【影片】谭咏麟陈小春解读十个身分　最怕下一代步后尘

作为一位成功男士，身兼数职是何等闲事，“校长”谭咏麟与陈小春纵横演艺圈多年，在舞台上、银幕上是发热发亮的大明星，回到家中则变回平凡的好丈夫、好爸爸，香港01与两位分身不暇的大忙人谈10个身分，时下流行玩Hashtag（标签），不知校长与小春最爱“#”哪个身分？

谭：谭咏麟
陈：陈小春

＃爸爸

谭：和他（儿子）倾偈，因为你唔知现代年青人谂咩，起码要知道佢交了甚朋友，同埋佢怎样处事，一定要以朋友方式去倾偈，先知道佢结识甚么人，从而帮到佢抉择。
陈：我好向往（做爸爸），朝住校长做目标，好似佢个仔读书咁叻就好。
（想下一代入行吗？）
谭：好彩现在佢完全冇兴趣，好辛苦，唔系个个挨得，我觉得我好另类。
陈：我不会让他做，唔成功会卡在中间，到时候佢自己调整唔到咪大镬。

＃丈夫

谭：我哋经常在出面工作，其实对他们来说都几唔公平，所以有时间𠮶阵，尤其我在香港，就尽量陪佢哋多啲。
陈：老公要孭起头家，对得住天地良心。
谭：膊头要阔啰！
陈：腰骨要直啰！

＃兄弟

谭：友谊系细水长流，交朋友能够交到5年以上，之后开始慢慢可以讲心，能够交到上去几十年呢，非常之难得。
陈：我以前好天真，以为系朋友，一世都系朋友，世界变咗，就唔系“一日朋友，一世朋友”，交朋结友都系要时间浸出嚟。

＃歌手

谭：当年我一年出两至三张唱片，劲歌金曲颁奖𠮶阵，有无线高层揾我，佢话：“专业人士评审，你有8只（歌）入围，非专业就第1至第14只都系你。”哗！我话唔使咁霸气呀？唔使咁多啦，我要3只就够啦。
陈：出唱片呢个动作我就真系冇谂过，点解？因为我觉得真系好浪费，十只歌入面，主要都系plug一、两只，其他7只你系咪真系plug先，如果唔需要，得闲做single咪得。

＃影帝

谭：我想遇到一个真系可以有得发挥嘅剧本，但可遇不可求，更加要考虑个角色系咪自己啱做，因为我个人太亲切，一行出嚟已经笑定先，咁就唔系几好。
陈：作为一个演员，你问我有冇向呢个目标（影帝）进发，我唔可以话冇，如果有（目标）先有火，只要提名过一次，我都觉得开心。

＃古惑仔

谭：以前我觉得古惑仔系好够义气，“够雷”乜乜乜，今时今日好多都上咗岸，离开咗呢个圈。
陈：古惑仔系香港嘢、香港叫法，“黑社会”三个字唔出得街，如果系合拍片的话绝对唔得，只可以讲“江湖”。

＃政协

谭：去到呢个位就顺得哥情失嫂意，千祈唔好。
陈：我冇乜好提。
谭：过关系咪快好多？
陈：唔关事！唔会嘅。

＃男神

谭：有麝自然香，唔同年纪、唔同阶段、唔同感觉都会出到啲味道，所以我冇刻意去迎合其他人口味。
陈：都唔知点嚟，边有神㗎啫。

＃오빠Oppa

谭：我哋啲电影已经一早打咗入去（韩国），到今时今日有啲观众都仲认得我哋啲样。
陈：本身韩国国民撑番自己，电影又好、音乐又好，佢唔需要外输，唔需要放出去全世界，佢系自己国家已经够食，本应吹日风，日风唔知点解又冇咗，好似陆沉咗咁，咁就更加吹韩风喇，夏日“韩”风。

＃网民

（有无玩《Pokemon GO》?）
谭：潮流嚟啫，潮流嚟得快走得快，我经过马路，见人明明绿灯都唔过马路，揸住架机好似傻佬傻婆咁样。
陈：我自从玩完《他妈哥池》之后都唔玩呢啲。
谭：你啲兄弟好钟意玩呢啲游戏㗎㖞！
陈：佢系呀，傻㗎嘛，潮流我唔系好明白，out咗啦。

场地提供：E-MAX
谭咏麟化妆：Eva Chuk＠Faces make-up studio
谭咏麟发型：Perry Tang＠Silkcut Salon
陈小春化妆：Andy Leung＠ndnco
陈小春发型：Beijing hair culture clifflan