VPET职出真我｜攀树员疫情下零基础入行　持续进修考牌获专业资历

好多同学都希望毕业后工作能学以致用，不过完成学业后投身其他行业也可以创出新天地。本身修读市场营销高级文凭课程嘅阿伟，喺朋友介绍下误打误撞加入树艺行业，成为全职攀树员。

阿伟话入行前对树艺行业完全零认识，系“白纸”一样，入行后边工作边受训考取唔同证书，最后成功获取专业资格。佢话树艺行业有唔同岗位，建议有兴趣嘅年轻人，入行前先就读相关课程接受训练同考取证书，学习基本技能和知识，咁就更易获雇主优先考虑。

树艺行业讲求专业认证　牌照愈多发展机会更大

阿伟本身喺香港专业教育学院读市场营销和网店及零售管理高级文凭，毕业后有朋友进入树艺行业，并介绍佢一齐入行，“我就觉得‘咦，几得意㖞，不如就试下啦’咁样，咁就入咗嚟呢行做”。本身对树艺毫无认识嘅阿伟形容自己好似白纸一样，令佢工作时面对唔少挑战，“入嚟呢行之前，我对树艺系完全零认识，连香港原来有人修树呢样嘢我都唔知”。

作为树艺界“白纸”嘅阿伟，入行先知成为攀树师或树艺师都需要考获特定资格，“如果你想做攀树师，或者想做树艺师，因为要上上落落唔同嘅树，咁你就要个攀树证；如果可能你系想向园艺方面发展或者树艺师，你又要读相关嘅园艺课程呀，攞返相关嘅cert（证书）啰，咁所以其实系有好多唔同嘅证书需要同值得你去攞”。

佢话资历喺树艺行业非常重要，“基本上你喺呢一行，你每多一个牌，你就有返一定嘅分数会加落去，咁雇主当然就会请你先啦。你愈多牌、愈多经验嘅话，你发展机会就更加大”。

行业零认识沟通难　边做边考牌逐步适应

唔似其他毕业时就已经有牌、可以即时开工嘅同学，阿伟需要由零开始追赶进度。佢话有部份读过职专课程嘅同学系曾经接受训练，毕业时已考取特定牌照，工作时亦已经识用部份器材，自然事半功倍。除咗学用器材，职专课程仲涵盖各种树艺知识。以职业训练局开办嘅树艺管理高级文凭为例，课程内容包括树木检验及风险评估、植物诊断等，让学生毕业后即可入行。

阿伟亦觉得，本身对树艺有基础认识嘅同行会更有安全意识，曾经读过树木相关课程嘅同学，或多或少都会分辨出边啲树比较软或脆，唔适合攀爬。当工作时出现危险情况，读过相关课程嘅同学就会知道树嘅特性，可以提醒身边的人，最重要就系提醒自己。

佢承认当初作为行业新丁曾经面对好多困难，尤其系沟通方面，“因为我对呢行系零认识，同呢一行嘅师傅有好多术语上嘅嘢好难沟通，基本上沟通就系一个最大嘅难处”。不过工作带畀阿伟唔少满足感，令佢能够克服各种问题，“呢一份工作我出到嚟做，每一日见到同遇到嘅事都好唔同，每一日都有新嘅挑战，所以其实对我嚟讲系几好玩同几充实嘅一个工作”。

做攀树员户外工作要挨得　有意入行宜先修读相关课程

虽然工作好充实亦具挑战性，阿伟话其实攀树师都唔易做，“你入得呢行，大部份嘅岗位都系户外啦，好多时都系日晒雨淋，好似做地盘工咁。最紧要就系要挨得，要肯做。不过即使你觉得日晒雨淋好辛苦嘅，其实树艺入面都有好多岗位，你可以试做一啲相对文职嘅工作”。

由零基础“白纸”至成为全职攀树师，阿伟指今时今日树艺行业陆续开始规范化，“树艺呢一行可能唔系净系得修树咁简单嘅，可能系帮一啲屋苑、一啲学校保养树木。好多唔同嘅发展机会， 系睇你自己点样揾。咁因为你系一个专业人士，喺呢个社会你会有返相应嘅保障”。佢建议有兴趣嘅年轻人，先接受训练同考取相应牌照，以便喺树艺行业发展，“讲真你迟又要考你早又要考，如果想安全同埋发展得好啲，真系读个课程会比较顺畅”。

攀树、树艺新入行起薪1.5万元　持续晋升月入可达7万元

想喺香港成为树艺师或者攀树师，其实需要取得树艺专业学会或业内机构颁授嘅资格或学历证明。一般嚟讲，刚入行嘅新人月薪大约系1.5万元，之后就会按经验同埋考获嘅资历，晋升成为树艺师或攀树师，甚至系高级树艺师同高级攀树师，月薪大约系4万至7万元。

职专教育专页仲以“职出真我”为主题，鼓励学生将兴趣发展成专业，寻找属于自己嘅天地。想了解更多职专教育详情，就唔好犹豫即刻登入职专教育网页，同埋Facebook、Instagram专页。网页详细列出唔同职专教育嘅课程、行业、相关资历阶梯，一睇即知行业嘅发展前景，有需要仲可以用埋网页嘅课程搜寻功能，只要输入有兴趣嘅行业或者院校名，一Click即睇晒相关课程嘅报读资讯。

为咗令大家更加了解职专教育下学生点样打好基础再投身职场尽展所长，《香港01》请嚟几位唔同专业界别嘅朋友，除咗攀树员阿伟，仲包括游戏公司总监、网络顾问、放射师，以及升降机技术员学徒等等，分享自己学以致用嘅故事，等大家更了解各行各业发展，以及职专教育的关键作用，万勿错过。