【热评】航空公司Cut Cost无极限　乘客跟体重收费悭油真系得？

文：李声扬
有冇谂过，第时坐飞机前要磅重？甚至要跟体重收钱？
上飞机要过磅，本人都试过。喺瓦努阿图坐小型飞机，四五个人𠮶种。唔止一早要你报体重，仲慌死你讲大话，临上机前再磅多次，冇得呃。但原因主要系因为安全。小型飞机，每人报细几十磅都几系嘢。仲要安排啲乘客坐位，唔好几个肥佬坐晒一边，唔系讲笑，会坠机的。

下载“香港01”App ，即睇城中热话：https://hk01.app.link/qIZYuEC5LO

但上述情况只系磅重，并冇叫肥人畀多啲钱。事事讲求“公平”嘅香港人，有冇谂过，点解你九十磅，隔离个肥佬三百磅，但佢唔使畀多啲钱？

而家英国有档初创企业Fuel Matrix，就帮航空公司谂计。虽则机上面磅磅都系钱，但航空公司预搭客重量，仲系相当原始。就只系计男人女人平均几重（有冇人投诉歧视？），睇下班机几多男几多女，计数。顶多计埋亚洲人瘦啲美国人肥啲（又有冇人投诉？）。

因为油一定预多，你都谂到，有好大嘅改善空间。如果可以一早知道班机啲人几重，唔使靠估，咁就发达！

而家上机前咪要磅行李嘅？呢间公司做嘅，就系叫大家上机前都过磅。咁航空公司咪知道所有人几重。帮航空公司悭钱，仲可以减走无谓浪费，讲得伟大。

去到呢度，肥仔如我就心谂，哗，仲有私隐嘅？唔制！放心，唔会广播讲“XXX小姐，百二磅，下一位”咁。甚至唔会好似行李磅咁畀后面条友望到。可以整到个地勤都唔知，只系入咗电脑。又唔系坐小型飞机，航空公司要个大数啫。甚至可能唔使上磅，排队时scan就知你几重。

（本人觉得，第时再进化系，根本你坐过一次，下次未上机都一早计定大数。反正机票要实名制，断估你唔会一年肥咗五十磅）

听落，好似真系有得谂嘅。当然要教育下啲客，同埋要多一重工夫你又会觉得烦。但，人类习性可以改嘅。畀多几百蚊折扣你啰，争住去磅啦。

问过航空业朋友，佢就认为未必悭到油，有啲人钟意迟一迟先check in，真系计得切（初创公司话得）？朋友认为只系借口，根本悭唔到油，只系迟早巧立名目，多个方法向顾客收钱。我就认为，why not both？又悭到油又可以收啲肥仔钱。

绝对唔好睇少悭重量（或者计准个数）几咁重要。燃油成本一般占航空公司成本两三成。飞机上真系每一磅都系钱，航空公司无所不用其极去减磅。好多你见到嘅改变，都系同减磅有关。以下列一堆

有冇发现，而家越嚟越少in flight magazine？有啲就细本咗，薄咗，或者用啲轻啲嘅纸。明点解啦？不过Duty free本嘢就仲用靓纸，因为呢啲带到收入，而平嘅纸就可能影响你消费冲动。亦都好多公司报纸都唔派，自己用app download 落你电话／平板。冇电？贵客自理啦。同样道理，你想睇戏？自己用app download啦。拆咗部电视，又悭到钱，仲可以减少啲友投诉搲升级。

飞机餐，当然亦都缩皮。唔好以为只系因航先系咁，美资公司一早做。少粒橄榄又一年悭几万美金，汽水青柠切薄啲又返悭几万（切到灯影牛肉咁要好好刀工，点解唔直头唔要？）。另外，餐具当然变胶，餐车又系用至轻嘅。短程机索性厨房都拆埋佢，又可以整多几个位又悭磅数。

飞机设计呢？机身油漆整走佢啦，飞机櫈用轻啲薄啲啦（又可以变多一行位），甚至整无窗嘅客机，亦都同一原因。你发现成日都冇毛毯，唔系空姐收起唔益你，系真系预少咗。去到最尽？某航空公司（唔系大陆！）连救生衣都减，而有关当局居然批！当然前题系啲航线唔飞出海，香港就应该唔得了。

既然橄榄柠檬都要悭，飞机上最重系乜？梗系人啦。所以点会唔谂呢样嘢。但人唔似橄榄咁畀你话丢就丢，复杂啲。

出名服务好嘅日本人一样谂。某日本公司之前就谂，登机闸附近整多啲洗手间，然后揾啲笑容可亲嘅空姐提你记得上机前放低几两，可能仲会派糖畀你（记得洗手）。目的？每人放低些少，积少成多呀。

再尽啲？萨摩亚航空就试过真系按体重收费，话希望大家正视痴肥问题，反正我信了。但当然仲未系主流。不过好似都唔系咁多人闹㖞，证明肥仔几时都畀人歧视，冇人可怜。

唔谂客，就梗系谂自己员工，员工打你工，好多时都要就范。印度航空就真系叫啲空姐减肥，减唔到嘅停飞，甚至炒鱿。俄航一样禁啲过肥空姐飞国际线，只能留喺国内畀俄佬睇，当然最后就畀人告。比较文明嘅爱尔兰，恶名昭彰嘅瑞安航空Ryan Air都劝啲空姐减肥，但当然难好多，只能话鼓励佢地有得上公司月历（因为，着比坚尼影）。

讲咗咁多，细细粒嘅橄榄柠檬都要悭，乘客同机员体重，一定系兵家必争。初创提议嘅嘢十划未有一撇，但我倾向觉得有得搞。当然温水煮蛙，唔好太快。最初就只系要磅，唔使跟体重畀钱，甚至畀优惠你引你落搭。至少有相当大机会悭到油先。第时你惯咗，就开始玩计体重收费了。肥仔肥妹必然嘈，瘦人就会话十分公平，江湖从此就多事。

（文章标题由《香港01》编辑所拟。文章纯属作者意见，不代表《香港01》立场。）