【是咁的，法官阁下】细细粒演活角色：当你好钟意就点都会做好

细细粒于《是咁的，法官阁下》演智障人士角色，并涉及杀人及肢解尸体案件，每集都有不少爆喊场面，网民大赞细细粒演活角色，更认为佢值得拥有“飞跃进步女艺员”的奖励，可惜嘅系，剧集播出时，台庆“飞跃进步女艺员”角逐名单已出炉，细细粒整定无份，不过佢接受电话访问时，就好乐观咁话被观众肯定已经好足够，并十分谦虚指自己唔系好劲。“其实拎咗又点？我觉得比人知道我原来可以演惨情戏仲好，如果呢个角色系阿田（田蕊妮）做，大家都好有信心佢handle到，点解我做会有咁大回响？系因为我一直未被认同。”

细细粒过往的角色都大情大性，今次集集喊到令人心噏，成功令观众看到她另一面，她在访问时多次感谢监制记得她的存在。“其实我一直好想做啲生离死别、喊到肝肠寸断嘅戏，例如亲情或者自身嘅残障，表达唔到自己嘅愤怒，喊到要死𠮶只，因为咁先最震撼人心，但一直都无机会，所以收到剧本时真系好开心，而当你好钟意呢件事时，你就点都会做得好。我读剧本时已经喺个脑预想几个画面，边啲位要缩膊、边个位要口窒。”
 

细细粒近年经常北上演综艺节目，近日又拍摄央视剧集，是否对演技有所帮助，佢就好直接咁话：“其实只不过多一个地域性发展，内地太多精英，要上位并唔易，语言已经好大障碍，自己都仲有好多嘢学习。同埋呢行真系好讲机会，说实在呢行有边个唔努力？那怕只有一句对白，大家都会好珍惜，但机会未到就未到。”细细粒话自己虽然不时北上，但她从没有放弃香港市场。“我系全职演员，那怕系一个过镜师奶角色，我都会演，亦有信心可以做好。”问到老板王祖蓝可有赞赏她的演出，佢即时打工仔上身，指老板如果亲自出马，绝非好事。“我之前返内地拍剧，佢都只系send过‘拍摄顺利吗’呢5只字比我。”