【教育电视】王祖蓝18年前演排球队万人迷：点估到自己做小生

最近香港电台就筹备紧拍摄一个节目，叫做《我们都是看ETV长大的》，仲喺facebook开咗个Page畀大家重温部分教育电视嘅精彩片段，亦搞咗个“ETV一哥一姐”嘅票选，等大家拣出自己嘅心水。六位候选者依家喺娱乐圈都好活跃，一啲仲估唔到佢哋原来系有份拍教育电视添，就好似王祖蓝同宇宙级歌手G.E.M.（邓紫棋）咁。

原来王祖蓝喺2000年左右拍过几集数学科同常识科嘅教育电视节目，当中仲包括以性教育为题材嘅《青春心曲》，而佢喺呢个故事里面仲竟然系饰演一个充满运动细胞嘅排球队队长，喺学校打亲排球都有女仔忍唔住望。当然啦，佢唔止得呢招啦，以下呢招就真系精彩：佢准备上小巴时，就一手截住想打尖嘅男同学，等女主角可以顺利跟队上车，又畀埋对方份车钱，搞到个女主角成个样春心荡漾咁。

男神出招实录：

王祖蓝接受《香港01》访问时，就讲返自己喺世纪初时参与教育电视嘅原因：“当年喺演艺学院成日都有呢类通告，𠮶时我亦都喺香港电台做儿童节目，佢哋要啲字正腔圆、个样好乖嘅人拍教育电视，所以就揾咗我喇。”点睇以前嘅演出？佢就觉得好搞笑：“最有趣系自己竟然做男主角，我点会估到自己系做到小生，仲要我喺青春心曲里面系做排球队队长，你话惊唔惊。我系完全唔识打排球，亦都唔识运动，俾人爱慕𠮶种感觉实在太好笑。”佢又笑指自己当年比起依家瘦几个圈。

其实其他候选艺人都好值得讲，就好似G.E.M咁，可能佢细细个时个样同依家都有少少分别，但系佢个招牌金鱼咀仲Keep住喺度，仲有佢细细个时啲普通话已经好犀利，唔怪得大个咗可以喺内地咁威咁劲，真系好似整定咁。林一峰、黄美棋、杨思琦个样都同依家差唔多咁，都系咁靓仔靓女，不过最令人惊喜嘅都应该系以下呢个。

【教育电视】人气女歌手廿年前拍过ETV 接近九成人估唔到她是谁