VPET职出真我｜兴趣变职业　打机结合编程成游戏设计总监圆梦

唔少年轻人都钟意打机，但有无可能将兴趣发展成事业？Vincent自细嘅梦想就系可以创作自己嘅游戏。因此，喺读书时期由电脑读到多媒体，再加上网自学，后来透过业界活动终成功入行，𠵱家已成为游戏设计公司创意总监。

游戏产业求才若渴，好在多间大专院校都有开办相关职业专才教育（职专教育）课程。职专课程唔单止为学生打好基础，导师亦会介绍同学入行。𠵱家Vincent亦以导师身份担任后辈嘅指路人，眼见佢哋打机都不忘学习同业嘅技术，深深感受到新生代嘅热情，深信行业发展将会愈来愈好。

政府近年大力推动创科及文化创意产业嘅发展，根据统计处数字，2021年产业为香港经济贡献咗1,248亿元，其中游戏产业兴起，带动本地相关人才培训亦愈见规模，唔少专上院校例如职业训练局（职训局）有推出游戏软件开发高级文凭，香港中文大学专业进修学院都开办电脑游戏开发高级文凭等，无论系想入行嘅学生定想在职进修嘅人士，都一定有途径学到相关知识。

Vincent要实践创作自己游戏嘅梦想其实一啲都唔容易，佢话读书时已经好想入行，但当时无专属游戏设计嘅课程。于是，就读电脑程式设计读到硕士，再读多媒体，但真正要设计游戏，好多时佢都只能靠上网揾资料自己摸索。后来Vincent参加游戏育成计划，识到业内人士了解更多行业资讯，先揾到入行门路，辗转成为游戏设计师。

游戏公司总监谈入行：修读职专课程打好基础较易入行

今时今日Vincent已经系游戏公司设计创意总监，佢话虽然网上资讯同教材好多，但新手要揾到有用资料都唔容易，好多时“揾料要用咩关键字都唔知”，所以认同系统化学习真系好重要，而且导师又会转介学生入行，“职专课程提供基础畀学生了解做游戏嘅流程、点样编写游戏系统，而家要入行真系比我以前易好多”，仲形容目前行内系老板急要“抢人才”，多过求职者赶揾工。

讲到工作前景，Vincent就话游戏设计业嘅新手，入职后一般会先负责介面设定，亦可能要负责场景设计，晋升后就会逐步负责编写游戏比较核心同系统性嘅内容。

根据政府人力资源规划委员会同职训局嘅资料，现时新入职嘅游戏设计师月薪介乎1.5万至3.5万元不等，因应佢嘅表现同经验继续发展，当晋升到高级游戏设计经理时，月薪可增加到5万至11万元，发展空间同薪酬水平都同样吸引。

加入游戏设计行业最紧要有热诚　技术不停提升需持续进修

不过Vincent都提醒返想入行嘅年青朋友，现时设计游戏已不只局限于手机游戏，仲包括虚拟实境（VR）、扩增实境（AR）甚至元宇宙，“时代不断进步紧，游戏技术、软件同硬件其实都不停提升紧”，他认为年轻人入得呢行真系随时都要学新嘢，不停接触同学习全新嘅技术，“其实系一个挑战嚟嘅，即系你要觉得遇到唔同嘅System，就要开始去自己再去学习，先可以做到吸引的游戏。”

作为游戏设计课程导师嘅Vincent认为年轻人都可以将兴趣发展成事业，“我以往教一啲学生，佢报得写游戏呢，佢自己都好钟意打机嘅，咁玩𠮶个途中唔系净系斋玩，佢仲会好自发性咁样谂个技术人哋做到，自己又会唔会可以做到呢？”，Vincent话学生在玩之余，同时吸收人哋喺技术层面同系统上嘅技术，佢好欣赏学生们嘅投入，希望可以引导学生，帮佢哋好似自己咁，透过职专课程同努力创新下，终有一日都能够做出自己嘅游戏。

职专教育最近推出全新主题“职出真我”，鼓励学生将兴趣发展成专业，发展出属于自己嘅天地。想了解更多职专教育详情，就唔好犹豫即刻登入职专教育网页，同埋Facebook、Instagram专页。网页详细列出唔同职专教育嘅课程、行业、相关资历阶梯，一睇即知行业嘅发展前景，有需要仲可以用埋网页嘅课程搜寻功能，只要输入有兴趣嘅行业或者院校名，一Click即睇晒相关课程嘅报读资讯。

为咗令大家更加了解职专教育下学生点样打好基础再投身职场尽展所长，《香港01》先后请嚟几位唔同专业界别嘅朋友，佢哋包括游戏公司总监、网络顾问、攀

树员、放射师，以及升降机技术员学徒等等，分享佢哋学以致用嘅故事，等大家更了解各行各业发展，以及职专教育的关键作用，万勿错过。