【早霸王】23岁仔无句真连朋友都睇唔过眼　女方狠飞兼全面封锁

俗语都有话醉翁之意不在酒，男士们落酒吧多数都系为咗识女仔，就好似今日《早霸王》“你知道唔知道有人挂住你”环节当中呢位主角Lesile咁，半年前喺酒吧识咗Gigi。“倾落之后觉得佢同平时喺酒吧识𠮶啲女仔唔同，份人比较单纯同可爱。”之不过，由于Lesile一开始谂住玩玩吓，所以向Gigi虚报唔少资料，例如话自己屋企曾经好有钱、又话自己有出国留学。“佢唔钟意我做gym、打拳，因为个场有好多异性，我就暪住佢继续去。”

到底Lesile系出处咩居心呢?相信只有佢自己先知，不过原来除虚报家底、学历之外，就连年龄都系假，原因系“佢大我8年，所以我要呃佢。”原来呢啲曾经出现过喺《精装追女仔》的桥段，今时今日仲会发生！

或者系因为太多谎言，所以连身边嘅朋友都睇唔过眼，将Lesile的“恶行”逐一踢爆。“我同佢拍拖无耐之后，我啲朋友同佢讲有几衰、又话我试过撬长脚，后来我feel到要分手，所以系咁chur佢。”最后当然是分手收埸，而Gigi亦将Lesile全面封锁。“佢令我有种好sweet嘅感觉，同呢23年见过嘅女仔唔一样、真系好可爱。”

23岁仔，到底见过几多女仔呢？到底知唔知咩叫诚实呢？就连森美都好语重心长咁话“爱情唔可以玩，一开始就要有责任，一段关系建筑在谎话之上，对方以后要点信你？”或者系连个天都唔想帮Lesile，电话虽然打通咗，但就无人听，在空气中表白嘅佢就话：“呢半年呃咗你好多嘢，好对唔住，亦知道无资格、面目揾你，但希望你听到呢个留言后，可以原谅我，大家再重新一次。”相信Gigi就算再单纯都会识得点拣。