【教育电视】人气女歌手廿年前拍过ETV　接近九成人估唔到她是谁

真心唔知依家读紧小学嘅学生，上堂仲会唔会睇教育电视，但系当年读紧小学嘅时候真系好期待呢样嘢，最起码成件事系开心过听老师讲书，同埋成个课室黑妈妈偷偷哋瞓咗都冇人知。最近，香港电台就筹备紧一个节目，叫《我们都是看ETV长大的》，等大家可以重温童年回忆，又等大个仔嘅观众了解依家嘅教育电视，而佢哋仲喺网上搞咗个有奖游戏，贴咗条片等大家睇完之后票选“ETV一哥一姐”。

【教育电视】王祖蓝18年前演排球队队长多女迷：点估到自己做小生

“ETV一哥一姐”个候选名单就有六位仍然喺娱乐圈好活跃嘅歌手同艺人，有啲真系断估都估唔到佢曾经拍过教育电视，好似依家喺内地红透半边面嘅G.E.M.（邓紫琪）同王祖蓝咁。除咗佢两个，片中都仲有四位演艺人喺度，包括：林一峰、黄美棋、杨思琦同埋……咦，呢个边个嚟？如果冇睇字幕、冇听旁白，我谂我真系一世都估唔到到底呢个系边个，而呢位ETV童星就系唱过《只要和你在一起》、《到此为止》等歌曲嘅连诗雅（Shiga）。

其实就算开咗估我都真唔多相信，虽然细细个嘅Shiga同依家一样都系面尖尖高高瘦瘦，但真系得少少似依家个样，真系可以话女大十八变。而Shiga细个时就主要拍英文科嘅教育电视嘅，片中就播咗佢廿年前同佢个外藉同学仔讲：“Did you sleep well last night, Nancy?”发音仲几准添，所以我谂佢嘅英文真系由细叻到大，之前喺网上串错“Rest in Peace”做“Rest in Piece”九成九都系唔小心。