曾志伟出席新春节目拒谈人事变动：今日净系讲开心嘢

曾志伟强势回归无线出任副总经理兼行政委员会特别顾问，接手改革综艺科。今日（12/1）大年初一，志伟现身电视城出席“金牛献瑞贺新禧”直播节目，并首次会晤新闻界。

被问到将来发展方向大计？志伟表示：“大计就唔好今日讲喇，因为今日开心，咁所以我会再一次同大家见面再讲。其实所有嘢我觉得做电视同香港市民分唔开，咁所以我返嚟同大家一样祝福香港，所以有6个字形容我今次返嚟嘅心情，就系希望我哋能够做到同香港共同进步，亦希望我哋香港要团结，我哋Tvb要团结，最后就系要开心。其实冇嘢系会分开，因为Tvb系服务香港市民，所以所有嘢同香港市民系同一个呼吸及同一个步伐。”

被问到揾何丽全回巢帮手，志伟直言：“𠮶啲嘢迟啲慢慢讲，今日净系讲开心嘢。至于喺节目制作及行政上，希望大家畀啲时间我，我都系啱啱返嚟，又坐唔惯写字楼，搞到今日返工唔记得带锁匙，推门又推错咗，又俾人影到。（人事会否有变动？）今日唔讲工事，迟吓先，其实我都系返咗嚟3日，希望大家畀啲时间我。”