【日本温泉攻略】入冬之选！关东关西中部九州 15个温泉胜地推介
去日本睇雪兼浸温泉喺冬天入面绝对系唔可以错过嘅行程之一！但系日本嘅温泉有咁多选择，到底应该点样选择最适合自己嘅温泉热地呢？呢啲温泉热地又点去？𠮶啲地方除咗浸温泉仲有边啲其他好玩嘅景点？呢篇温泉攻略比大家参考参考！
日本三大温泉
一、东京近郊：草津温泉
草津温泉系日本三大名汤之一，每年都会出现喺日本温泉排行榜上面，佢温泉嘅特色系强酸性嘅天然硫磺温泉同汤畑，据讲对治疗皮肤病、神经痛同糖尿病等都有功效；草津除咗温泉，仲拥有浓厚嘅历史味同好靓嘅自然景观。而草津温泉嘅源泉因为温度极高，所以系唔可以直接浸，会采取一种特别嘅“汤揉”方式，以揉泉水木板、歌声，配合住节奏搅动温泉水，汤畑附近嘅“热乃汤”就能够欣赏到“汤揉表演”。
泉质：酸性泉、硫磺泉。
交通：JR特急+巴士：JR上野站→ JR长野原草津口站→ 搭巴士去草津温泉；高速巴士：由新宿西口巴士站搭去草津温泉。
附近仲有咩好玩：距离东京大约三个钟车程，可以即日往返，安排一日游嘅近郊旅行；草津又近轻井泽，如果想要行outlet亦都可以顺便前往。
适合对象：去东京旅行又唔想单纯浸温泉嘅人，可以安排一日游或者两日游。
二、岐阜（近名古屋）：下吕温泉
下吕温泉拥有1000年嘅历史，佢温泉水质温和，据讲具有治疗风湿性疾病、运动器官障碍、神经嘅疗效，同时受到医学界瞩目。呢度设有好多免费嘅公共温泉同足汤，同时都有卖“汤名人汤巡手形”温泉浴票，可以喺住宿旅馆出面嘅温泉自由入浴，但仅限于其中3个地方。去嘅过程都有机会途经美浓太田、飞驒金山等等嘅站，𠮶度拥有丰富嘅自然美景、峡谷、水坝同田园等。如果系喺冬天去，盖上咗层层白雪嘅下吕会更靓！
泉质：单纯泉。
交通：巴士：由JR名古站出发直达下吕，车程大约两个半钟，但一日只得一班；JR：可以搭JR高山本线特急去下吕车站，票价会比较高；名铁＋JR：搭名古屋铁路去到总站新鹈沼，再转乘JR高山本线去下吕。
附近有啲咩好玩：距离名古屋大约两个钟车程；呢度近合掌村，由最近嘅JR站乘搭巴士只需五分钟。
适合对象：想去名古屋、合掌村嘅人，或者想体验足汤都好适合！！
三、神户兵库：有马温泉
有马温泉自古就深受皇族、贵族喜爱，被誉为日本最古老嘅温泉，地位历久不衰。佢出色嘅地方在于拥有优质嘅泉水，分为两大类“金泉”同“银泉”。“金泉”含有铁质同高度嘅盐分，呈现啡色，杀菌力强。“银泉”系无色嘅碳酸温泉，可以令肌肤柔嫩，深受女性喜爱。
泉质：金泉、银泉
交通（以大阪为主）：(1) JR 高速巴士：喺JR大阪站，搭由JR西日本巴士营运嘅高速巴士前往有马温泉；(2) 阪急高速巴士：喺阪急高速巴士总站搭高速巴士前往有马温泉。
附近仲有咩好玩：位于兵库县，距离大阪市、神户市中心约一个钟，交通便利，可以选择一日游。如果浸完温泉仲可以选择去大阪或者神户。
适合对象：想令皮肤变好、会去大阪、神户玩嘅人，安排温泉一日游超适合！
日本三大温泉街
四、东京近郊：箱根温泉
箱根温泉起源于1300年前，喺江户时代系将军专用嘅温泉地。箱根系知名观光地，所以周边设备都好完善，坐落好多温泉旅馆，除咗古色古香嘅汤本温泉街，亦有好多人会顺便拜访箱根嘅大涌谷，冬天染上一层雪嘅山坡地更加系令人流连忘返。
佢嘅温泉资源极为丰富，全座山区都称为温泉区，代表性温泉区多达17个咁多，所以有“箱根十七汤”嘅美号。好红嘅平台温泉其实都位于箱根！
泉质：单纯泉
交通：JR： 由JR新宿站搭小田急线去箱根登山线，亦都可以搭特急ROMANCECAR去箱根汤本站；高速巴士：喺新宿站西口35号巴士停靠站，搭前往由小田急高速大巴营运嘅快速巴士前往箱根。
附近仲有啲咩好玩：御殿场outlet、箱根神社、大涌谷、箱根登山缆车，如果想要将呢啲行程一次过玩哂，可以买箱根周游券，好多交通工具都会喺哂里面。
适合对象：唔想单纯浸温泉，想顺便去埋箱根附近景点嘅人，御殿场outlet都喺附近。
五、静冈（近东京）：热海温泉
呢度系日本小说里面成日出现嘅场景之一，系少数沿住海岸线发展出嚟嘅温泉街，喺行街之余仲可以欣赏海景。同时环山、环海嘅地势令佢拥有最天然嘅景色，而且喺好多日本人心目中呢座拥有住美景嘅宁静小镇，系浸温泉嘅最佳选择！呢度最出名嘅系热海七汤，分别由七座唔同嘅泉源所构成，据讲每座温泉池都有唔同嘅功效。
泉质：食盐泉
交通：可以由东京站搭东海新干线/ 特急列车/ 普通列车前往热海站，东海新干线只需要大约39分钟，但价钱会最贵；另外亦有好多人会选择机场到埗后就直接去热海。
附近仲有啲咩好玩：热海城、热海空中缆车、热海梅园、来宫神社
适合对象：想远离市区尘嚣去宁静小镇放松下嘅对象，由东京前往系比较方便嘅方式。
六、别府温泉（地狱八汤，位于九州）
别府众多温泉里面以八大地狱温泉最为著名，佢哋分别系：海地狱、鬼石坊主地狱、山地狱、灶地狱、鬼山地狱、白池地狱、血之池地狱（血池地狱）同龙卷地狱。因为温泉水成分嘅不同，呈现嘅颜色亦都唔一样，蓝、红、白等各种颜色嘅泉水，魔幻嘅景色就令人好似处于地狱一样。留意返地狱八汤以观光景点为主，并唔系真系为咗“浸温泉”。如果真系想浸温泉，别府其实都有好多特色温泉嘅选择，可以参观完地狱八汤再前往。
交通：搭JR九州横断特急到达“别府站”再转乘市巴士去，或者可以拣去北滨巴士中心、别府车站，乘周游列车一次过游尽八景。
附近仲有啲咩好玩：龟山温泉（全身被细砂覆盖嘅一种温泉方式）、地狱蒸气工房（利用温泉蒸气所煮成嘅食物）、高崎山自然动物园
适合对象：想要观赏特色温泉、去九州旅游嘅朋友。
历史性温泉
七、山形县：银山温泉
山形县系日本唯一各市町都有温泉嘅地区，有“温泉王国”嘅美誉。沿住银山川下游方向建成嘅温泉街，排列住由大约喺1910年至1930年期间建成嘅旅馆，温泉街怀旧风景亦成为咗象征日本温泉嘅风景之一。另外，因为系千与千寻里面汤婆婆嘅油屋参考原型之一，更加令呢度声名大噪。小编最推荐嘅旅游季节系冬天，因为当大雪纷飞嘅时候，成个小镇都会笼罩喺雪里面，有种浪漫唯美嘅感觉。
泉质：硫磺泉
交通：搭JR山形新干线去JR大石田站，转搭尾花泽市营巴士上山，直达银山温泉。
附近仲有啲咩好玩：山神神社、银山川、白银公园
适合对象：宫崎骏Fans，想感受落雪、浸温泉嘅浪漫氛围。
八、城崎温泉
城崎温泉出名在古色古香嘅街道景色同埋“七大外汤”，据讲每个温泉池代表住唔同运势，街上面可以见到好多唔同嘅饮汤、足汤。而呢度有住纯天然嘅风景同充满文化历史嘅怀旧氛围，著住浴衣漫步都系呢度嘅一大特色！
泉质：食盐泉
交通：京都－城崎：搭特急きのさき 嘅1、5、7号，直达城崎温泉；大阪－城崎：搭特急こうのとり 嘅1、3、5、9、13、15号，直达城崎温泉。
附近仲有啲咩好玩：城崎温泉位于关西兵库县北部，由京都或者大阪出发大约需要两到三个钟车程。附近景点有温泉寺、城崎温泉空中缆车、极乐寺。
适合对象：想一次过体验七大外汤、著住浴衣系老街上行街，前往大阪同京都嘅人。
九、道后温泉
道后温泉拥有3000年嘅历史，系日本三大古汤之一。“道后温泉本馆”系最具代表性嘅公共浴场，佢采用近代和风嘅建筑风格，3层木结构城堡式建筑，因为罕见嘅建筑形式而被列为日本重要文化遗产。同时好多人认为千与千寻嘅汤屋原形，其实系参照道后、银山等温泉建筑而打造出嚟嘅动画场景。
泉质：单纯泉等。
交通：照唔同区域，坐各线JR至JR松山站，再转乘伊予铁道由松山车站去道后温泉车站（约 20 分钟）；如果由松山机场（四国）前往，可以搭巴士去道后温泉车站。
附近仲有啲咩好玩：温泉街、石手寺、宝岩寺、松山城、道后商店街
适合对象：宫崎骏Fans，想感受古意盎然氛围，前往四国、九州嘅游客。
富士山泡汤
十、河口湖温泉
坐落喺日本象征嘅温泉地区，富士山山脚下河口湖，能够近距离咁观赏富士山同体验温泉风情，天气好嘅时候，仲可以试下喺度影逆富士山嘅美妙身影。
泉质：钠、钙、硫酸盐、氯化物泉
交通：JR新宿站→JR大月站→转搭富士急行特急→至河口湖；利用巴士轻松游富士山
附近仲有啲咩好玩：音乐盒之森美术馆、温泉街、游览船
适合对象：想边睇富士山边浸温泉嘅旅客，前往东京玩嘅人。
日本女性最爱温泉
十一、由布院温泉（九州）
由布院另一个名叫汤布院，系日本榜上有名嘅温泉之一，深受日本女性喜爱，曾经被票选为“一生一定要去一次嘅温泉乡”。呢度特别深受女性喜爱嘅原因在于泉质系无色透明，系对皮肤温和嘅单纯泉，可以令肤质光滑细腻。小编建议大家如果想去由布院，可以坐九州当地所推出嘅观光特快列车“由布院之森”，特殊嘅木材装饰，深受观光客嘅青睐。
泉质：单纯泉
交通：搭JR久大本线至由布院站落车，行10分钟左右；搭JR 由布院之森去由布院站。
附近仲有啲咩好玩：金鳞湖、童话小镇、汤之坪步道
适合对象：去九州，想体验搭特色列车嘅对象。
北海道知名温泉
十二、洞爷湖温泉
洞爷湖温泉系日本第三大温泉，温泉水量丰富，温泉旅馆数目更加荣居北海道第一位，交通胜在方便同有外国旅客专用服务，都系游客钟意去嘅原因。洞爷湖温泉区亦设有多个公共足汤，等游客可以喺浸温泉嘅同时，欣赏广阔嘅湖景。如果撞正北海道落雪，浸住好暖嘅泉水，真系一大享受！
泉质：弱食盐泉（盐化物温泉）
交通：搭JR往返札幌－函馆嘅特急列车，都会喺洞爷湖站停靠，再转搭巴士到洞爷湖温泉巴士总站，大约要两个钟；搭由道南巴士公司营运嘅巴士，往返札幌－洞爷湖，每日七班车，车程大约两个半钟。
附近仲有啲咩好玩：手/ 足汤、温泉街、湖畔步道（冬天天气太冻，所以唔会开放）
适合对象：想感受落雪、靓景、浸温泉嘅人。
十三、登别温泉
登别温泉系第一大温泉区，以地狱谷为最出名嘅特色，一行入去就会即刻闻到浓烈嘅硫磺味；大量雾气、蒸气由地面窜出嚟，加上无生命力嘅地貌就好似地狱一样。当地嘅特色产品都会以地狱作为灵感来源，所以有好多关于“鬼”嘅土产同纪念品。除咗地狱一般嘅地貌，登别温泉仲有一个知名特色，就系含有9种以上嘅泉质温泉，喺世界上相当少见，所以被称为“温泉百货公司”。
泉质：硫磺、食盐、明矾、芒硝、绿矾、铁泉、酸性铁泉、重曹泉、镭泉
交通：JR：喺JR新千岁机场站搭特急（札幌、新千岁）去JR登别站，再转巴士去登别温泉；巴士（新千岁出发）：可以搭由道南巴士所营运嘅快速机场号，直达登别温泉；巴士（札幌出发）：可以搭高速Hayabusa号，再转登别接驳巴士。
附近仲有啲咩好玩：地狱谷、大汤沼、日和山、新登别大桥、登别伊达时代村
适合对象：想一路睇靓影一路浸温泉，体验唔同泉质嘅朋友。
番外
十四、兵库（近大阪）：汤村温泉
汤村温泉已经有1150年嘅历史，中心地设有“荒汤”，开泉以嚟一直喷出温泉，温度高达摄氏98度。过往当地居民成日用高温泉水嚟煮日常所需食品，依家游客都可以感受呢种乐趣，除咗温泉蛋，仲可以煮粟米同番薯。河边嘅足汤全长有21米，受到各地游客嘅欢迎！重点系汤村温泉嘅观光措施好完善，交通都好方便，即使当日来回都好适合！
泉质：炭酸水素盐、盐化物、硫黄盐泉
交通：搭JR山阴本线去JR滨坂站，再转搭全但巴士，大约25分钟之后就可以抵达汤村温泉巴士站，另外亦都设有大阪－汤村温泉嘅路线，交通方便！
附近仲有啲咩好玩：梦千代馆、药师汤、荒汤
适合对象：钟意完善旅游设施，有计划去兵库附近玩嘅人。
十五、东京御台场：大江户温泉物语
大江户温泉物语系台场嘅天然温泉主题乐园，采用由地下1,400公尺汲取上嚟嘅泉水室内浴池，有多达13座浴池，大人细路都可以著住浴衣喺重现江户时代下町风情嘅“广小路”、“八百八町”玩返日。如果同屋企人一齐去旅行，大江户温泉物语绝对系成家人都适合嘅地方！
泉质：盐化物强盐温泉
交通：搭JR：由海鸥线“电信中心站”行去大约两分钟；由临海线“东京Teleport站”坐免费接驳巴士大约7分钟；搭巴士：喺JR滨松町站前面嘅滨松町巴士总站，搭往“东京国际展览中心”方向嘅巴士，喺“电信中心站前”落车，由“电信中心站前”行多两分钟就到！
附近仲有啲咩好玩：海滨公园、AQUA CITY、DiverCity Tokyo Plaza、Venus Fort
适合对象：想体验浸温泉，又唔想去太远，仲兼具购物、景点多重享受；全家出游嘅游客就最啱玩！
睇完系咪即刻想浸入温泉度洗涤下心灵？唔好谂啦，快啲Plan呢个冬天就出发去日本浸到饱啦！
【本文获“KKday”授权转载。】