【入住请敲门】与林婷合体再挑战撞鬼酒店　莫竣名：今次有新形式

由莫竣名同林婷主持嘅ViuTV节目《入住请敲门》深受观众欢迎，由于第一、二季先后去过泰国、马来西亚等出名猛鬼嘅国家，连莫竣名都担心已经无嘢好拍，但灵探点同鬼怪嘅嘢真系数极都仲有，所以新一辑《入住》又嚟喇，节目更顺应网民嘅要求，安排莫竣名同林婷一齐出击，并且加入MIRROR成员邱士缙(Stanely)同卢瀚霆(Anson)，地点虽然系第一季去过嘅日本同台湾，但据知4位主持人将会走访台中、嘉义、新竹之后再转战日本关西，而集数亦预计由过往嘅10集加码至15集！

身在台中嘅林婷接返《香港01》访问时，透露今次拍摄需时一个多月，由于过往同莫竣名都系分开探险，所以难得合体感觉十分新鲜：“今次都系继续入住唔同嘅酒店，但都会有灵探点，不过观众就唔使净系再睇我同莫竣名嘅睡相，因为多咗Stanely同Anson，哈哈！”集数加码，问到薪酬是否同样加码，林婷就表示“满意”。而被网友封为“沙胆哥”嘅莫竣名，就表示今次将会以另一种形式探灵，但至于系乜形式，佢就监制未有同佢交代：“唔系唔想讲，系我自己都唔知！哈哈！佢哋净系话而家系拍紧《入住4》，但点解无咗《入住3》？一个谜，不过应该都系gimmick。”

节目虽然开拍才一星期，不过林婷前晚开live时就透露已经遇到“怪事”:“有幕系我check房时，突然间有人好大声嘭一声拍门，我成个人弹起咗，开头以为系MCM(莫竣名)，点知出房唔见有人，我开头都唔惊，因为一直都以为系佢，点知到而家佢都否认，所以就开始识惊，又唔系好灵异，系惊嘅经历。”