【专访】王祖蓝帮唔到公司艺人赚人仔？ “有时真系要睇际遇”
每当内地发出“限乜令”时，媒体要揾香港艺人做回应，王祖蓝基本上都系头号目标，原因怕且都唔需要再多讲啦……对于近年国内小鲜肉同流量小生大行其道，三十有八嘅王祖蓝凭乜同佢哋争一席位?要打入内地市场系未真系够搞笑就可以？“普通话系最大问题，其次系成长背景，有时同人倾，佢哋提到嘅卡通或者小品都唔系好知，变相好难融入，跟唔到就系跟唔到。”祖蓝于内地第一个综艺节目《百变大咖秀》，以模仿经典人物为主，所以就算唔熟识，也可以用扮嘢去补救，对他而言，是一课很好的速成班，也算是一支好筹。运气再加勤奋，令他跑出今天的成绩，但公司数十艺人，跑极都好像只有他较为出色，外人难免会有“只顾捧自己”的谂法。“有时真系睇际遇，接戏、接骚同宣传我哋都无问题，但每个艺人都有自己际遇……”
香港巨星vs内地鲜肉
其实去年访问祖蓝时，他曾说过成立公司后，才发现国内每个地方捧人都有不同的“程式”，为此他招聘了不同的工作人员去解决问题。而当问题化解了之后，还得看艺人的运气……提到近年时装品牌不惜重金聘用流量小生做代言人，香港虽然也有不少天皇巨星，但就似甚少享受“重金”代遇，原因何在呢？“外国品牌都系好现实，睇数据，呢个系必要。其实，香港在政策或演艺培训方面可以做返好啲，依家嘅土壤唔系好够营养去培育一啲出色演艺人。”内地有专科培育演艺人，单系北京电影学院、中央戏剧学院每年就已经有大量“出产”，反观香港演艺学院近年频频收生不足，更甚的是，连大台艺员训练班也由一年缩减至三个月，点比？身为广西壮族自治区政协委员嘅祖蓝唯有尽力帮，无论系幕前抑或幕后，他都希望有钱齐齐揾。
重返舞台剧
其实用百足咁多爪去形容王祖蓝真系好啱，综艺、唱歌、编导样样掂，而近排佢连舞台剧都玩埋。演艺学院出生嘅佢，早年曾获提名香港舞台剧奖最佳男主角同男配角，功力有返咁上下。下月公演嘅《唯独祢是王2》，他并非首次演出，不同的是，今次的大卫由小男生升格为王，与饰演将军妻子嘅钟舒漫发展奸情……“最担心系唱歌同时间，因为好耐无踏台板，同埋做综艺节目好伤声，之前做福禄寿有人同我share，依家差不多系我自己去挨晒，同埋我好耐无体能训练……”
每年都会抽空到外国睇歌舞剧嘅祖蓝，预告《唯独祢是王2》只是前奏，虽然明知要在香港搞舞台剧十分困难……“应该要谂下点更贴近观众、同点提升质素，只要做好呢两样，再有软件去配合就ok，boardway到今时今日仲加紧剧场，每年culture tourism都有增长，我每年去都会同𠮶边制作人、公司倾，希望可以带到一啲经验返嚟……”看来王祖蓝赚人仔之余都非常照顾香港市场……
场地：香港九龙贝尔特酒店
发型：Ted Yeung@i i Alchemy hair & nail
化妆 :K.T Tsui
Styling:Dicky Lee
服装：Bettie Bespoke