【特技人‧专访】罗浩铭八年时间由特技人变指导 思考动作最重要
《特技人》讲述一班幕后特技人的工作情况，虽然在剧中并未有很细致去描写，但相信大家都知道特技人是一种有危险性的工作，而且风险不少，一定要认真安全才能做下去。
《特技人》入面，谭俊彦饰演的大志哥是众人的头领，其实即是一名动作指导，他负责设计整个动作画面，而他的兄弟手下朱晨丽、林师杰、罗浩铭、方绍聪和受了伤的温家伟则是特技人，负责去执行大志哥定下来的动作。剧中是特技人，而现实中是一名演员也是特技人，兼做过动作指导的罗浩铭今次跟大家谈谈如何由一个特技人成为动作指导。
自己有一个双重身份，在拍摄《特技人》时也有亲自落场做动作，究竟演戏难，还是动作难呢？他说：“演员最紧要呢，系个演技，观众信唔信你做紧呢样嘢，今次我做特技人，下次做警察，再下次做军人，咁我无做过军人，我要做我嘅演技去令人信我系做紧军人，可能真人系做唔到，但演出嚟令人信，呢样系好紧要。至于做特技人或者动作设计，安全就系最重要嘅事，佢可以唔care戏，因为好多时都影唔到个样，你要安全做完个动作就得喇，演技同技术，就系两者最大嘅分别。”其实对他来说，动作当然比演戏容易，因为久经训练的他，对自己的动作相当有信心。
除了特技人，阿铭都试过做动作指导，两者当然有很大的分别，他指：“我未正式做过一套电影都好难叫自己做指导，但我的确有喺广告、微电影或者网大（网络大电影）做过好多次，唔系话有几多时间，系你每一次点样去准备一件事情。例如今次要拍打擂台，你就要有一啲同人地唔同嘅动作，可能有啲人做咗十年都系咁，有啲人好叻，系睇系唔系开正你个范，近呢几年好彩，好多拳脚或者锁技嘅戏，开正我个范。”
【特技人．专访】朱晨丽会拣谭俊彦定何广沛？ 答案竟然系......
另外，他还指出做指导有一件好重要的事，就是怎样去将动作展现给老板看，因为即使将一个动作谂到好劲，但不能体现于人前也是徒然。“我哋就会有个副手，示范俾人睇，有时有拍片，有时系即场做。香港电影好兴做现场设计，因应个地方去打，因为好多时连个地方都未知租边度，香港特色嚟，好考你临场㗎，睇你平时有几多预备，有无不停谂呢件事。假设，我搭巴士𠮶阵，就喺度谂，如果要喺呢个场打可以点打，部机要点摆。同做演员一样，今日个角色未做到你，你都要谂定点做，第日可能要做爸爸、哥哥，呢啲嘢都系我现实无做过，睇多啲人哋嘅戏，同埋留意现时发生嘅事，因为我觉得演员就系将生活嘅嘢，透过你演出去令观众信，假嘅都变真，咁就叻喇。”
至于指导跟特技人最大的分别是甚么？当然，特技人是跟指导揾食，所以阿铭将指导比喻为打仗的将领，而特技人则是兵队，他说：“武指系我设计成个场面，可能会摆埋个机位，啲灯点打，你行边个位。但系特技人就要听人指使，要做好呢个动作，可能块玻璃点摆，我无得say，我剩系要做好呢件事。一个专业嘅指导，一个人就话晒事，但佢会揾唔同嘅人帮佢手，例如今日要枪战就揾枪师傅，但都系个指导设计点做，枪师傅帮你去执行。好似打仗咁，一定要有个司令喺度，下面有好多枪兵、步兵、骑兵等等。”
“由我第一次做特技人，到今时今日自己接到少少动作设计嚟做，大约用咗七、八年。最紧要系同个社会一齐进步，社会兴紧乜，以前可能无呢个运动，忽然之间出现，你要去学，可以唔使好叻但都要识少少。不断增值自己，有啲人话自己打呢套功夫好叻打咗十几年，但唔会十几年都拍呢套戏，人会变。以前功夫年代好兴打打打之后一个筋斗去咗草地，但社会会进步，会飞去商场，飞去街。又例如早几年好兴打泰拳，或者好兴打咏春，就全部去学一样，唔得，泰拳要识，咏春要识，空手道要识，乜都要识少少，唔可以话剩系学一样，如果唔系喺呢行就太单调。”作为一个特技人，要升LV做指导，当然要经过时间的洗礼，但最紧要是平时多接触新的事物，不要墨守成规，将想像无限放大，可以安全做出一些惊奇的动作。