逆天奇案｜林熹瞳拍到咳血　唔怕人工低恨入TVB：做到演员系无价

TVB剧集《逆天奇案》最新单元故事“消失的子弹”讲到阿芝（林熹瞳饰）惨被大坤（王俊棠饰）强奸，但她因为被对方威胁，不敢向男友李世华（黄嘉乐饰）讲出真相，之后有一次她趁大坤饮醉酒，枪杀对方。阿芝向Nic Sir（黄智贤饰）剖白一切，当中她讲述自己被强奸及探监的戏份相当催泪，更有不少网民大赞林熹瞳（Rachel）表现出色！Rachel在接受《香港01》访问时都表示好多谢观众支持：“我睇网民的评论都激动感动到眼湿湿，知道自己真系好钟意演戏，因为已经有差不多两年冇拍过戏，差啲想迫自己放弃梦想。”

饰演阿芝的林熹瞳（Rachel）因为主持灵异节目《怪谈》而为人熟悉，被观众称为“怪谈女”，今次首度参演TVB剧集，Rachel直言好紧张自己的表现：“主要是刘家豪总监制给予的机会，他之前有睇过我一套自编自演的电影而认识。拍摄嘅时候，因为我九成都系喊戏，导演要求都好高，每一个喊，都要有唔同层次。好感恩今次都遇到好对手黄嘉乐，仲有一个好角色。印象最深刻就系因为开机前，啱啱咳血入院，块面肿得好犀利，但我嘅戏份横跨了三四个月，所以块面由肿拍到唔肿，自己睇返电视都觉得好搞笑。”

剧中Rachel有一场被强奸的戏份，她笑言拍摄时大感尴尬：“因为系第一次拍，有好多唔同嘅想像，好在冇我想像中咁恐怖，最后都好顺利地完成。（会唔会抗拒拍呢啲戏？）其实都ok，因为知道TVB嘅尺度比较严格，我应该都接受到。拍强奸戏原来都系分开嚟拍嘅，完全冇𠮶啲演员趴喺上面点点点，冇𠮶啲尴尬位，所以我都拍得舒服，纯粹系靠戏咁样，咁我觉得都系可以接受嘅，仲要最终都惊啲尺度太大胆，连脚𠮶啲挣扎都cut埋，所以我都好放心。”

现年36岁的Rachel不但身兼主持同演员，更曾担任监制及编剧，她曾凭自编自演的电影《我们停战吧！》在多个国际电影节中夺得最佳女主角，但这位影后级人马反而想在电视圈一展所长：“因为电影好容易一套完了，唔知几时先有下一套，除非大收旺场先可以提升到人气，否则好难接着不停有工开，唔识人人哋又唔会揾你，所以有一个多人睇嘅平台对演员嘅曝光好重要，就算Ready好都要有人赏识先有机会，始终电视入屋啲。”

Rachel更直言好想加入TVB：“我嘅梦想系做演员，有一个平台可以畀自己不停去演戏系我梦寐以求嘅事，可以好好磨练下自己。但之前除了HKTV外，都冇固定签畀边间电视台，所以都好珍惜今次同TVB合作嘅机会，希望可以参与更多TVB的拍摄，有得签约当然好！（担唔担心人工低？）冇谂offer的问题，因为我平时主要收入系写剧本同做自己制作的事。入TVB，做到演员系梦想、系无价，呢啲真系入到去TVB先算！而且我相信只要系好演员，都有责任把每个角色演好，价钱同点签法最终交畀经理人决定，应该会有得倾啩。”