陈洁玲放低生意碌保龄　索爆细妹有无兴趣入行？

今届香港小姐选举正进行得如火如荼，成功入围嘅20名佳丽变发示人，最终边个能够突围而出仲要睇嚟紧嘅表现，但唔少网民开始回带，揾返近年一啲非三甲沧海遗珠，好似2012年参选港姐，有“翻版陈妍希”之称嘅陈洁玲（Christy），约满TVB后最近专注生意发展。呢日抽空同妹妹到西贡碌保龄，原来妹妹都相当上镜㖞﹗唔知有无兴趣入行呢？

离开TVB后Christy拍咗套《私人会所》，依家就将时间都放晒喺影楼及Party Room生意：“同时兼顾两盘生意，需要嘅精神时间系超出我想象。拍戏同做生意都一定系团队合作，唔会自己一个做晒，但演员好多时系参与一个团队，但做生意就系我去带领团队，个压力系大好多倍。但无论如何，我始终都系一个演员，亦会渴望再次参与唔同嘅制作，喺幕前世界一定会再同大家见面。虽然暂时未有时间，亦未有合适剧本，但我会努力更新我嘅社交平台，始终时代唔同咗，平台同媒介亦唔再局限，大家有嘢同我讲随时都可以架。”

呢日Christy终于肯休息一下，孖住妹妹Kitty到西贡，唔系游船河唔系食海鲜，反而去左打保龄。睇真啲Kitty都相当上镜，外表斯文大方，被问到会否考虑介绍妹妹入行，Christy未示无此打算，事关妹妹原来已为人妻，专心做家庭煮妇相夫教子。

俾妹妹爬头结婚，Christy又会唔会开始心急呢？“其实都恨嘅，点会唔想拍拖，但都系随缘啦。（即系有人追？拣紧？）叫得做空白，系因为冇，所以我系只能够专注做生意。其实我好宅，生活圈子好细，识唔到人，睇下我多啲嚟碌龄，可唔可以识返个保龄王子。”