【入住请敲门4】林婷探灵撞邪吓到喊　莫竣名：佢今次癫过跳掣

ViuTV灵异探险节目《入住请敲门》成功制造不少话题，拍到第三季，除两位开国功臣──　莫竣名（MCM）、林婷终于合体一齐探灵，并加入MIRROR成员Anson Lo（卢瀚霆）以及Stanley（邱士缙）。
经历过第一、二季嘅“训练”，以为林婷已经无有怕，甚至连素有沙胆哥之称嘅莫竣名都不禁要讲声“佩服”，但林婷就话今次终于初尝“connected”感觉，仲因而吓到眼泛泪光（佢坚持唔系喊）。

《入住请敲门》再次添食，过往分开拍摄嘅莫竣名同林婷终于合体，二人在出发前都特别兴奋，林婷笑言终于可以看看莫竣名是否如此大胆，而莫竣名就话：“佢今次仲夸张过大马𠮶次，好似跳咗掣咁。好多都市传说佢都自己玩晒，喺旁边见到佢吓亲我都好开心……”林婷首站去到台湾桃园荒废旅馆，为挑战“一个人的捉迷藏”都市传说时，独自留在伸手不见五指嘅房间，她笑言当时只能够唱歌、同自己讲嘢消耗时间，但就在拍摄前夕，突然吹起一阵大风，在场食花生嘅莫竣名亦亲自见证：“啲房门suppose锁死咗，但𠮶阵风令房门闩咗，好大咁啪一声，佢叫好到大声，我当下系笑咗，但最好笑系佢仲肯继续拍，一定系上咗身啦。”

由于今次主持人数增多，所以玩起都市传说时都特别“热闹”，莫竣名、林婷、与Stanley在台湾入住靠近殡仪馆的酒店，由于曾有住客在酒店遇上难以解释的现象，为此，几位主持进行“纸牌仙”。莫竣名表示一开始，自己所抽到的牌均为“不肯定”，直到林婷出手……“我问有无打扰佢哋，结果张牌系yes，再问佢哋可唔可以比我哋走时，抽到张牌系no，真系手都震。我哋第一个反应系要道歉、洒盐 、烧牌去结束呢个游戏。𠮶次系唯一我觉得connect到，师傅话暗房本身两位小朋友，自己𠮶晚都瞓得好差。”

由台湾直飞日本后，林婷由于感到头重重，于是大胆问师傅“有无嘢跟住”，眼见师傅答得十分婉转，深知出事。“佢死都唔讲跟边个，我就话佢知我头好重，但又唔系感冒，佢先讲话我有啲邪气喺身，然后烧咗三杯符水俾我饮，饮完之后我又真系精神返。”饮符水只系驱走邪气，但不代表无事发生。因为去到京都之后，林婷玩与莫竣名、Anson Lo在温泉酒店地库宴会厅“巡逻”时，耳边突然传来一把带有警告意味的男性声音。“我真系呆咗，即刻问Anson听唔听到，但佢嘅反应话我知得我一个听到。自己冷静咗几分钟之后，先够胆同佢哋讲发生咩事，今次系好实在咁听到。”

经历过三季嘅拍摄，莫竣名继续“见／听唔到任何奇怪嘢”，反观林婷喺台湾connected后，开始知道是什么一回事，她说：“可能以前唔知系呢种感觉，但今次拍完返香港去到某啲位，就知咩事。有次去将军澳一个办公室，一入去阵味同喺日本／台湾灵异点啲味一样，同行朋友都feel到话有嘢，估唔到自己竟然会有呢个功能。”呢种开窍，到底系好事定坏事？