陈家乐原本同陈伟霆一齐做Sun Boy'z : 我跳舞跟唔上佢哋

陈家乐最近凭新剧《逆缘》成功入屋，其实佢喺03年参加过英皇新秀歌唱大赛，仲晋身16强再签约英皇，仲系同陈伟霆同届添！

日前家乐接受由梁泰来主持嘅电台节目《1圈圈 星光背后》时，透露当年因为关智斌独立发展而Boy'z 班底重组Sun Boy'z，而家乐亦系侯选人之一，但系当时佢自觉同其他成员格格不入，加上唔系跳舞嘅材料，所以上咗几堂跳舞堂之后就决定放弃，谓：“我系签咗约先知公司想组成Sun Boy'z，佢哋就要求我去排舞。排咗几堂，我完全跟唔上，但佢哋全部都跳得好有型、Chok到好靓仔，而我依然仲记紧Step，跳到成只蟹咁！我啲手脚系唔协调，一字马佢哋全部都做得好好，但我连普通动作都做唔到。好沮丧，完全跟唔上，上咗几课我就知道自己唔得，我同佢哋讲我唔去（排舞），我好易放弃。呢样系我以前嘅一个缺点嚟，我对一啲自己冇信心嘅事，我系好易放弃。”