【后生仔倾吓偈】Long D好难维系？　麦明诗：比普通分手更唔开心

Long D对唔少情侣嚟讲都系一个考验，经历过两次Long D嘅麦明诗，喺最新一集《后生仔倾吓偈》就以“Long D系唔得”作为总结。麦明诗话自己当年喺英国读书时，男友因为毕业要返香港，结果一年多嘅感情喺4个月后结束，但死因系咩呢？麦明诗认为系“穷”。“我哋唔系台湾同香港，weekend可以飞去见下对方。4个月无见过面，去到第2、3个月时，已经唔系好记得感觉系点，然后又会谂到返香港见到对方好似好陌生，觉得好似网恋、同前度见面咁，有少少尴尬 。”

其实除左穷，无钱买机票之外，Long D另一个死因就系时差，麦明诗仲记得当时佢准备睡觉，但对方就刚好起身，到对方准备睡觉时，自己永远都系忙紧做功课，根本唔会有心情去讲电话，令佢“感应唔到对方嘅生活节奏”之余“明明应该舒服开心咁交流，但最后好似变成责任”，麦明诗之后愈讲愈有感觉，指经历Long D时遇上唔开心想打畀男友，但永远都会因时差关系而要等。“系咁等，就会变成谷，到最后倾到电话时情绪就会好激动或者系咁喊，对方又唔知点安慰你，你又会觉得佢唔care你，小事会发到好大，然后开始唔揾对方……”见到麦明诗将自己嘅经历搬晒出嚟,，而且仲要咁激动，睇嚟佢两段Long D都好不堪。

之后麦明诗又话Long D分手比普通分手更唔开心。“一齐系同一地方散，大家会经过好多激烈嘅交涉，但Long D系去到一个位交涉都无用，系好有心无力而且唔甘心。”同场嘅后生仔GM同波波都曾经历过Long D，但最终都系分手收场。