【早霸王】运输真汉子对新婚老婆呼喝　出街连手都唔拖先系爱？

又到星期五限定嘅《早霸王》“你知道唔知道有人挂住你”环节，今期男主角阿聪本身从事运输行业，自认脾气大又粗鲁嘅佢，因为成日对老婆呼呼喝喝而激嬲对方，于是想借节目同佢道歉。呼呼喝喝呢种行为其实大多出现于老夫老妻之间，但奇就奇在阿聪同老婆只系拍拖一年、结婚一年，听到呢度，连森美都忍唔住话：“一年你就呼呼喝喝 ？！”阿聪虽然话会改，但森美就认为最重要系揾出原因：“唔可以不停话我错，要揾出原因、点解你会系咁。”

阿聪认为系因为太紧张对方所致，他又举例说明：“过马路想拖佢又唔肯，我会好暴躁，或者系因为佢有自主性，平时我都唔会拖佢，系认为佢有危险先拖。”手都唔拖到底系咩玩法，森美小仪即时充满黑人问号，但亦表示如果双方都接受其实问题不大，阿聪话其实除咗拖手呢个问题之外，最想同老婆倾吓生仔问题，但森美一听到就话：“劝你改咗态度再谂生小朋友，因为小朋友出世后会更大分歧。”

电话接通后，老婆一听到阿聪把声，即时变得温柔，而阿聪亦把握机会真情剖白：“老婆，我好想同你讲对唔住，因为我平时讲嘢好大声、好粗鲁，其实都系著紧你，我以后会努力去改善自己，我永远都爱你，你爱唔爱我？”老婆听完后都话多谢阿聪肯去改，但似乎听唔到阿聪最后𠮶句“你爱唔爱我？”于是阿聪就再一次咁话：“我爱你呀老婆！”运输真汉子都有柔情一面。