【每逢大事讲故事】头摇又尾摆　赛车手菲永开turbo势要炼赢勒庞

最近国际政治圈真系非常热闹，过咗大半个月，大家都似乎已经接受咗特朗普会领导美国起码4年呢个现实。下一个会再次吸引世人目光的，就会系出年举行嘅法国大选。上星期法国共和党完成第一轮初选投票，呀史泰龙⋯⋯唔系，前总统萨科齐就冧庄失败，法国八卦杂志又少咗个狙击对象。咁除咗可以预见冇得睇佢太座、前名模布鲁妮外，仲有咩影响呢？

“共和党？全部都系共和党？”

今次要讲嘅又系共和党，不过此共不同彼共，同特朗普系一啲关系都冇嘅。前称人民运动联盟嘅共和党系法国右派中嘅最大党，同左派嘅社会党可谓二分天下，左社会右共和，讲出嚟都好有霸气。

法国选总统方法都相对简单，首轮有人赢到一半以上票数就直接开盘，但你估咁易咩，两轮投票制以来都从来没有，从来都没有～

初选就系人都可以投嘅，摆低两欧，签个字话自己认同共和党理念就得。呢种制度无可避免会令非共和党人，甚至左派选民都出动，试图左右选举结果，但同时相当鼓励选民投票，所以今次投票人数相当多。

党内初选啫，Final先叫我啦

此言差矣呀师兄。共和党今次初选胜出者非常重要，𠵱家执政党左派社会党多得奥朗德唔少，加上右翼擡头（你睇下特朗普笑得几得戚？），右派共和党胜算大增。

现任总统奥朗德民调支持率惨不忍睹，梁特任内咁多功绩，呢两个月支持率都系三十几百分点左右浮沉，奥朗德上个月民调支持度得14%，系梁振英一半呀阴功⋯⋯社会党秘书长康巴戴利斯（Jean-Christophe Cambadélis）都表明，呢个阶段社会党无论派出边个嚟选都好，都唔够右派砌。党内都有声音，希望奥朗德问霞姨攞个饭盒抖吓算啦，唔好出嚟陀衰家啦。

奥朗德民望大跌一大原因固然系处理巴黎恐袭手法，法国短时间内又再出现尼斯恐袭，法国人相当质疑奥朗德处理国防危机能力。但一直根深蒂固嘅原因系经济问题，社会党成功争取人人冇工开，失业率长期维持双位数，选民唔反弹就假啦。仲要加埋要愈行愈右，企图争取埋中间派支持，搞到两面不是人。

妈呀，好乱，边个打边个？

共和党初选有3个名要记住，分别系菲永（François Fillon），萨科齐（Nicolas Sarkozy），朱佩（Alain Juppé）。

菲永同朱佩都做过法国总理，朱佩较偏温和中间派，相比之下菲永就再右倾一啲。萨科齐就系共和党主席兼上上届总统。菲永成日都被认为系萨科齐副手，但今次大比数抛离佢前老细，原因有几。菲永拉票已经高超到可以叫做刮票，一啲无人问津嘅小城小市，佢通通唔放过。加上坚定嘅右派立场，尤其系重视经济改革方面，令佢成功挑机。最后萨科齐亦选择支持菲永。

讲吓今次最有可能出线嘅菲永，呢位62岁嘅叔叔家庭观念极重，同威尔斯籍太太Penelope结婚后，生咗5个仔女。价值观因此相对传统，反对同性婚姻以及让同性伴侣拥有领养儿童嘅权利，所以吸引一班反对同性婚姻嘅选民支持。

菲永由细到大都系住系勒芒（Le Mans），呢座城市系以一个历史悠久嘅汽车耐力赛－勒芒24小时耐力赛－而闻名，而菲永更加系热爱呢项运动。据讲佢一岁时爷爷已经带佢睇赛车，大个后年年都会参赛，头摇又尾摆咁飘移一番，手车都算几辣吓。

菲永喺战前一星期仲系望住对手萨科齐同朱佩个后栏，民调支持度一直浮浮沉沉。但好可惜，而家世界各地嘅民调变晒灯神，捧边个输边个，烧山都可以收山呀。菲永第一轮投票得票超过44%，跑赢几个身位，朱佩就以28%排第二，说好的萨科齐呢？唉，说好不提民调。

右？边度右呀，睇过？

今个星期日（27日）菲永同朱佩就会上擂台 1 on 1，赢咗果位就预计会对战“法西施”马林勒庞（Marine Le Pen），点解要咁叫佢？我唔直接答你，我用例子答你。

马林勒庞系法国极右政党国民阵线嘅大姐大，喺呢个全球右翼崛起嘅年代，佢嘅政治不正确反而令选民觉得好pure好true，系呀，摆明系反对移民、摆明系疑欧派、摆明系行民粹路线，so what？呢位法西施嘅高章之处就系佢做得唔打嘴炮。（虽然，邻国有个打嘴炮打到个天下返嚟嘅特朗普）

马林勒庞上届总统大选中屈居第三，输咗畀社会党嘅奥朗德、共和党嘅萨科齐。但马林勒庞喺废青，sorry，年轻人之间好受欢迎，但法国嘅选民点会因为受荷尔蒙欺骗而投票咁简单？

佢Daddy老勒庞（Jean-Marie Le Pen）创立国民阵线后，一直都右到不得了，着住反犹圣衣，脚踏反同彩云，啧啧啧，够晒偏激。但马林勒庞从来唔玩种族主义，对于反犹、纳粹等等议题通通敬而远之。佢要嘅系理性嘅极右主义，甚至同自己老窦都反目，将佢逐出党门。佢仲提出非移民利益优先，唔知佢有冇资格叫做法国本土派呢？

如果将法国大选现况摆返落美国个context，就好似民主党选希拉里定桑德斯先砌得赢狂人特朗普呢？政治分析师Dominique Moïsi就惊历史重演，如果共和党选出嚟嘅候选人唔够狼，就会比马林勒庞一铺清袋，法国从此瞓捩颈，越拧越右。