【开心速递】KC同Icy父女恋修成正果？　岑杏贤：期待之后嘅发展

无线处境剧《爱‧回家之开心速递》有多对CP，而最新一对轮到岑杏贤 (Jennifer) 饰演嘅Icy同欧瑞伟饰演嘅KC。

其实KC同Icy呢一对，之前已经有唔少铺排，上星期剧情讲到尽管KC被Terry“炖冬菇”变成初级文员，但Icy一啲都唔介意，更趁机送上爱的抱抱。发现Icy对自己有意思后，KC似乎十分抗拒，并多次暗示二人之间嘅年龄差距，令Icy一度以退为进，用“好朋友”身份同KC相处，而另一边厢，Icy喺大龙生面前为KC讲尽好说话，最终令KC回复高层身份。“黑化”Terry（李伟健饰）有见及此，自把自为帮KC搞咗个表白派对，而Icy更当众送上香吻。虽然Icy事后知道KC系无意同自己拍拖，但就似乎完全唔介意，而网民对于Icy同KC呢一对都十分受落，唔少更认为好过Helen（姚莹莹）。

对于呢对新CP嘅发展，岑杏贤接受《香港01》访问时透露暂时未有任何新动向。“其实都有同 KC讨论过，佢觉得呢个组合都几新鲜，可以尝试发展。但最重要都系睇编剧点写，同埋网民嘅意见，都开心大家会去讨论KC同Icy。”剧中Icy明知KC唔钟意自己，但都愿意做其女朋友，岑杏贤笑言呢啲剧情现实中都可能会有。“如果发生喺自己身上的话，个心一定会唔舒服，但如果真系好钟意对方的话，可能都会好似Icy咁恋爱大过天。”拍拖如同单恋，岑杏贤认为最终受伤系自己。“而家会理智啲，同埋会带眼识人。”其实岑杏贤曾经同袁伟豪拍拖3年多，关系更去到谈婚论嫁嘅地步，传出“分讯”时，除有传系因为聚少离多外，有指系因为男方当时事业有起色，将婚事进行拖得就拖……难怪岑杏贤话要带眼识人。