【热评】从太兴上巿看翠华股价下挫路径　毛利率逾70%咁计出嚟！

文：李声扬
太兴（6811）上市，唔少人写过。你睇到这篇文时已经截埋飞，所以唔系叫你抽唔抽嘅建议；倒系想讲下，冇耐前翠华（1314）就出盈警，讲到营运情况好恶劣。而太兴就好似越捞越掂条数靓仔上市。系咪平行时空？大家系咪讲紧同一个宇宙？两间公司定位真系咁唔同？定有其他原因？
首先搞清楚，几时上市，决定权在公司。除非十分危急，否则公司点都拣盘数靓时先上市，盈利亦都唔多唔少有啲水份。呢啲古今中外皆然，佢在暗你在明。翠华当年上市盘数都系靓仔的。

下载“香港01”App ，即睇城中热话：https://hk01.app.link/qIZYuEC5LO

翠华上巿6年3度发盈警

而翠华今次嘅盈警，绝对预计之中，公司上市6年，今次已经第3次盈警。旧年全年（三月年结）赚8000万（港纸，下同），今年头半年先得1440万，全年唔大跌就假。更唔好讲公司全盛时期一年赚成1.6亿。

但，系公司个别因素，定成个行业系咁？呢个行业大家日日接触，系顾客甚至系员工。大家都知年年加价，但舖租人工亦年年加，到底拉匀影响系点？

好彩，呢个中式连锁快餐店嘅市场，相当成熟，几间公司都上市（不过美心冇独立上市，而亦唔止做连锁快餐），透明度够晒高。睇太兴翠华之余，可以睇埋佢哋同业。

比个概念大家，讲龙头一定系大家乐（341），市值过100亿。同宗嘅细佬大快活（52），近年表现其实仲好过大佬，但讲紧未够40亿市值，仍需努力。太兴呢？视乎定价同上市后表现，大约同大快活咁上下市值。翠华？就唔好提了。高峰时有大半间大家乐咁大，近80亿。而家？10亿唔够。市值蒸发七八成。

呢个行业竞争又激烈，亦唔系有咩专利或好高科技，基本上就系优胜劣败，股价反映一切。龙头大家乐，曾经系基金爱股香港传奇，传说中嘅十倍股十年股，但近年就麻麻地，股价浮浮沉沉，甚至未必跑得赢恒指（视乎你拎咩时段）。细佬大快活反而后起之秀，好多时跑赢大佬，但近两年都系麻麻地。肯定个行业，呢两年都系麻麻地。

七成毛利率原来未计……

但，拍埋翠华度，就两间都系大幅跑赢。近5年买翠华，绝大多数位买你都系输钱。可见行业麻麻地，但个别公司股价表现就更差。

原因系乜？普通人会直觉去谂：啲嘢难食。但，间间都难食㗎啦，实在不见得股价领先嘅大快活就好食过大家乐好多，甚至我有时都未必分到边间打边间。正如米芝莲餐厅一样执笠，香港高档餐饮上市公司嘅表现亦不见得好。股东唔系食客，有冇钱赚先系重点，而不见得好食就会好赚，甚至两者系有啲矛盾嘅，冇睇《食神》咩？

之前有报道比较四间公司嘅毛利率，又系美丽的误会。讲太兴翠华毛利70%楼上，大家乐大快活就得10%多啲。不必怪责记者，好忙的，但谂下合唔合乎常识？当然写稿嘅都系照抄公司年报，而公司年报真系咁写的！但纯系因为用唔同标准，翠华太兴就只计食物成本，大家乐大快活就人工舖租之类都计埋，出嚟咪争咁远。咁都得？冇话唔得，唔同会计标准啫。咁啱太兴同翠华都系安永做核数师。

所以讲到尾，要比较，睇纯利。一拍埋去，一目了然。大家乐纯利就喺4亿几5亿几浮浮沉沉，大快活就明显好啲，反而翠华纯利就一路跌落去，同股价一致，几咁简单。

生意呢，其实普遍收入都系越做越大的，好易理解。首先年年加价（冇听过会减价），间间都系。况且一般都系扩张，多啲分店，开新品牌，甚至做收购。真系要睇核心表现就要睇平均单价呀，同店销售之类，呢度唔细讲。但收入慢慢升，就好基本，几间都做到，但又系除咗翠华，收入都原地踏步，都几大镬。

收入增长慢兼纯利跌，责任谁属？

但只系收入升唔够，有几多利钱落到去纯利先紧要。你睇纯利率，其实差不多间间都系受压，特别系近两三年，只差受压幅度几多。例如加埋价都系唔多够冚成本，人工啦（最低工资特别大影响）、租啦，而太兴居然做到纯利率升，又睇下之后点。

但真系要比较，你都见到，翠华几年间，由纯利率冠绝同类上巿公司，变成最低𠮶间。系咪嘢食成本贵咗但仲要畀好啲你食？梗系唔系（况且，畀好啲你食可以加价啫，人工舖租升？你估剩系佢升咩。

收入增长又差过人，纯利又跌得快过人，梗系有啲问题，管理层责无旁贷。之前都有报道讲过，翠华多关联交易。早两年试过贵价同大股东买工厦，又有纳空租畀大股东老婆间舖之类。有披露又有小股东举手，合法，吹唔胀。只能讲其实呢啲东西，好多上市公司都有，但搞还搞，唔好影响到条底数啰。

所以讲到尾，都系带眼识人。原来咖喱牛腩奶油猪易整（大家乐大快活一样有），人心先难测。睇咁多数字，最紧要都系估下大股东管理层信唔信得过。呢啲就唔系彼德林治式生活投资法，日日食烧味饭饮咖啡奶茶可以知道的了。

大陆人先食？

最后补多样嘢。讲起翠华股价不济，除咗闹管理层，以及话成物质素外，仲会有人讲：大陆人先食！

“大陆人先食”同纯利表现有何关系？我都唔系好知。但我留意到样嘢：呢三间公司嘅股价表现，好似同内地业务嘅比重成反比。我冇在内地食过大快活，唔讲都唔觉有，内地收入占佢5%左右。大家乐呢？我在深圳成日食，内地收入佢10%多啲。翠华呢？内地收入占佢超过30%

呢个“内地业务越多，股价越唔掂”嘅关系，照计冇乜科学根据，可能纯属巧合，定因为水土不服地大勿搏（冇打错字）竞争太大？大家乐之前亦都撤出晒华东，只剩返华南市场（再讲远啲，公司92年已经在北上广开分店，当然失败）。

太兴呢？内地都占两成几收入。不过劲在开到去沈阳，我帮衬过！好似冇见到有咩香港餐厅可以开到上东北（满记例外，但糖水舖易搞好多）。太兴亦都开到去台北，目测生意都相当好，台湾人对香港烧味茶餐厅十分受落，信义新光三越间檀岛排你几个钟。冇记错的话，大家乐大快活翠华都冇开到去台湾。似乎太兴嘅大中华定位又同其他几间唔同，又睇下之后会点。

作者为证监会持牌人士，并未持有文中提及股票。 

（文章标题由《香港01》编辑所拟。文章纯属作者意见，不代表香港01立场。）