专访｜梅小惠自觉与曾伟权系完美结合：我只会记得佢嘅好

梅小惠虽已退居幕后多年，日前她为其监制的节目《双祥见》接受访问时，由事业到爱情无所不谈，招牌笑声依旧感染力十足。提及人生至今的唯一的恋情时，没有丝毫怨恨，她说：“(曾伟权(权权)系我人生中系好重要一页，唔会淡忘，就算离开咗，记忆依然系有，下一个无可能再似权权。”

30几岁先离开温室

与曾伟权分手后，梅小惠一直单身至今，难免会令人联想是否伤得太深，但她说当年分手后，工作未有停过，及至后来从事市场推广顾问和广告设计，见识愈多，才发现其实单身也是个不错的选择，她开玩笑指自己其实条件唔错，故身边一直不乏追求者，只是一直没有遇到啱feel。“你问我想唔想有伴侣喺身边？我一定想，年龄大就更应该要有，但我一切随缘，亦好习惯现状，因为我有好多朋友。以前太过温室，唔知食饭原来可以配酒或者点蜡烛搞气氛，真正村妹一个，到30几岁先知乜系life style、40岁先学滑水，以前无论系权权、屋企或者TVB，我都系生活喺佢哋保护罩之中，直到自己走出嚟，原来系享受，亦都唔惊，咁我都系行咗出嚟15年左右啫，仲可以行多阵嘅。”小惠说在兄弟姊姊当中，只剩自己未婚，但或许是见她活得开心自在，所以家中从未催婚。“时机过咗就无谓后悔或怀缅，我生唔到可以领养。有啲时刻出现就要珍惜，就好当年离开TVB，令我认知到自己原来系有用嘅人，亦比人得到更多机会。”

只会记得佢嘅好

小惠说当年与权权拍拖13年，其实与结婚无异，虽然结局并不完美，但对方永是她人生中最重要的一页。“我同权权嘅结合系好完美，我嘅初恋系佢，所以会好focus佢，而佢亦要承担住一个21岁的靓妹仔，压力好大。而后来我嘅事业一直上，佢亦都会有压力，分开时，唔好话净系我有伤害，佢都有。权权系我人生中系好重要一页，唔会淡忘，就算离开咗，记忆依然系有，事实上我哋真系一齐13年，我只会记得佢嘅好，下一个无可能再似权权，我只会更小心处理点同人相处，唔一定要求对方要照顾我，反而想对方有个人见解、能力。以为会为将来而公一份婆一份，但如今我已有了将来，所以另一半都好应该都有。”小惠仍记得分手当晚，她曾致电三家姐，翌日将所十多箱行李搬到对方屋企后，对方已经为她准备好房间。“成件事我都无喊，系直到我收工返去，见到所有嘢喺房unpack晒时，即时喊咗出嚟，原来好多人好锡自己，同自己讲要为佢哋自强。”

原来缘尽了

小惠庆幸当年除工作外，两位挚友阮兆祥、江欣燕陪自己丧买、丧食，用半年时间走出伤痛。“有时驾车经过一啲地方都会谂起同佢一齐去过，但庆幸有工作、家人照顾令我易啲抽离。不过呢啲都系人生经历，当你回望时，能够淡然一笑，其实已经好幸运，因为无咗任何傻事或坏事。”对于家姐梅小青一直在工作上与权权合作，小惠认为是好演员就应重用，并没有因为二人的过去而存有介蒂。“我好相信缘份，以前我去买𩠌，佢去打波，可能都会喺停车场撞见，但完咗就真系连车都无见过。”

对于爱情，小惠依然相信，但不强求，为了未知何时完结的单身生活，除了定期检查身体之外，亦多运动、食维他命，生病了第一时间到家姐屋企投宿，尽量做不令家人担心。“大家姐（梅小青）要求我哋要有瓦遮头，好在自己亦都做到，其实就算无，都可以去家姐千呎豪宅，佢点都有间房比我，我全家都好团结，边个有事都会帮。”问到小惠自觉是单身贵族抑或黄金盛女，招牌马笑声再次响起后，她说：“我只系可以话你知我未去到独居老人！”

化妆：江中平化妆室

发型：Victor Liang by St. Private i Salon

场地：鹰金库夹万贵宾室