“翻版陈妍希”陈洁玲望重返幕前：唔知点解一路都冇人揾我拍嘢

有“翻版陈妍希”之称的陈洁玲（Christy）在2017年离开效力5年的TVB后，毅然投资7位数与朋友合资开婚纱店同party room。目前生意搞得有声有色，她更透露计划做一些新的小生意以及正在筹备party room开分店，势要做事业女强人。

有生意头脑的Christy向《香港01》透露这两年来自己成长了不少：“呢两年做生意真系经历咗好多以前从来唔会经验嘅困难，例如同拍档或者其他人嘅一啲纠纷，生意上同金钱上的纠纷。所有嘢都要自己咬实牙关去解决，每次解决完都学到好多嘢，会成熟咗好多，性格同以前比都变咗好多。（咩原因令你坚持？）因为穷，要自己养自己，想屋企人过好一点的生活，想将来过得舒服一点的生活，所以后生𠮶阵乜嘢都要挨！（系咪回到本所以开分店？）因为自己系呢盘生意累积咗一啲经验，觉得可以再发展。”

离开TVB后，Christy曾接拍题材大胆的电影《私人会所》，更短时间签约王晶的星王朝有限公司：“2017签的，不过其实系好短的一个合作，会返大陆拍一啲网剧。𠮶时咁啱啲生意啱啱开始，唔可以离开香港太耐，始终佢哋的制作多数都要返大陆，一走就几个月，所以无办法取舍之下，做好啲生意打好基础先。”虽曾为生意暂别幕前，但Christy仍希望复出：“好想做返幕前，但系唔知点解一路都冇人揾我拍嘢。（有冇想话做边方面？）其实拍咩都冇所谓，最紧要开心，同埋网上粉丝成日问我几时拍嘢问到我开始都觉得尴尬了。（拍性感戏都OK？）都系专业演员，所有角色只要系有挑战性，合乎剧情需要，自己觉得舒服，都唔会抗拒。其实除咗性感仲有好多角色都想尝试，例如一啲边缘啲嘅角色，精神病之类，又或者扮丑角我都OK。”

Christy不时亦会在IG大派福利照，问到会否计划出写真，她就笑言：“一路都好想出写真啊，但系要等一个好的时机。（有冇底线？）前提都系要靓先啦，可以nude，但不会露点！”至于事情目标，她就称：“我份人其实唔钟意plan 太长远嘅嘢，因为好多时计划都赶不上变化，所以做好目前就OK。而现在最想实现的就是养好身体，因为最近唔知点解成日病好辛苦。”