【掟狗落街】刑罚要同谋杀睇齐？　宣萱支持重判：动物都系生命

宣萱（Jessica）爱狗爱到出哂名，之前喺访问忆述返自己其中一只爱犬离世嘅过程时都显得非常感概。对于近日一名23岁嘅男主人喺深水埗掟自己只白色银狐犬落街分尸嘅案件，Jessica亦都系感受好深，佢今日出席活动时就向《香港01》表示：“我唔敢睇，都系人哋讲畀我听，我哋可以做嘅就系参与多啲活动宣扬多啲正面讯息，等香港个气氛好啲，可能系因为香港环境比较细、生活压力比较大，令大家负面情绪比较多，引致好多呢啲悲情发生。如果佢系好人好者，佢绝对唔会掉自己只狗落街。有情绪系应该用其他方面处理，唔应该伤害手无寸铁嘅人、动物。”

Jessica喺访问时亦表示自己认为“动物警察”应该早日成立，而其实社会各界亦慢慢正视爱护动物问题，好似依家多咗人养唐狗。至于杀狗杀猫系唔系应该提高刑罚，Jessica就咁讲：“要视乎点解个人要做呢件事，其实应该同杀人嘅判决差唔多，因为始终都系生命，佢哋系唔识讲嘢，但其实佢哋都系有感受，有人觉得动物好多，冇咗只冇所谓，但其实人都好多。”杀人最高判终身监禁，杀狗系咪都应该咁？佢就咁睇嘅：“如果𠮶个人系钟意为其他人、动物带来痛苦而做呢啲事，系真系要重判，但去到咩地步，就要慢慢商讨。”