【果栏中的江湖大嫂】冯盈盈演技受批评　男朋友冇安慰仲踩多脚？

冯盈盈今日出席《果栏中的江湖大嫂》宣传活动，剧集今个星期就会进入结局周，今次喺剧中饰演暴力女嘅盈盈，表示最后五集每一晚都有高潮位，仲预告自己个角色会更加暴力。

盈盈暴力女角色深入民心，唔单单系令到平日街坊见到佢时，都要回避一下，盈盈笑言：“身边同事而家见到我第一句已经系：“‘唔好打我唔好闹我’不过佢哋都系讲笑咁讲，其实我好斯文㗎。”不过讲到尾盈盈“不良少女”形象已经根深蒂固喺大家心中。

【果栏中的江湖大嫂】硬加强奸戏剧情好牵强　冯盈盈好彩逃出魔爪【果栏中的江湖大嫂】冯盈盈处女剧有改善空间：有啲位睇到好尴尬

第一次演戏就受到大家注意，盈盈以喜出望外嚟形容，当然网上世界讨论一定有赞亦有弹，盈盈都有留意，仲话会虚心接受。但估唔到最早嘅批评，并非来自网上，而系来自佢嘅屋企人：“妈妈话呢个位演得唔好，男朋友话呢个字读错咗，因为打晒底，所以见到网上批评都已经冇好难受咁样。”

不过问到俾男朋友弹会唔会感到好唔开心，盈盈就话：“佢又唔系全部都弹我嘅，佢都有赞我有啲位演得好自然，平时都唔见佢睇开剧，而家一有时间就睇，佢算有心啦。”盈盈讲到呢到面上已经流露出一副幸福模样，睇嚟佢男朋友咁留意佢已经系一种好大鼓励。