江嘉敏陈晓华刘佩玥自发派口罩　冯盈盈大赞：人间天使正义女神

新冠肺炎（COVID-19，俗称武汉肺炎）疫情蔓延，为了防疫，不少市民都四围扑口罩。日前江嘉敏（Kaman）、陈晓华（Hera）、刘佩玥（Moon）等就去到深水埗，派发防疫物资给长者同街坊，相当有善心！

Kaman在IG Post出几张照片，表示见到不少长者因为物资不够，将口罩重用，大感心噏。而自己在一个半月前订的口罩原来最终只是骗局，不过幸好身边有不少朋友相助：“好感动嘅就系有外地朋友见到我俾人呃，都好热心主动咁帮我订咗批口罩返嚟，仲有麦玲玲师傅一知道我想派物资，即刻二话不说第二日就送咗几百支洗手啫喱过嚟。而最开心嘅系，有几位朋友一听到我话去派物资，觉都唔瞓，揾晒全家一齐去揾密实袋，收工冇瞓觉就去将啲物资包好一袋袋，真系好好好开心大家出钱又出力去帮人。”

其实Kaman近日一直忙住拍摄新剧《食脑丧B》，挨更抵夜，但她都抽时间出街派口罩：“瞓得3个钟起身去派口罩其实真系好眼瞓，喺街度拎住几百袋嘅口罩加洗手啫喱真系有啲重同好热。但系当见到婆婆伯伯收到口罩嘅时候，睇见佢哋对眼都笑紧咁，再讲声“愿主保佑，希望个个身体健康”，真系咩辛苦都唔记得晒。同埋好多婆婆伯伯真系好好，明明自己都冇乜物资，我哋好想送多少少畀佢哋，佢哋都会拒绝，叫我哋分享畀其他有需要嘅人。虽然我哋有嘅物资唔系好多，但我哋希望帮得几多得几多，希望我哋咁做可以感染到身边嘅人去帮更多有需要嘅人。”网民纷纷留言大赞她人美心善，冯盈盈更以Kaman在剧集《大酱园》中的角色高双双的人物介绍“人间天使正义女神”来形容她！

而Hera就在IG写道：“感觉好似五饼二鱼嘅故事，虽然我哋嘅数量都唔多，但每人帮少少 畀少少，加加埋埋就会好多。系主动派嘅时候，发现好多公公婆婆都会怕麻烦唔想去排队～亦都会有啲递俾佢哋嘅时候好怕系要收钱～其实身边仲有好多人无口罩或者唔够口罩唔知点解决，大家都可以继续带多几块口罩出街，遇上有需要嘅人，可以主动送畀佢哋。”几位女神真是爱心满满呀！