逆天奇案｜阿旦邓洢玲客串跳艳舞　未考虑签TVB：而家自由度几大

在TVB新剧《逆天奇案》中饰演电脑黑客Ana的冯盈盈，每次出场都以性感造型上阵，大骚好身材。在昨晚（12日）播出的一集中，Ana与细魏生（陈少邦饰）去到一间酒吧，期间有一位靓女在细魏生面前大跳艳舞，一时拨头发，一时趴低，成功吸引细魏生关注，不少观众都认出她就是邓洢玲（阿旦），更大赞她比冯盈盈更加抢镜！

重温性感演出：

虽然阿旦出场只有短短几分钟，但她在接受《香港01》访问时就透露为了这场戏做足准备：“唔好睇我眼神好似好锐利，其实我系唔识跳呢啲sexy dance，我仲因为呢组剧去排咗只舞添。同剧啲演员全部都好nice嘅，我有个friend仲特登过嚟，佢有跳舞底子，佢就帮我睇一睇，执一执我啲舞啰。因为我又有啲怕丑，好好呀佢哋，同埋虽然系𠮶几个shot啦，见唔到我真系跳舞，但系𠮶日拍嘅时候系有播歌，真系跳成只舞嘅，分几钟，跟住佢就拣咗某啲啱用嘅shot咁啰。”

剧中阿旦被细魏生𥄫实并问道：“系咪真㗎？”而阿旦就答道：“梗系真啦，如假包换。”阿旦过往经常因为傲人身材而受到关注，但她就直言自己曾经好抗拒：“我以前都真系会㗎，以前以往有好多唔同角色可能都系要求性感，跟住我又好惊被定型啦，所以以前细个都miss咗好多唔同嘅机会。而家谂返转头我觉得冇所谓嘅，最紧要系自己做嘅时候觉得ok啦，舒服啦，出嚟效果系靓，同埋如果真系角色需要我觉得系可以接受嘅。”

在17岁开始做杂志模特儿的阿旦，是初代𡃁模之一，近年因为担任ViuTV节目《晚吹-啪啪声，太好听》主持成功令知名度大增，不过她在2017年就完约，回复自由身，更曾亮相由田蕊妮主持的节目《女人四十》，当时都掀起网民热烈讨论。今次客串拍剧，阿旦就透露全靠导演牵线：“其实已经系1年半前拍㗎喇...当时已经完晒ViuTV约，咁啱导演问我有冇兴趣客串，拍剧拍戏even舞台剧呢啲我全部都有兴趣㗎，睇下系咩角色啰。（会唔会考虑签TVB？）再睇下情况系点啦，因为其实而家做Freelance嘅自由度都几大，都几开心嘅。同埋而家同以前有啲唔同，我觉得可以百花齐放，如果唔同嘅平台都可以合作，有多啲机遇或者多啲演出嘅机会都系好嘅。”