不过我哋有博客就唔系咁睇，仲指出世人都误会咗葡萄牙嘅战术咁话，睇睇佢哋点讲？

【马岳：先为不可胜　以待敌之可胜　葡萄牙有机夺冠】
【世界波：葡军一队猪队友？其实只因C朗】

喺“欧洲最强”快将诞生之际，我哋今次嘅估波游戏亦同样进入白热化阶段！由于德国喺关键一战落败，令一直领先嘅马岳有机会喺最后先畀人反超前，而唯一有可能反败为胜嘅居然系……波三痴！乜波三痴唔系一直包尾㗎咩？呢条友唔系净系识讲波衫㗎咩？冇错，呢位超级球衣收藏家最初估波表现确系麻麻，但由于全世界只有佢一个喺一开始就买法国捧杯，所以亦只有佢有机会凭住估中冠军𠮶 5 分超越马教授（见下表），上演一场绝地反扑战，十足十今届一众新丁黑马令人刮目相看嘅表现！（虽然啲新丁黑马已全军覆没……）

唔知大家又系“Anyone But C朗”，还是“葡萄牙的好你不懂”？葡军对法军，你撑边队？马岳又会否临门一脚畀波三痴反超前？7 月 11 日，巴黎法兰西体育场一决雌雄！（夜得滞睇唔到的话，记住嚟 01Sports 个欧国杯专页睇返精彩回顾同分析！）

01博客估波积分排行榜：

【2016 年 7 月 6 日更新】

终于嚟到准决赛！虽则今届有唔少闷战（多谢葡萄牙），但亦有令人眼前一亮嘅精彩赛事同队伍，包括输人唔输阵嘅冰岛以及童话故事仍未终结嘅威尔斯。

【世界波：葡军一队猪队友？其实只因C朗】
【运动公社：冰岛之胜 踢英式足球踢赢英格兰】

不过讲到四强焦点对决，自然系 7 月 8 日凌晨开波嘅 德国 vs 法国。估波游戏来到尾声，依然由马岳教授领先，而且由于紧随其后嘅李声扬估攞冠军嘅克罗地亚早已出局，但马教授队德国仍然“在生”，所以李氏想反超前都唔易。反而稍为落后嘅 01Sports 同 波三痴，由于心水队伍（威尔斯同法国）仍然有机夺冠，故比其他同样拣德国嘅博客（如廖诗飏）更有机会反败为胜。

所以呢场波三痴谂都唔使谂，一定系买法国晋级，另外捧法国嘅仲有李声扬、01Sports 同撒拉夫，几乎都系较有机会追上马教授嘅博客，自然要同佢唱对台。唔知东道主法国能否延续上仗嘅气势，如佢哋所愿，终结德国嘅冠军梦？

01博客估波积分排行榜：

【2016 年 6 月 30 日更新】

2016欧国杯终于踢到八强阶段，虽然冰岛嘅童话故事值得期待，威尔斯亦愈嚟愈多捧场客，但讲到最万众瞩目嘅赛事，自然系 德国 vs 意大利！

【运动公社：冰岛之胜 踢英式足球踢赢英格兰】
【运动公社：百年实力最接近 威尔斯：到我做大佬！】

纯以往绩论，意大利绝对系德国嘅超级克星：两队对赛 33 次，德国只赢过 8 次；假如只计欧国杯呢类大型赛事（非友谊赛），德国更系 1 次都冇赢过意军！唔知今次路维又能否再度逢凶化吉，凭呢一战打破宿命？

【蔡子强写在大战前：德国从未赢过意大利！】

睇返上图班博客同体育组嘅预测，可谓德意两队各有捧场客，但值得留意嘅系马岳虽然之前明明估德国攞冠军，但呢场又买意大利晋级，系咪有啲矛盾？所以话少年你太年轻了，只要睇返之前个估波游戏积分榜，就知道佢呢场捧意大利，反而有买保险之奇效，因为不论德国最终捧杯或今场意大利晋级，都有较大机会可保持榜首位置！

不过马教授亦确实颇欣赏今届意大利嘅表现，睇睇佢点讲：
《意西大战，意大利战术克制西班牙》
《零球星意大利 反令人眼前一亮》

睇埋其他博客点分析今次嘅德国队：
《李声扬：逢凶化吉 成就路维巧威威心理》
《世界波：德国要自我救赎，靠重拾铁血意志》

【2016 年 6 月 28 日更新】

今晨两场矛盾大战，双双由较冷门嘅队伍胜出。首先系历史上第一次打入欧国决赛周嘅冰岛，虽然开波冇耐就被鹤臣爱将朗尼以 12 码先开纪录，但冰岛话咁快就凭纳拿施古臣一记门前接应成功追平，后来更反败为胜以 2：1 foul 走三狮军团，搞到鹤臣都要引咎辞职，而冰岛亦再创历史，首次杀入欧国杯八强！

【运动公社：冰岛之胜：踢英式足球踢赢英格兰】
【撒拉夫：鹤臣拣人，似你老细请人】
【廖诗飏：三狮双鹰歪十字？教你从符号睇欧国！】

至于我哋班博客都有份估嘅另一场 意大利 vs 西班牙，就由意国上下半场各入一球以 2：0 技术性击倒上届冠军，亦报咗上次决赛惨被大炒四蛋之仇！估波游戏一直由“讲波教授”马岳同自称揾到“估波必胜法”嘅财金专家李声扬叮当马头，长期并列积分榜榜首，但由于马Sir一直睇好嘅意大利今次争返啖气，所以令佢稍为领先，而同属少数估中今场赛果嘅波三痴亦凭呢场拉返近同大家嘅距离。

唔好话马后炮，不如睇睇马岳赛前点解对意军睇高一线：《意西大战，意大利战术克制西班牙》

【2016 年 6 月 27 日更新】

万众期待嘅 意大利 vs 西班牙 一战，即将喺今晚半夜 12 点开波。4 年前西班牙就因为分组赛冇放水（或“唔小心”赢咗波啦），令到意大利死里逃生，仲过关斩将杀埋入决赛，但最终都畀西班牙大炒四蛋，无缘捧杯。

今次西班牙就调返转，喺分组赛最后一场放水放过头，输俾克罗地亚，失去小组首名位置，搞到自己淘汰赛第一场就要硬撼意大利，令 4 年前欧国决赛嘅戏码提前上演。

意大利起初虽然不被睇好，但后来却以实力证明咗“平民球员”只要有默契一样可以撼赢“明星球队”嘅道理（代表作自然系“爆冷”胜比利时一役）。今晚呢场矛盾大战，大部分博客就依然睇好上届冠军，未知意国又能否再次发挥唔畀人睇死嘅精神，一报一箭之仇？

【2016 年 6 月 24 日更新】

终于嚟到淘汰赛阶段，是时候估边队最有机会捧杯了。现阶段估冠军，等于要喺未确定之后对手嘅情况下连续估中 4 场，畀估中冠军嘅博客加 5 分都好合理吧？亦有机会畀暂时落后嘅博客凭一次独到眼光追返上榜首，例如得佢一个拣法国嘅波三痴（佢啱啱落后榜首 5 分……）

睇返上图，连克罗地亚、威尔斯都有人押注，会唔会进取咗啲？但若估西法英德意，由于全部处于“死亡下线”，一样唔易押中！马岳、廖诗飏、丹尼尔拣德国，李声扬同世界波撑克罗地亚，我哋体育组 01Sports 最够姜，支持威尔斯！呢次班博客嘅心水几乎全部都唔同，到底边个眼光最准？

不如先总结下截至目前为止大家嘅估波成绩吧！

【2016 年 6 月 22 日更新】

分组赛陪你估波最后一击，虽则部分博客已预咗提前出线嘅西班牙唔会去尽，但依然冇估到佢会直头输埋，只能以次名出线，令佢淘汰赛第一场就要硬撼今届冇乜球星但依然打出水准嘅意大利，亦意味住呢两队上届成功杀入欧国杯决赛并分别成为冠亚军嘅强队，肯定有一队无法跻身八强之列，到底最后会鹿死谁手？意大利又能否一报上届被狂数四蛋之仇？

【马岳：零球星意大利　反令人眼前一亮】

趁淘汰赛未开波，不如一齐重温下班博客嘅“另类”睇波角度？

【2016 年 6 月 20 日更新】

今早 瑞士vs法国 一场，虽以 0:0 和气收场，双方携手出线（法国就踢之前已出咗线啦），但查实场波都未算太闷，上半场打唔够一半已有唔少惊险场面，尤其普巴状态回勇，射完一脚又一脚，其中一球远射更仅中横眉弹出，可惜双方都似乎欠点运气，斗至下半场虽仍有几个具威胁嘅攻势出现，但始终无法破网。

回看今次大家嘅预测，除咗马岳、李声扬同丹尼尔外，体育组嘅同事 01Sports 都顺利估中，其中李声扬 4 场已估中 3 场，果然不失其市场策略师嘅威名，睇个市同睇波一样咁准。

【李声扬：比马会更准的估波必胜法】

嚟到分组赛嘅尾声，仲有边场值得叫班博客估？唔使谂，一定系 克罗地亚 vs 西班牙！睇开波嘅球迷应已发觉，如今 D 组嘅格局，几乎系 4 年前欧国杯嘅翻版：西班牙已提前出线；最后一场又系对克罗地亚；两队只要打场“默契波”战平已足以双双出线……

不过咁，4 年前西班牙如果畀克罗地亚出线，就可以踢走同组嘅强敌意大利，诱因比今次更大，但最后都系“忍唔住”入咗一粒 foul 走对手，搞到自己总决赛要对返意国（虽则最后狂数 4 球大胜捧杯啦。）到底今年佢哋会历史重演，发挥“赢咗先算”嘅精神，还是响应克罗地亚嘅拿杰迪锡早前所讲，“和波对双方都有好处”呢？

买定离手，一班博客就估咗喇，你又会点估西班牙今次嘅决定？

【2016 年 6 月 17 日更新】

㖊晚红龙军团硬撼三狮一战，由大圣爷巴利为威记先开纪录，令唔少睇死今届英格兰状态不济嘅球迷心谂“预咗㗎啦”，到下半场鹤臣果断大胆嘅换人决定，再到一班英超球星愈战愈勇打出水准，最后成功攻破全力死守嘅敌军，峰回路转反败为胜，大家又觉得呢场波好唔好睇先？

睇返班博客同01Sports嘅预测，大部分都有惊无险地估中英格兰胜（除咗对鹤臣用人哲学非常有意见嘅撒拉夫、睇好威尔斯嘅运动公社，同买和嘅丹尼尔啦。）

下场又叫佢哋估乜好呢？一于高难度少少，6 月 20 日凌晨 3 点𠮶场 瑞士 vs 法国 如何？心水清嘅都知道，呢种波先至最难估，因为早前两场法国已攞足 6 分提早出线，所以要估呢场唔可以单睇两队实力同状态，仲要谂埋佢哋会留几多力同有乜嘢策略性考虑。最麻烦嘅系，查实瑞士一样几乎笃定可入到十六强（就算输呢场都极大机会可成为 4 队最佳第 3 名之一。）

上图可见，包括马岳、李声扬同体育组等等，今场都估开和，但就仍然冇人觉得瑞士会赢波。唔知各位球迷又会点预测？

【2016年6月15日更新】

英威大战听晚开波，仲要系香港时间 9 点就有得睇，啱晒星期五仲要返工嘅打工仔女（但 hardcore 球迷要睇埋德国对波兰就冇得讲啦。）

虽则今次英格兰领队鹤臣嘅用人哲学备受质疑，上场对俄罗斯仲要补时先嚟甩辘，临尾惨被追平，白白攞少两分，但同威尔斯相比，点计都高对手几班，加上仍需落力争出线，所以大部分博客都买佢全取 3 分，只有撒拉夫同运动公社估威尔斯有机会以弱胜强，扳倒三狮军团，未知会否如佢哋所愿爆大冷？

绝非乱估，不如睇下撒拉夫点解睇死鹤臣麾下嘅英格兰冇运行：《鹤臣拣人，似你老细请人》

睇埋运动公社点解咁睇好今年嘅红龙军团：《百年实力最接近　威尔斯：到我做大佬！》

【2016年6月14日更新】

当全世界将我睇死，我更加要争返啖气！莫讲话街外人同我哋一班博客唔睇好今届欧国杯嘅意大利，就连意大利自己国内嘅媒体都狠批佢哋呢次国家队嘅阵容可谓史上最冇眼睇。

但乜嘢青黄不接，乜嘢中场大将缺阵都系假，呢队传统劲旅依然成功凭基亚卓尼利同柏利上下半场两个靓入球，爆冷以 0:2 击败世界排名第 2 嘅比利时。当然有份助攻嘅邦路斯同简达华亦功不可没，但最抵赞嘅就肯定系意军嘅稳健后防（尤其同比利时相比啦下。）不如听下两位博客点讲呢场波：

【比利时篇】撒拉夫《胜利需要一支球队，而非十一位球星》

【意大利篇】马岳《零球星意大利　反令人眼前一亮》

嗱，睇返上次成班博客同体育组嘅预测，虽则估中嘅人数系……零！但查实大部分都估开和，可谓对意大利有一定信心，都唔算错得太离谱啦。下场我哋拣畀班博客估嘅就轮到有唔少香港粉丝嘅英格兰同威尔斯一战，唔知大家今次又会点预测？

【2016年6月12日更新】

上次开幕战果然由东道主法国旗开得胜，全取 3 分，大家要估中自然毫无难度。第二场要班博客估嘅就轮到 6 月 14 日凌晨 3 点开波嘅 比利时 vs 意大利，两队实力差距较接近，班博客嘅预测结果应该冇咁一面倒啦？

查实睇开波都知比利时世界排名早已大幅抛离意大利，亦系一致公认嘅 E 组最强队伍，所以意国虽然系上届亚军，但今次被编入“死亡之组”，莫讲话以首次名身分出线，我哋 01Sports 嘅同事直头估佢连十六强都入唔到！

不过正所谓烂船都有三斤钉，所以今场虽然全部博客都估佢赢唔到，但 9 个之中仍有 6 个买佢有力逼和有“欧洲红魔”之称嘅强劲对手。班博客对你咁有信心，迪罗斯一于带领班新力军踢场好波嚟睇下吧！

【2016年6月9日更新】

欧国仲有唔够两日就开波，呢刻焦点梗系开幕战，今届大热门之一兼东道主法国 vs 传统劲旅罗马尼亚，大家估下咁多位01博客点估？

九个博客，四个估罗马尼亚出唔到线（仲要系同组有阿尔巴尼亚嘅情况下……）。都明嘅，虽然罗马尼亚系世界杯同欧国常客，喺2000年欧国仲有超水准表现，但近年始终状态一般。

至于开幕战，也是几乎一面倒估罗马尼亚输，除咗佢：波三痴！买和。唔知会唔会众人皆醉佢独醒先？（正所谓波衫的世界你不懂！）

【欧国杯最新动态、分析及球评，尽在 01博客 x 01Sports 欧国杯专页！（按此进入）】

【2016年6月1日更新】

24 队波，16队出线，意味住今届欧国决赛周唔止新丁多，而且几乎必定有历史上初次杀入淘汰赛嘅队伍。所以今次大家都话要估边队出唔到线，仲难过估边队出到！

好喇，讲咁耐，今次有份围炉陪大家估波嘅，究竟有边位博客呢？

球评派，有马岳、丹尼尔、波三痴、运动公社；加两个足球发烧友先，就系李声扬同廖诗飏；新博客派，有新加入嘅撒拉夫同世界波；喂咪住，01 Sports（我哋专业嘅体育组同事）跑过嚟话咁好玩热闹，点解唔预佢哋一份。梗系预啦！

就系咁， 01博评 ９人估波团，成团！

当估波热身赛，以下系呢 9 个单位嘅十六强预测，正所谓队队有份，永不落空，睇下大家又 buy 唔 buy？

一如所料，法德西比系今届大热，深受博客们睇好。虽然唔少港人喜爱嘅英格兰一样有 9 票，但由于有博客觉得佢只能以最佳第三名身分出线，所以同葡萄牙一齐屈居第二。

惨被分入“死亡之组”（同其他组相比啦下）嘅意大利，唔止有两位博客估佢完全出唔到线，其余过半数都系买佢顶多以第三名出线，所以排名仲低过冰岛。

反而北爱虽然只有 3 人估佢入到十六强，但 3 个都系估佢可以首次名出线，认真有信心。

最后，同为欧国杯新丁嘅阿尔巴尼亚，虽然世界排名系 24 队中最低，但仍有两位捧场客，其中一位正系出名热爱东欧嘅李声扬。不如听听佢点睇呢队捧杯赔率有成 300 倍嘅超级冷门：《东欧新丁看点：有睡裤门神，又有兄弟相残》