【全职没女】女神陈滢拍拖好慢热　色诱张振朗：成件事错晒　 　

最近TVB《全职没女》出街，为一众宅男提供了狗冲返屋企坐定定睇住电视食饭的理由，之唔系有陈滢啰！她在戏中连番色诱张振朗，不单止用尽发电厂的能源放电，更有多个湿身、生擒对方的挑逗画面，相信一众男士除了看得㷫烚烚，还会咬牙切齿，脑内疯狂OS：“点解我唔系张振朗？”、“如果我系张振朗，我就！”好了，不要再FF。总而言之，陈滢在女神行列又占了一席地位，欲向神台位进发，难怪Google最近都有她的名字出现，看大家对她有多念念不忘啊！

虽然大家看陈滢主动出撃，相当振奋人心，但原来陈滢与张振朗最初互不过电，做过多个亲密场口之后，发觉彼此都有强烈的距离感：“我同佢（张振朗）都系好慢热嘅人，啱啱开始大家都唔系好愿讲嘢，又或者倾偈都系得两句，问下对方咩星座咁，好快就冇咗话题。但系见面第二次就要拍亲密戏，要锡咁。拍完就发现大家系完全冇feel，好冇火花，成件事系错晒。”事后两人就恶补关系，约出街食饭倾倾偈，最起码了解对方的想法，到最后再拍亲热戏，做到彼此有爱的感觉，陈滢都好开心：“因为最初大家唔想同对方沟通，到后来做到剧本讲到深爱对方嘅效果，真系好满足。”

剧中陈滢对张振朗主动出撃，现实中，女神坦言自己极度被动又慢热，唯一一次追男仔就在中学时，还要是初恋。陈滢忆述这段追仔过程，还是有点娇羞：“之前喺加拿大，正值喺冬天，咁我就借啲意同佢讲：‘好冻吖！’，之后佢就畀只手我取暖，咁就一齐咗。”陈滢表示人越大就越变得被动，以前拍拖都会做些轻狂事：“当时同男朋友出街，都冇咩好做。眼前见到一个楼高两层但未封顶嘅独立屋地盘，就同我男朋友打赌。我就好大胆咁走上去，因为未封顶，上到去个空间又好细，楼下又有好多木条咁。如果一唔小心跌落去，就会被啲木条插亲。”好彩咩事都冇，如果唔系，世上又少咗个女神。

《全职没女》出街，陈滢又再度成为热话，观众大赞陈滢好正。不过当事人就觉得自己似没女多啲：“喺我眼中，没女唔系指冇样、冇钱同冇学历。我谂没女系少一份上进心，同埋会好懒。我自己就好懒，喺仪容上，我试过成个星期都冇洗过头。有一次返去加拿大揾屋企人，两个星期入面又剩系洗两三次头。因为我头发好多，吹头都要用成个钟，加上发质又干，所以会偷鸡唔洗头。如果你见到我冇扎头发，就有洗头；如果冇，咁你就明啦......”好在，做访问当日，陈滢系有洗头嘅。

讲到女神，陈滢当然唔会认，佢对自己要求甚高。“好多人讲起女神，大家都系从个外表出发，但有好多嘢都唔能够由外表观察得到。最紧要就系有内涵，当你讲嘢嘅行为举止，畀人觉得你有内在，咁先称得上系女神。”咦，陈滢除了有精致的面孔，又有学历兼浸过咸水，女神呢个称呼，应该冇人异议啦？