胡枫将拍《小生去旅行3》　Joe Junior疑被飞：或者冇我份

无线旅游节目《小生去旅行》系列，2013年版由胡枫、谢贤及Joe Junior的三个小生主持，虽然几位小生实际年龄全是爷爷辈，但修哥、四哥经常互窒，竟然产生化学反应，笑到碌地，由于口碑不俗，在2015年加入曾江，开拍《四个小生去旅行》，但当时却闹出了小风波，有指曾江在游莫斯科期间，意外受伤要坐轮椅拍摄，四哥却有感对方“扮嘢”，其后更在宣传记招上发生掌掴事件，究竟四哥跟曾江真的不和，还是节目宣传技俩，至今仍是一个谜。

近日修哥称会再开拍《小生去旅行》，但却避谈是三个小生还是四个小生，无线似乎有意更换主持。修哥接受《香港01》记者访问，被问到开拍《小生去旅行3》，他表示：“系有咁嘅意思，但小生系边一位？佢哋又度紧，大家啲期要就，暂时仲未知边个得。”两辑《小生去旅行》，共去了土耳其、西班牙、葡萄牙及莫斯科等多个地方，那么再开拍节目，修哥又有否心水之选？他说：“去边都无所谓，最紧要风景靓，听闻东欧风景都几靓。(你可以建议制作部门？)咁又唔使，我都系最紧要有得玩啫。”

自从节目记招发生掌掴事件，四哥及曾江恐怕再难合作？修哥笑说：“你以为佢哋好唔愉快咩？哈哈哈。”但却未有回应四哥及曾江会否加入拍摄。有网民提议可加入刘江及周骢，顶替四哥及曾江，修哥表示：“在我嚟讲，同边个一齐都咁开心嘅，不过我谂周骢就唔会去㗎啦。(因为拍摄好辛苦？) 唔辛苦，真情系豪华旅行团，大家都唔知几舒服。周骢呢佢要顾住太太嘅，佢去嘅成份都唔系咁高，佢好锡太太嘅。至于刘江？睇吓公司点安排啦。”

另外在节目中，年纪最轻只有69岁的Joe Junior，经常处于下靶位，被几位老大哥“虾”，被问到会否接拍《小生去旅行3》？他表示：“我未收到通知㖞。其实拍嘅时候一啲都唔辛苦，好好玩，好开心嘅，同𠮶几位哥哥一齐，可以话领教到好多经验、笑话，佢哋啲故事系好好听嘅。同埋我梗系钟意拍啦，但好多嘢唔系我话事㗎嘛，顺其自然啦。”

节目中修哥是铁胆，而Joe Junior跟修哥亦最啱key，他表示：“四个小生去旅行呢，我就同修哥最friend嘅，成日见到，因为我哋都系无线㗎嘛。”修哥有否提起开拍节目？“最近白花油90周年都有请我哋去食饭，佢坐我隔篱㗎，佢都冇同我提过，或者今次冇我份？因为有咁多好嘅小生，咁多叻人。”上次四哥跟曾江发生不愉快事件，是否因而要换人呢？“呢样我就唔知咁多，件事就发生咗。系我心里面，永远都系以和为贵，凡事有商量，唔啱倾到啱，一齐去睇呢个世界、去开心。”Joe Junior表示上次拍摄预早几个月通知他，“如果修哥知道，我仲未知，可能我冇份呢？不过我去唔去都咁开心，最紧要tvb呢个节目多啲人睇。”其实节目还在筹备之中，或者工作人员仍未赶及通知Joe Junior，始终原班人马最有火花。