【热评】消失的角球？　英超球迷买中无得赔　向马会追讨近5万元

（编按：英超于今年3月11日上演“车路士对水晶宫”赛事，英超官方最初指有14个角球，其后更正是15个角球，马会则依照官方最初公布的14个角球派彩。一名球迷不满马会未有依照英超最后赛果派彩，令他买中也没有奖金，日前入禀小额钱债审裁处向马会追讨48,750元奖金，案件押后至5月28日再讯。）
文：李声扬
常言话赌仔姓赖（其实系指赌徒唔肯面对现实，“性”赖），赌钱嘅，买大开细就够晒惨。咁有咩惨过买大开细？就系买大开大但冇得赔！
咩回事？一单唔起眼嘅新闻，有位球迷（或赌徒）去小额钱债审裁处，追马会钱，都成五万蚊，唔系细数目。
点解追马会？原来话马会出错，佢买中场波但冇派钱畀佢。场波系3月头一场英超，车路士主场2比1击败水晶宫。呢位球迷买咗“角球大”，即系15个角球或以上就收钱。但马会话场波得14个角球，冇派钱畀佢。

角球数字点计？

咁都得？14定15都有得拗？真系咁都得。好彩呢场唔系非洲某小国嘅联赛。 而家科技先进，仲要系全球最受欢迎嘅英超，场波有晒直播有晒录影，14个定15个角球，上庭数一次咪知咯，系咪？

首先留意一样嘢，有人问，如果完场前冇耐球证吹咗鸡，话有角球，但开𠮶队搞一大轮慢吞吞，未开到角球就吹鸡完场（球证绝对有权咁做，亦都试过咁做），咁点计？马会写得好清楚，投注项目叫“角球大细”，但入面有讲明系“合共开出的角球总数”，写到明计“开出”。正如英文版佢都讲系 Corners Taken，唔系Awarded。总之个球员开咗就计，开完个波在空中球证吹完场都计，但未开就唔计。有人话呢个唔公平，有啲外国网站系计Awarded，但马会一早讲明在先，并无唔妥。

但今次争拗唔系呢样嘢。有连登仔好用心咁重睇一次，贴返晒每一个角球出嚟，真系15个㖞，冇理由有错。肯定个15个角球全部有开到，唔使拗Awarded定Taken。唯独系有一个角球，开𠮶时镜头影咗去第度，咁可能漏咗啦。

咁都得？你心谂，马会咁大间公司，唔系整条友睇电视自己数波波咁山寨下话？事实上马会应该系有人睇住场波（否则开唔到“即时投注”，即系俗称“走地盘”）。 但，就唔使原始到揾个人数角球嘅。

马会派彩睇即时结果

重组案情后，问题就似乎出自英超赛会。不少球迷都话英超出名多盲人球证，呢场可能都系球证数漏。原来英超官方嘅赛后报告，原本都系话14个角球。 后来应该有人发现数错， 就改返做15个角球。

马会派彩，就唔使自己睇电视，系跟英超官方赛事报告嘅（聪明之举，反正人哋先系官方，有事亦唔使上身）。 咁你话，既然英超官方都改返15个，马会唔系应该照跟？ 呢度就出问题了。 我唔系帮马会（阵间会闹），但谂下实行起上嚟会点？英超官方赛事报告，赛后冇耐就会出。马会就跟呢个数字，即时派彩。咁你官方赛事报告之后先改返，马会点追返派晒钱返嚟？今次就话咁啱半夜。下次系日头嘅，你拎埋钱走埋啦，点追？

正如都有人提到，热刺前锋哈利简尼（Harry Kane）早排上诉成功，原本官方话唔系佢入嘅波都判返畀佢。但买咗“首名入球”𠮶啲当然冇得怨，只能跟当时官方报告。除非大家接受到一切嘢过晒上诉期（而我唔知有几长）先收钱咯 – 但明显绝大多数赌仔都唔会肯等几个钟甚至几日先收钱啦，系咪？

网民亦都拎返早排另一场波嚟讲，系旧年一场南韩职业联赛（韩职），全北汽车对FC光州。场波系全北赢3比1，但马会唔知做乜当咗4:1咁派错钱。有啲网友就买错但照收钱，十分开心 – 开心咗一阵。马会冇耐就发现出错，更正返系3:1，然后派咗嘅钱在户口扣返。当然你叻仔现金投注去拎咗钱嘅就追唔到你，或者你够醒目一早转走户口啲钱，都奈你唔何 – 不过你个户口会变咗负数。 咁系咪以后唔用呢个户口就追唔到你数，就真系问下法律界人士先知。

网民就拎呢场韩职嚟比，话之前马会改赛果就可以弹弓手扣返，做乜今次又唔可以事后补救？系咪输打赢要？我认为，马会的确十分核突，但两件事真系唔系同一回事。韩职，从来官方都系3:1，马会只系可能人为错误派错 – 但唔等于嚿钱系你的。即系你谂下银行唔小心转多咗钱畀你，你系咪可以拎走而银行冇权追返？梗系唔系啦

只能怪英超球证发鸡盲

今次呢场英超，打到上法庭（小额钱债审裁处啫）。我问过下法律界人士（即系， PM同律师朋友吹咗几句水，当然唔系正式法律意见），就咁表面睇嚟呢，马会应该唔使赔钱的。唔系霸道或乜，而系真系一早写明跟官方“当时”结果派彩。怪，就怪英超官方赛事报告咁求其，怪个球证发鸡盲咯。似乎又冇理由要马会上身。

揸正嚟做，就应该系咁啦，法律上我估球迷/赌徒今次应该告唔入。但又话说回头，法律还法律，成件事，畀人嘅感受系真系好不公义。喂，明明我买中㖞，做乜都冇钱赔？球迷一定会咁谂。而马会只能讲句sorry，我都唔想，怪就怪英超球证。所以成件事系不幸事件。

但如果外国，你估会点解决？我估，赌波公司会照赔钱，皆大欢喜。事实亦有赌波公司试过咁做。等于大家成日讲咩“公关灾难”，公司咪当少少钱博宣传，话畀大家知“我好大方，法例企我𠮶边我都赔畀你”，吸引多啲赌仔嚟赌，长线点都除笨有精。

但马会，应该都系睬你都有味，唔会咁做啦。点解？因为根本唔需要。马会根本唔需要“吸引你”赌。因为佢独市生意，垄断晒成个市场。2003年我亲眼见证赌波合法化，但与其话系规管，不如话系畀马会独大。而家你买外围之类当然系犯法，但即使你帮衬外国投注网站，一样系犯法的。本地信用卡都唔会畀你过到数，当然你有外国信用卡或者以前在英国开落个户口有好多钱就另计。

结论：我十分同情𠮶位买中咗都冇得赔嘅球迷/赌徒。因为摆明真系15个角球，官方最初出错，而家都改返15个。但马会有条文在手，又唔怕赶客，好可能唔理你，无得赔，实属不幸。

（文章标题由《香港01》编辑所拟。文章纯属作者意见，不代表《香港01》立场。）