【流行经典50年】网友赞超水准期待新作　泳儿：一直坚持唱广东歌

TVB节目《流行经典50年》，每集都请一班大家熟悉嘅艺人歌手，上去献唱那些年嘅经典歌曲，真系一响起前奏已经回忆返晒嚟，识跟住一齐唱。呢日泳儿同吴浩康担任嘉宾，唱出《花无雪》以及《我的回忆不是我的》，短片上载短短一日已经超过4万2千观看次数，过百留言大赞演出极精彩﹗泳儿接受《香港01》访问时表示相当惊喜：“有啲网民话2019年仍然都听紧，多谢你地。”

泳儿同阿Deep眨下眼都出道十几年，一直被视为实力派唱将，特别系泳儿，由一出道嘅第一首派台歌《感应》已经令人惊艳，更夺得“十大中文金曲”及“新城劲爆歌曲”，系第一位凭第一首派台歌夺歌曲奖嘅女歌手。呢晚先由泳儿独唱出当年第二只个人专辑主打歌《花无雪》，空灵高亢而不刺耳唱出“为何你令我活到仲夏仍像初冬”，令人不禁代入歌词引起无限愁绪。

【音匠相传】现今乐坛一样有宝藏 泳儿：点解成日要同以前比较？

唔少网民都大赞泳儿唱功一流，但同时为她未能在香港乐坛大红大紫感到可惜。“香港人真系吾识欣赏好歌手！泳儿首首歌都甘好听样又唔差，唔明点解会唔红。”、“live都好听到痴线，睇完电视要即刻再听﹗”、“红唔红真系讲命讲运，最红嘅未必系最有实力，最有实力又未必最红……希望泳儿可以遇到一个爆出嚟嘅机会啦”

好多网友问咁好嘅歌手到底去咗边，其实泳儿一直都有唱歌，去年亦有推出一首《骑膊马》，更参加过内地音乐节目《蒙面唱将猜猜猜》第三季，获得猜评团一致好评，师兄古巨基忍唔住眼红红咁同Vincy讲：“你真的很好，很努力，你是值得拥有更多的机会。”

【蒙面唱将】泳儿落泪透露曾因失声迷茫　古巨基：妳值得拥有更多

对于呢次上节目可以引起咁大回响，Vincy接受《香港01》访问时表示相当惊喜：“好多谢网民仍然喜欢呢两只歌，有啲网民话2019年仍然都听紧，多谢你地。好多人话呢两年好少听到我唱歌，其实一直都有坚持唱广东歌的。好歌难求，希望会再次遇到同我有化学作用嘅广东歌，可以再次令大家听到我的声音。”佢仲预告嚟紧三月会有新歌出，希望大家继续支持。