【热评】如在大排档倾心事　3个原因睇杜汶泽喱骚

文：陆小菲
小菲好耐之前就系Chapman To嘅粉丝喇，当年《我和僵尸有个约会》嘅时候小菲咬住奶咀背𠮶段情深深的对白虽然而家已经烟消云散一个字都唔记得，但any肥，亚洲电视嘅事又有边个会记得吖。小菲今日想讲嘅系杜导嘅Late Night骚。

近年杜导多咗光明正大地同唔同人交恶，对头人多咗，自然揾佢拍戏嘅人就相对少咗。无去大陆拍戏，杜导就有更多时间关心香港大小事。上至开火闹人，下至开炉煮嘢食，都无失礼。唔返大陆揾人仔咪自己开戏拍，唔同老婆一样做电视咪自己开台；揾食可以有好多方法。

自己打开道门用自己拣的角度面对观众（个角度可能系影到隔离位个心口的高度）。如果系要人哋煮到埋嚟喂你食嘅人可能唔会钟意杜导，但系如果你钟意睇白手兴家做实事，你可能会钟意佢搞呢镬一星期三次嘅杜汶泽喱骚（Chapman To’s Late Show）。然而，当睇到佢地识得揾高登去搞首主题曲，PR就已经赢咗一半啦。

小菲时差，㖊日先真正第一次睇《今晚poke嘢夜唔夜》。Live唔live我真系唔在乎，电话观众有无造马我都唔介意，杜导加雪姐的火花已经可以一睇（中间阿doctor讲自己啲case出嚟𠮶度我真系唔知有无私隐问题，不过，okay I don’t mind，重点仍然系杜导度）。除咗每次个镜头影落杜导嘅时候都会影到侧边个心口之外，小菲都想讲吓3个值得睇嘅原因：

1.如果你无阿妈畀你人生教晦，不如听杜导同你谈人生

特别记得杜导讲咗句：“千奇唔好谂人哋谂啲乜”；呢句同小菲老母的教导同出一辙。讲嘢难听嘅人可能会话陈腔滥调，但其实呢啲嘢真系有心人先会袋落你个袋。事实你几时见到有明星公开接call同你倾点做人之余hardcore得嚟又真心。有边个可以唔顾形象同你倾出真性情？（well，你可能会质疑佢系做骚，但就算系伪人摆出来的萤幕伪性情，小菲都buy呢一款）呢个系小菲睇过香港近年最唔避忌嘅节目。亦应该话，杜导平时都玩开咁大，仲有啲咩要避忌？

（2）借个平台去睇香港地人生奇观

等同收音机嘅年代，打电话去电台讲心情嘅听众。不过今次唔同嘅系，由杜导用声同画去掴＿醒你。先唔好理有心事者系唔系奇人奇事（女朋友做援交系唔系三观不正都好），有雪姐奇奇怪怪咁同你提出新女性观点，再由杜导以男性角道大胆抽击嚟个对谈；TVB 大台已经唔能够做到呢种 level，ViuTV 讲性话题算系开咗大众大路的先河，但好多艺人都有自己嘅局限；要打开香港地的人生奇观，耳听八方，再用一种喺大排档同你倾心事嘅方式去打救你嘅节目免费定时出现？点计你睇完都系赚咗。

（3）是时候stand up for sth了，你唔敢企都想有人敢为你企

大胆嘅题材唔系度度都敢做。年纪细嘅话可能入世未深唔知点处理，年纪大嘅又要顾全面子唔知点面对；所以其实好多嘢都应该拎出来大胆，讲唔好再矜矜持持了。讲出嚟未必有改善，但郁埋郁埋就真系可能会病；万一自己一个收收埋埋谂埋一边就唔好啦。可能系因为好多人好多嘢佢地怕拎出嚟讲会畀人觉得废而唔敢开口，咁而家有个地方睇下世界上其他故事，做下case study 都算系自救办法；大家嘻嘻哈哈笑一场，心理压力又细返。咁就算唔打上去揾杜导尽诉心中情，都可以借听别人故事来春风得意一下畀块借镜自己吖。

最后，小菲其实都系想讲，呢种话题同风格都应该有属于自己的舞台，而杜导都找到适合嘅出口。至于日后发展系点，又或者大家趁完嘘之后发现其实都唔系咁fun都有可能。杜导鹿就捉到了，小菲等睇佢为整个香港电视show脱角。至于会唔会后劲不继？就要睇杜导嘅持久力喇，小菲当然持正面观望态度啦。

最后嘅最后，绿茶婊小菲除咗想要应征做专家级泽女郎之外，就别无它想了。

陆小菲facebook：陆小菲 Fifi Luk 与某种忧郁的声音

（文章标题由《香港01》编辑所拟。文章纯属作者意见，不代表《香港01》立场。）