狂舞派3专访｜Lokman颜卓灵受尽观塘之苦︰最搞笑有个page专闹
荣获金马奖6项提名，隔足8年终于推出续集的港产片《狂舞派3》由黄修平编剧及执导，今集颜卓灵（Cherry）和杨乐文（Lokman）继续在戏中饰演情侣，早前两人接受《香港01》访问时分享了拍摄内外的感受和趣事，更大谈对观塘的睇法。
摄影：叶志明
有冇谂过拍唔成续集？
其实《狂舞派3》隔足8年才面世，虽然导演黄修平自认手脚慢，但演员方面又有冇谂过会拍唔成续集呢？饰演Hana的颜卓灵率先回应：“冇㖞！佢（黄修平）有冇同你讲话想再拍续集？佢个语气都好firm（确实），佢系个啲我说故我在个啲人嚟，讲咗就系自己对大家嘅承诺，最近都够挑起佢条瘾话一定要拍，咁佢讲到咁firm，今集都系啦，都系因为佢上一次谢票时不断讲，所以系好相信佢一定会（拍）！”而继续饰演Dave的Lokman则表示：“我就顺其自然嘅感觉，因为导演有时就开咗个头就摆一阵，之前再蕴酿一下揾到方向再同我哋讲，我系期待嘅，但都知佢有呢个做事模式，所以都系再等下先啦咁样，慢工出细货。”
有冇试过喺观塘塞车塞到崩溃？
颜卓灵和Lokman一听到问题都大笑，颜卓灵：“成日啦！”Lokman：“唔系塞车，有时行路都崩溃，唔记得系咪《狂舞派》去完美国返嚟定咩，第2日就要系食晏时间喺观塘出现，真系有好强烈嘅对比，觉得真系有啲辛苦！”颜卓灵再补充：“以前未真正入行，好多试镜都要嚟观塘，当时眼里只有捉紧机会，成日都要喺人群穿插，好似跳舞咁，以舞步摄嚟摄去避人，更加唔可以撞到人，要快到好似流水咁，有时都会笑返自己头先喺到做乜，当大个咗再去返观塘就开始有种唔系几好嘅感觉，后来发现原来有好多人都好唔钟意观塘，最搞笑系仲有个page（专页）！大家都系苦难中have fun（作乐）！”
为咗梦想、事业去到几尽？
Lokman：“我觉得以前同朋友倾偈，朋友有句说话好影响到我，可能我哋做呢行或是艺术系比较任性，甚至乎系唔生性，但系佢话‘我将前途、以后嘅时间、所有嘢投放喺最钟意嘅嘢到，有呢个咁大嘅赌注，系咪真系任性同唔负责呢？’呢句说话对我嚟讲系好大嘅鼓舞，同时间我觉得好多嘢都系做尽咗再算啦，谂咁多都无补于事，做咗先，所有嘢都尽力做，跟住自己钟意嘅嘢做咗先。”
颜卓灵：“我觉得有时我去到好尽，但去到好尽又发觉太尽个人会hand hand地机（坏机），都要抖下，所以系一个起落嘅过程，尽过一排都要松返，抖咗一排，好似最近疫情，到好返啲又会冲啊咁样。”
点击睇更多靓相：
颜卓灵
Hair：Hugo Poon
Makeup：Winki Tsang @vinciwinki.com
Outfit：Diesel
Accessories：initial Accessory
Lokman
Hair：Leo Fan @ Chic Private I Salon
Makeup：Cori Wong @AnnieG.Chan Makeup Centre
场地：Green Tomato Limited