【星光大道】细细粒为节目才艺尽出　宣布夺冠后反应竟然系……

细细粒（陈嘉佳）自从签约王祖蓝公司后，频频现身内地各类综艺节目，日前她又飞到北京为央视的《星光大道》与一众内地素人进行才艺对决。虽然录影当日细细粒状态唔系咁好，但凭其十八般舞艺掌握现场气氛，最终与另一位内地精英齐齐成为一周冠军。不过，当主持人宣布结果时，细细粒都似乎唔系太相信自己嘅耳朵，呆足一分钟，要旁边嘅选手提佢先“回魂”并一秒爆喊。

对于自己夺冠一事，小宝就话都几难以置信：“虽然我真系好努力练咗好耐，但因为又要讲国语又要好短时间内换衫好紧张，加上个个都卧虎藏龙，所以我真心系冇谂过有奖攞。”问到整个比赛中最难忘环节，细细粒笑言是与内地高手“舞斗”部分：“首先𠮶个环节嘅现场气氛好好啦，同埋你哋咪睇我肥嘟嘟，我又真系几灵活㗎㖞，拉筋同埋系咁转圈都难唔倒我，评判都有赞我话我咁都仲保持到灿烂笑容好可爱，有机会系喺𠮶个环节加分嘅！”
 

表面上，细细粒成日都系食同食，但其实佢每次参加综艺节目前，都做足准备，除今次佢练歌练通宵外，日前佢参加另一个内地节目《喜剧之王》时，再以韩红造型上阵的她，一出场就先整首《绒花》及《LET IT GO》，之后再以小凤姐造型，唱出《上海滩》、《红日》等广东经典歌，不过，最令观众震撼嘅系佢大跳BEYONCE嘅《CRAZY IN LOVE》再使出“电臀舞”，呢啲真系唔系即场执生就做到。