VPET职出真我｜打机启发兴趣　IT界新丁努力自学　创业成网络顾问

有冇谂过日常打机嘅经历竟然可以启发事业嘅方向？Jason读书时因为一次同朋友打机嘅经历，意外发现自己对网络工程有兴趣，大学毕业后就入行边工作边自学，由训练生做到高级工程人员，试过到访唔同地点工作，𠵱家仲成功创业成为网络顾问。

Jason话现时多间大专院校都有开办相关职业专才教育课程，读完会对行业有基本认识，相信同学学习云端同地面基建网络知识后，将会成为十分抢手的全能型资讯科技从业员。

与同学打机须接驳多人网络　启发成为网络基建工程人员

Jason中五毕业后入读香港专业教育学院嘅高级文凭，之后再读香港城市大学嘅2年制资讯科技课程。读书期间有一次佢同同学喺学校茶水间一齐打机时，因为首次应用到网络知识，启发佢对网络嘅兴趣，“我哋得两只router（路由器），点样可以连接到大家喺同一LANs network（局域网）度倾到偈同打到机呢？同学都指住我，‘你系做呢行㗎㖞，你读呢范㗎㖞’，我就即刻Google去揾下，究竟点样可以将两只router大家一齐可以打到机咁样，所以就触发咗我去第一次实践网络知识”。

到访各类地点　负责网络基建工程

毕业后Jason顺理成章入行，成为网络基建工程人员，“Infrastructure（网络基建）都有分好多范嘅，最基本有分system（系统）或者系network（网络）”，佢考虑过后决定以网络作为发展方向。佢又话程式员同网络基建工程人员嘅最大分别在于工作地点不同，“Programmer（程式员）就会坐定啲，喺呢个office入面打code呀（写程式）、debug（除错）呀、开会呀等等”，而工程人员就有机会深入不同地点工作，真实地面对不同问题及处境。

讲到职业生涯发展，Jason话香港专业教育学院的课程比较职业导向，读完高级文凭，或大学关于资讯科技、客服或网络等相关课程后，会对资讯科技行业有基础认识，“对入行嚟讲系一个入场券”。当然，入行后都要花心机增值自己，上网睇教学同揾资源，先可以与时并进。

混合云端成大趋势　全能型网络工程人员非常吃香

Jason入行后做咗3年工程人员训练生，然后成为网络工程人员，之后再晋升为高级网络工程人员，𠵱家佢已经创业，担任公司嘅网络顾问，“入行后嘅大概6至7年，开始系分水岭，大家会去揾自己嘅职业路向。有啲人可能会出去见客人啦，有人会做In-house IT啦，又或者好似我咁创业”。

对于未来业界发展，Jason认为混合云端方案系行业大趋势，有乐观嘅发展前景。佢提醒想入行嘅青年朋友，无论喺边个范畴发展都需要保持认真嘅心态，“做边个行业都好，无论IT定唔IT都好，一个认真嘅态度都系可以帮到你嘅发展”。

事实上香港对资讯及通讯业人才需求持续增加，由2017年嘅11.6万人，预计2027年将会上升至13.1万人。现时私人机构初入职的助理网络工程师月薪介乎1.5万至3.5万元，而资讯科技总监月薪更可高达5万至11万元！为咗帮助新血入行，刚刚发表嘅2023年施政报告公布咗政府会支持职业训练局成立专注培育科技人才的特色职专学院—香港资讯科技学院，配合创新科技发展同各行业对数码转型的人才需求。

职专教育专页仲以“职出真我”为主题，鼓励学生将兴趣发展成专业，寻找属于自己嘅天地。想了解更多职专教育详情，就唔好犹豫即刻登入职专教育网页，同埋Facebook、Instagram专页。网页详细列出唔同职专教育嘅课程、行业、相关资历阶梯，一睇即知行业嘅发展前景，有需要仲可以用埋网页嘅课程搜寻功能，只要输入有兴趣嘅行业或者院校名，一Click即睇晒相关课程嘅报读资讯。

为咗令大家更加了解职专教育下学生点样打好基础再投身职场尽展所长，《香港01》请嚟几位唔同专业界别嘅朋友，除咗担任网络顾问嘅Jason，仲包括游戏公司总监、攀树员、放射师，以及升降机技术员学徒等等，分享自己学以致用嘅故事，等大家更了解各行各业发展，以及职专教育的关键作用，万勿错过。