【金像奖】周家怡收A货奖座险惹官非 超像真仿制原来系升呢版？
今个星期日就系第38届香港电影金像奖颁奖礼举行嘅日子，最佳女配角奖争持相当激烈。入行超过20年嘅周家怡凭《无双》入围，被视为大热门之一，最近不停出席活动及接受访问，而佢嘅粉丝亦送上大礼，预祝佢可以夺奖而回，点知差啲惹上官非﹗
家怡前日喺Instagram分享一张拎住“金像奖”嘅相片，留言话感动到喊：“教我如何不爱你们呢？你们给我的这个惊喜，实在太感动！有你们的支持、鼓励与爱，我感到无比的幸福！感谢阿德导演，这个奖座太震撼人心，我衷心多谢你，我会继续努力，无论是在演戏或社会工作方面都会努力的！将爱发放出去！”
原来呢个奖系家怡嘅朋友仿照金像奖整嚟送俾佢，上面刻住“大澳猫民最佳女主角”，而且未到颁奖礼大家当然知系A货，但由于像真度太高，引起金像奖主办单位方面注意，仲话保留法律追究权利。金像奖发言人黄小姐回复《香港01》查询时表示：“之前最多系有人用张图或拎去整蛋糕，但真系整个奖座出嚟真系第一次，而且手较位同脚位其实好难做，但都整得咁似，好明显有意模仿，所以起初都好惊讶。”
【无双】周家怡再次担正唔系客串 爸爸睇完惊讶︰原来你咁多戏份
周家怡知道闯祸后，已经马上删除社交网站嘅奖座相片，并留言道歉。金像奖发言人黄小姐亦表示同家怡𠮶边洽谈咗：“知道都系粉丝一时心急送俾佢，金像奖方面都谅解唔会提告。”而且仲透露呢个奖座原来系REMIX版：“奖座将普通奖同终身成就奖Crossover，因为普通奖系黑色磨砂铜面菲林包住女神像，但呢个系金色其实终身成就奖，条菲林系抛光金色。”意外为家怡升呢。
大家对金像奖奖座印象，都系菲林围绕住单手捧起明珠嘅女神身体，但其实起初几届奖座年年唔同款式，首三届金像奖因为由唔同主办单位负责，而出现“一年一设计”奖座，例如第一届系朝上展开双臂嘅金属人、第二届系手举星球嘅男性人像、第三届以一个蓝色水晶方块放喺黑色奖座上。由第十届开始出现依家嘅女神像，而女神原型正正系参考1979年香港小姐冠军郑文雅。