【每逢大事讲故事】美朝峰会之决战二世祖 一场CP值爆标的对决
今次美朝峰会嘅主角侵侵同金仔，其实大家都识啦。虽然佢地嘅成长、文化背景，可谓完全相反，但都有相似嘅地方，就大家都系吨位十足嘅富二！
要讲美帝同朝鲜，其实大家都知，离不开两件事——核弹同钱！金氏三爷孙搞来搞去咁多年，都未有同美国总统正面交手，美国对朝核亦同样束手无策。今次两位少爷仔埋身肉搏㖞，到底边个露底，做“败家仔”，飞云真系等得好心急。
讲呢两位少爷之前，先回带返些少韩战时期，因为呢个，就系朝鲜发展核武嘅嘅前传。美国扶植韩国亲美李承晚政权，当时对阵的，当然系金仔𠮶位好威武、抗日游击队出身嘅阿爷金日成。果阵朝鲜仲未有核武，1950年，6月25日，朝鲜大军在中共同苏共支持下，越过三八线，三日内占领首尔。
当朝鲜半岛打到陷陷声时，就喺太平洋另一端，纽约一户小康之家，有位得𠮶几岁嘅小朋友叫侵侵。屋企做地产嘅佢，系一位不节不扣嘅少爷仔。唔好以为下面呢个金发蓝眼嘅鬼仔系卖出奇蛋广告呀，佢就系小侵侵喇，你睇佢几天真几傻~~ 如果要用两只字形容佢嘅童年，飞云会话系beautiful同great。（飞云母语系广东话，英文词穷，sorly）
不过经历过韩战嘅朝鲜半岛就好poor，一个民族，从此分裂敌对。战后朝鲜开始向苏联取经，交换核能技术，喺1962年设立宁边核反应堆喇，养精蓄锐。与此同时，美国已经卷入另一场反共战事—越战，美军70年代节节败退，金日成𠮶下心谂“机会黎喇 飞云～”，因为越战可谓已经耗尽驻韩美军嘅元气，一于再挥军南下啦，点知毛大哥家下又唔想朝鲜统一㖞。
无左毛大哥撑腰，金日成先发现原来要嬴人，先要赢自己。“我要核核核核武！”呢个从此以后就成为金氏王朝嘅“家训”，于是往后几十年，三爷孙就一直谨遵家训，就是他朝一日，拥有属于自己嘅一颗小小嘅核弹。为左呢粒核弹，都唔知饿死左几多人了。
讲番另一边厢嘅侵侵少爷。步入60年代，侵侵已经是个高高青年人喇～老豆老母觉得佢有点反叛，于是送左佢入纽约军校等佢学下啲纪律啦，估唔到平时完全乱咁黎嘅侵侵，喺军校里面系个高材生，又钟意波，又钟意搾～～～车，仲有模型学会，摔角，保龄，瓣瓣掂，你睇下佢啲奖～
能文能武嘅侵侵，原来仲系军校里面嘅校草。虽然选总统输左Popular Vote，但当年赢左Popularity Poll㖞，被封为Ladies' Man（飞云英文麻麻地，暂译“女人的男人”）。
头先讲到美国打紧越战，其实侵侵作为军校高材生，当国家需要佢嘅时候，佢梗系，生骨刺...... 嗱人地有医生纸架，飞云唔系话佢诈病唔上战场架，真系无架。佢选总统果阵都话：“当年无参与越战，有少少guilty。”唉～真系好可惜，不过唔紧要啦，正所谓“商场如战场”，侵侵上唔到果个战场，咁就专心做好家族生意啦，之后佢咪飞黄腾达，大家都有EYE SEE啦～
讲到80年代，终于到金仔出场喇！侵侵那时事业已经如日方中，望住呢啲人生赢家，飞云就觉得自己系零。1987年，特朗普仲威到同苏联领袖戈尔巴乔夫握手，金仔果阵得𠮶三岁咋。虽然人生比侵侵迟左三十八年起步，不过金仔作为神之子，输在起跑线都追得返啦。根据朝鲜嘅教科书，佢三岁已经识驾车，开始接受射击训练，可以三秒钟射十发子弹，六岁开始骑马，九岁识驾游艇...... 呢啲咪叫人外有人，天外有天啰，侵侵碎料啦。
比起顺风顺水嘅侵侵，金仔可能知道阿爷同老豆嘅江山好辛苦打返来，佢要守业的确好艰难。三十岁未够嘅佢上台，每一步棋都真系行得好小心，头几年一直唔肯踏出国际舞台。睇番2011年𠮶阵嘅国际大环境，中国当时就黎换届，习大大都未上台；美国奥巴马似乎系个唔多友善嘅左胶，都系敌不动我不动；韩国又有个超敌意嘅女人——朴槿惠。
定啲黎！金仔于是就决定跟返阿爷老豆嘅“先军政治”，而且明显系“先安内，后攘外”，静静地专心开发核武。
上年就话成功试爆氢弹，经过多次导弹试射后，导弹射程已经覆盖美国全境。到左上年年底，金仔终于完成祖辈五十年来嘅核武大业。阿爸，我得左喇！！！今次金仔飞去新加坡见侵侵，先发现佢架专机“苍鹰一号”可能太残旧，飞咁远有危险，要问中国借飞机。佢啲导弹，原来飞得远过佢啲飞机，呢啲咪正宗嘅孝子贤孙啰。
其实今次歴史性美朝峰会之所以搞得成，系天时地利，但飞云觉得最重要系人和。侵侵做左美国总统之后，对住金仔就好似细路哥咁，互改花名，钟意斗大。终于揾到一个同我斗嘴嘅人了。（心心眼）
两个大男最钟意斗大，连粒制都要斗大，金仔话“我个核按钮已经准备好”，侵侵话“我们核按钮大过你㖞”。不过金仔都识玩，送个大信封比你，你睇侵侵个样，冧到好似收到情信咁。（心心眼X2）
侵侵，你咪得戚住呀，你以为金仔只系一只肥喽啰呀？睇返历任美国总统，从来都未有一位在任期间同朝鲜领导人会面，最接近成事嘅系克林顿，上任之后曾经谂过同金正日见面，不过谂谂下，都系唔想打一场无把握嘅杖。结果只系派左国务卿出马，卸任之后先去平壤见金正日。
跟住上场嘅小布什就话人地系邪恶轴心，净系写封信叫金正日弃核，你估你封信镶金架咩？对上𠮶位奥巴马，其实好积极想重启六方会谈，仲都有谂过同金仔见面，不过似乎经过一轮盘算后，都系觉得“姓金嘅，信唔过”！
世事嘅嘢话唔埋，上年金仔仲成个狠样咁射导弹，今年转身射个三分波，变左“亲切的金仔”。短短半年间，又参与平昌冬奥，仲见埋韩国总统文在寅，话咁快仲搞场大龙鳯，炸埋丰溪里核试验场。
沙冷嘿唷，Moon jae-in Oppa！（设计对白）
Well，如果历史系会repeat itself，侵侵就要小心了，因为朝鲜2008年都喺国际传媒见证下，炸毁宁边核反应堆冷却塔，只系2013年又重启番啫。一句到尾，你话呢个会系侵侵认真啲，定金仔认真啲？飞云觉得聪明嘅读者一定心里有数啦。而且，金仔其实绝对唔简单，系虚系实，都未睇透，侵侵今次去见金仔，系攞彩，定系冲出来七，听日就有分晓喇！