【母亲节】陈家乐最想送10卡钻石畀妈咪 ：细个应承送畀佢

近期凭住无线剧集《逆缘》而人气急升且成为新一代男神的陈家乐，今日就于所属公司集团旗下的珠宝首饰店担任一日明星店长，当然引来大批市民围观啦。问到家乐有咩冧客必杀技，他说：“我咩都唔识㗎，唯有笑多啲笑得灿烂啲，即系卖笑，我以前都做过销售员，发现对客人嘅笑容系好重要嘅，笑住讲对唔住佢哋通常都唔会嬲。”

提到即将到母亲节，家乐表示会买钻饰送给妈咪：“有样嘢我争咗我妈咪好耐，我细个时应承过会送粒10卡嘅钻石畀佢，但到依家都未买，因为10卡钻石系好贵嘅，我仲未有能力买得起。佢每年都有哦我，所以我决定买份细份啲嘅先。”家乐去年都送过一只订情钻戒给女朋友余香凝，原来他买之前也有问过同公司的好友卫诗雅意见，诗雅对珠宝拥有专业知识。家乐说：“我当时想买啲1、2卡嘅钻石，但佢介绍𠮶啲最少都要成6位数字，太贵喇。”家乐身旁的诗雅即说：“𠮶啲保值吖嘛。”

讲返那次送钻戒给女友，家乐竟然话：“佢唔钟意呀，话我做咩要嘥钱，咁我𠮶次系因为自己揸车发生意外令佢受伤，好内疚，咪想做啲嘢补偿，想畀个承诺佢我以后都会照顾佢，点知佢话我好无聊，承诺咪承诺啰，都唔使嘥钱买钻石㗎嘛！（咁佢有无叫你以后折现？）咁又无。”家乐亦深明女仔总有口是心非的时候，亦知道女友只是想锡住他荷包：“咁每个女仔都钟意呢啲嘅，佢口讲话唔钟意啫，但佢收到时其实好开心。”至于两人几时结婚，家乐就话无实际的年期，大家都已认定对方：“有同一目标同谂法，努力赚钱同储钱先，连自己都照顾唔到点照顾一个家庭。”